Read lugbara Rutu 3 Bible Online

Rutu 3 - lugbara bible

Rutu 3

¹Naomi edri erini nga ’yo eri tia, Ma zia, ma ma nda pari mini ava lizuri, e’yo mini ma ovu ani onyiru beni ku ya?

²Te Boazi nde mini muzu ezoanzi erini ma eseliari eri ori’ba amani yo ya? Mi ndre, andru ini ’disi eri ondu co akuma dria.

³Ka’dini mi mu mi rua oji ra, mi efi mi rua odusi, mi su bongo mini, mi si akuma dria; te mi ma ece mi agu nde dri ku de nga eri deni nyaka nyaza, afa mvuza be ku.

⁴Te eri nga eca ’dini, eri ka la ’bo, mi nga pari erini lazuri ndre kaka; mi di nga fi bongo eri ma paari zi lazu va; eri nga e’yo mini ngale ’yeleri olu mi tia.

⁵Eri nga e’yo omvi tinia, E’yo dria mini ’yoleri ma nga ’ye ra.

⁶Eri nga di si akuma dria ani, nga e’yo dria i ma edrini azileri ’ye ra.

⁷Boazi ka nya de ’bo, ka mvu fudri indi, eri ma asi ka ovu ayikosi, eri mu la va anya okuleri ma kalaa. Ka’dinile eri nga mu e’yere bongo paniri zi, lazu va.

⁸Eri nga eca ’dini, iniayii agu nde nga ga ci urisi, nga i oja ra, azini mi ndre, oku la va eri ma paaleru

⁹Eri nga ’yo ra, Mi a’di’i ya? Eri nga e’yo omvi, Ma ati’bo mini Rutu’i; mi ma ’be mi bongo ati’bo mini ma dria, mini lovule ori’ba ogogonirisi.

¹⁰Eri ’yo ra, Yehova ma fe mi dri asi ndriza, ma zia la! Mi ece yiki mini curu’do aga mini ecele okori dria ra, mini karile, kani alioru kani afa e’iro, ma vuti bile kurisi.

¹¹Te di, ma zia la, mi ma ru ku; ma nga mi dri e’yo mini ’yoleri ’ye dria ra; a’disiku ’ba amani aku amboru ma alia ’diyi dria yi ni ra mi ovu oku acipi kililiruri.

¹²Adaru ma ovu ori’ba mini ovupi mi be ogogori ra ’bo, te di, ’ba azini ovupi ogogo to ma agapi rari indio

¹³Mi ma te ’doa ini ’dorisi, o’bitisi eri nga ovu ’dini, agu nde ka le ini azi ori’baniri nga mi dri, onyiru; eri ma nga azi nde ori’baniri ra; te eri ka le azi ori’baniri nga mi dri ku, ekile Yehovani ovule idri berile, ma nga azi nde ori’baniri nga mi dri ma’i, Mi la va kpere o’bitisi.

¹⁴Ka’dinile eri la eri ma paaleru kpere o’bitisi, te eri enga drio de nga ’ba econi yi agyi nizaru ’di a’di’i yari ku; te eri ’yo ra, ’Ba ma ni kini oku emu teakumadriara, ’diniku.

¹⁵Eri ’yo ra, Mi ma eji bongo ’beza mini ogogo, mi bi tini ci, Eri nga eri bi ra, eri o’bi eri dri ondu afazu azia fe drinia; eri nga di mvi aku amborua ndo,

¹⁶Eri ka mvi edri vu ’bo, edri ’yo ra, E’yo ngoni ya, ma zia 1a? Eri nga ani e’yo dria agu ndeni ’yele eri beri ece.

¹⁷Eri ’yo vini indi, Eri fe ma dri ondu afazu azia ’doyi, a’disiku eri ’yo ra, Mi ma mvi mi edri vu pirini ku.

¹⁸Eri nga ’yo ani, Mi ri nga e’yere, ma zia la, de nga mi nini e’yo nga i de ngoni yari ku, a’disiku agu nde ngani avami ku de nga deni e’yo dria andru ku.