Read lugbara Rutu 2 Bible Online

Rutu 2 - lugbara bible

Rutu 2

¹Isu Naomi ma agupi ma adripi indi, adani eri ori’ba Elimelekini, eri ovu ’ba afa e’iro tu, runi Boazi’i.

²Te Rutu Moabu ezoru nderi nga ’yo Naomi tia kini, Onyiruni mi ku ma mu amvua, ma lo anya vile agu ode mani ngazu asi ndriza isuzu vuniari ma vutia. Eri omvi e’yoni eri tia kini, Mi mu, ma zia la!

³E’yo ’disi eri nga mu ra, nga fi anya vile lozu ’ba anya lopi ’diyi ma vutia; isu drilebasi eri fi amvu nde ma esele ovupi Boazi ori’ba Elimelekini vileri ma alia.

⁴Azini mi ndre, Boazi nga enga Betelehemua; nga ’yo ’ba anya lopi ’diyi ma tia kini, Yehova ma ovu emi be! Yi ngae’yo omvi kini, Yehova ma fe mi dri asi ndriza fo!

⁵Boazi nga di zi ati’bo erini ’bale ’ba anya lopi ’diyi ma driliari ma tia kini, Za ’diri a’dini ya?

⁶Ati’bo ’ba anya lopi ’diyi ma driliari nga e’yoni omvi, ’yo ra kini, Zamva nderi zamva Moabu ezoru emvipi Naomi be Moabuasiri’i.

⁷Eri a’i te kini, Mi fe, ma zi mi tia, ma ma lo anya vile, ma ma oku ’ba anya lopi ’diyi ma vutia anya eselia ’da. Ka’dinile eri emu ra, eri ovu ’dani engazu o’bitisi ecazu kpere curu’do, pe lu eri ovu joa etu were.

⁸Boazi nga di ’yo Rutu ma tia, Mi eri ku ya, ma zi la! Mi ma mu anya vile lo amvu azinia ku, mi ma fu ’doarisi ku, te mi ma ovu ’dani ’dia ezoanzi mani be ogogo.

⁹Mi ma ’ba mi mile amvu ’bani loleri vu, mi mu yi vutia. Ma azi te karile ma tia, ma elo mi rua kuri ku ya? Mi ka vini ovu yi avijosi, mi ma mu imvu vu ’dale, afa karileni koleri mvu’i.

¹⁰Ka’dinile eri nga i eco o’bukuru va, nga i o’bu nyakua ra, nga ’yo tinia, Ma isu asi ndriza ’diri mi milia a’disi ya, mini ma amaria, de isu ma juruni fo?

¹¹Boazi nga di e’yo omvi tinia ’dini kini, ’Ba ece ma dri e’yo dria mini ’yele mi edri vu engazu etu mi agupini drazurisi ’diyi ra, e’yo mini mi ati pi kuzu mi andri be, mi vile anguri pie, mini ecazu ’ba mini oku nile ku ’diyi vu.

¹²Yehova ma omvi azi mini ma arotini, Yehova Mungu Israelini mini ecale vunia mi ta mbazu opileni ma etiari ma fe mi dri orodri tre fo!

¹³Eri nga ’yo ra, Mi ma fe ma ma isu asi ndriza mi milia, opi mani, mini ma asi omile rarisi, azini mini e’yoni ’yole yikisi ati’bo mini ma tiarisi, ka tro ma ovuni ekile ezoanzi mini ma azile ku ti.

¹⁴Te ’bani nyaka nyaria, Boazi nga ’yo tinia, Mi emu ’doa, mi nya nyaka ’dori, mi du enya mini otule ’bori tibia indio ’Dini eri ri di ’ba anya lopi ’diyi ma ageia; yi nga akarafi fe drinia, eri nga nya ra, tra ra, ku di azini ci.

¹⁵Eri ka enga fu amve anya vile lozu ’bo, Boazi nga e’yoni azi karile erini ma tia kini, Emi ma fe eri ma lo anya eti ombele tualuri ma eselia, emi ma otre drinia ku.

¹⁶Dika emi nze anya emini ombele ngulu ngulu ’diri ma esele azini, ku eri dri ci, emi ma fe eri ma lo anya vile ra, ma ega drinia ku.

¹⁷Eri nga ani anya vile lo amvua kpere ondresi; eri nga anya ini loleri co ra, isu de eri ondu efifiru abaka alu tre.

¹⁸Eri nga ’du ji fi aku amborua; edri erini nga anya erini loleri ndre; eri nga nyaka te erini trazu ’bori ma joloko ofu ra, fe edri dri indio

¹⁹Edri nga ’yo tinia, Mi lo anya vile andru ngoa ya? Mi i nga azi ngoa ya? Awa’difo ’ba mi amapiri dri. Eri nga ani ’ba erini azi ngazu vuniari ma e’yo olu i ma edri tia kini, Amvu e’i mani azi ngazu andruri ma ru Boazi’i.

²⁰Naomi nga ’yo i edri ma tia, Yehova ma fe asi ndriza eri dri, erini ovule yiki be ’dani ’ba idriru ’diyi pi vu ’ba drapi ’bo ’diyi berisi. Naomi nga vini ’yo eri tia, Agu nde ovu ori’ba amani ma azi, eri ovu ’ba amani ogogori.

²¹Rutu Moabu ezoruri nga ’yo ra, Ada eri ’yo ma tia kini, Mi ma te karile mani vu ogogo de nga yi deni anya loza mani dria ku.

²²Naomi nga ’yo Rutu i edri ma tia, Eri i onyiru tu, ma zia, mi ma fu ezoanzil erini be, yi ma isu mi ’ba azini ma amvua anya vile lozu ku.

²³Ka’dinile eri te ezoanzi Boazini be, ogogo ’dani, anya vile lozu de nga ’ba loni ondu de dria nganu be ku eri nga ovu i edri be ’dani.