Read lugbara 1 Samueli 12 Bible Online

1 Samueli 12 - lugbara bible

1 Samueli 12

¹Te Samueli ’yo Israeli tia dria, Emi ne, ma eri o’duko emini e’yo dria emini ’yole ma tia ’diyisi ra, ma ’ba opi emi drilia ’bo.

²Te emi ne, curu’do opi nderi aci emi drilia; te ma ovu curu’do mbazauni ozoforo be, te emi ne, anzi mani ’diyi yi ovu emi be; te ma aci emi drilia engazu mani ovuria mvaru ecazu kpere andru.

³Ma ’do; emi nze e’yo ma ruaa Yehova ma milia, azini ’ba erini odu osule driniari ma drilia indio Ma ’du a’di ma ti ya? Karri ma ’du a’di ma akanya ya? Kani ma ole, a’di ma silingi lokirisi ya? ’Ba mani ’yele onziri a’di’i ya? Kani ma ’du afa ’ba ti razuri a’di dria ya, ’dini mani ma mile obizu ani? Ma nga eri omvi emi dri.

⁴Te yi omvi e’yo kini, Mi oleni silingi amani lokirisi ku, mi ’yeni ama onzi ku, indi vini mi ’duni afa ’ba aluni ma dria ku.

⁵Eri ’yo ’yi ma tia kini, Yehovani ’ba e’yo eti nzepi emi ruaari’i, azini ’ba erini odu osule driniari ovu vini ’ba e’yo eti nzepi emi ruaa etu andrurisiri’i, kini emi isuni e’yo ma dria ku. Te yi omvi e’yo kini, Eri ovu ’ba e’yo eti nzepiri’i.

⁶Samueli nga di ’yo ’ba nde ’diyi ma tia kini, Eri Yehova’i, ndra Musa pi opepi Aroni be, emi a’bipi ejipi uru engazu angu Misiriniasiri’i.

⁷E’yo ’disi curu’do emi oso pa ciri, ’dini ma ma ’ba matu emi vu Yehova ma milia, ’yeta dria alatararu Yehovanisi, erini ’yele emi vu azini a’bipi emini vu ’diyi ma e’yosi.

⁸Yakoboni ndra emuria Misiria, emi a’bipini ndra owuzu Yehova vurisi, Yehova pe ndra ani Musa pi ma ti Aroni be, yi emi a’bipi ofupi Misiriasi fepi yini adrizu angu ’doria ’diyi.

⁹Azini yi ma dri avi ndra Yehova Mungu yinisi; te eri fe yi Sisera ambo asikari ongulumuru Hazorini ’diyi ma driliari dria, azini ’ba Filisitiaa ’diyi ma dria, azini opi Moabuari ma dria; yi ’di a’di yi pie.

¹⁰Te yi wu Yehova vu kini, Ama eza ra, a’disiku amani Yehovani kule, azini Baali pi inzile Asitaroti be’irisi; te curu’do mi opa ama ari’ba amani ma dria, ama nga azi nga mi dri ani beni.

¹¹Te Yehova pe Yerubaali pi ma ti Bedani pie, Yefita pie, Samueli pie, opa emi ari’ba emini ’diyi ma dria emi kalaasi dria; te emiruni, emi ri ndra ovu e’yo ’yaasi.

¹²Te emini Nahasi opi Amonini ndreria emuria ombasi emi vu, emi ’yo ma tia kini, Yo, te opi ma nya angu ama driliani, de isu Yehova Mungu eminiri ovu opiru emi driliani.

¹³Te curu’do emi ndre nga opi emini peleri, emini a’ileri; emi ne, Yehova ’ba opi emi drilia ’bo.

¹⁴Emi ka nga Yehovani ru, azi ngazu eri dri, o’duko erini erizu, emi ka nga mbu azita Yehovaniri vusi amve ku, emi ka nga Yehova Mungu emini ma vuti bi, opi angu nyapi emi driliari pie, eri nga ovu onyiru;

¹⁵te emi ka nga o’duko Yehovani eri ku, te emi ka nga mbu azita Yehovaniri vusi amve, ka’dini dri Yehovani nga a’di ’di emi be, ekile ndra emi atapi berile.

¹⁶E’yo ’disi curu’do emi so pa, emi ndre e’yo amboru Yehovani ngale ’yele emi miliari.

¹⁷Andru ovuni o’du nga nu lozuri ku ya? Ma nga Yehovani omve, eri nga angu noza ma upe ozoo be; ’dini emi ma ni, azini ne, e’yo onzi emini, emini ’yele Yehova ma milia emini opi a’izurisiri ovu ambo.

¹⁸’Dini Samueli omve Yehovani ra, te Yehova efe angu noza pi ozoo be o’du ndesi; te ’ba dria yi, ru Yehovani tu, Samuelini indi.

¹⁹Azini ’ba dria ’yo Samueli ma tia kini, Mi zi ati’ba mini ’diyisi Yehova Mungu miniri ma tia, ’dini ama ma odra ku beni; a’disiku ama o’ba e’yo onzi ’diri, amani opi a’ilerisi, onzi amani dria ’diyi ma dria ra.

²⁰Te Samueli ’yo ’ba ’diyi ma tia kini, Emi ru ku; emi ’ye e’yo onzi ’diyi dria ra, te kiri emi ma oja emi Yehova ma vuti bikokoru ku, te emi nga azi Yehova dri asi driasi;

²¹azini emi ma oja emi kalaa e’yo toko toko ’diyi ecopi ’ba aza kopi ku, ’ba papi ku ’diyi ma vuti bizu ku, a’disiku yi ovu toko.

²²A’disiku Yehova ngani ’ba ini yi ku ku, ru erini amboruri ma e’yosi, a’disiku eri ndra onyiru Yehova ma milia emi ’bazu ’ba ini ’diyiru.

²³Te ma’i, econi mani e’yo onzi ’yezu, kuzu Yehovani zizu emisiri jani aluni ku; te ma nga emi dri geri onyiru azini kililiru imba’i.

²⁴Emi ru lu Yehovani, azini emi ma inzi eri e’yo ada ma alia, emi asi driasi; te emi ma ega e’yo amboru erini ’yele emi dri ’bo ’diyi ma e’yo’i.

²⁵Te emi ka nga e’yo onzi ’ye ’dani, emi nga ovu dri jazaru ra, opi emini pie.