Read lugbara 1 Samueli 13 Bible Online

1 Samueli 13 - lugbara bible

1 Samueli 13

¹Sauloni e’dozu opi nyazurisi, eli erini ca de si ’ dapi ’bo; eri nya opi ’ba Israelini ma drilia eli si dapi.

²Saulo ope ini Israeli ma eselia ’ba alifu na; alifu iri ’diyi ovu Saulo be Mikimasia azini oni Betelia, te alifu alu ovu Yonatani be Gibea Benyamininiria; te ’ba joloko acepi ’diyi alu alu, eri pe yi ma ti muzu hema yinia.

³Te Yonatani ofu asikari Filisitiaa ndra adripi Gebaa ’diyi; azini ’ba Filisitiaa ’diyi yi eri e’yo nderi ra. Te Saulo vu guka angu ndea dria, kini, ’Ba Ebraniani ma eri.

⁴Te Israeli dria eri kini Saulo ofu asikari Filisitiaa ’diyi ’bo, azini ’ba Filisitiaa ’diyi ngu Israeli onzi ani. Te yi omve ’ba ongulumuru yi okuzu Saulo vu Giligalia.

⁵Te ’ba Filisitiaa ’diyi oku yi tualu a’di ’dizu Israeli be, gari ombani alifu kali na, ’ba nzupi lakanya dria ’diyi alifu azia, azini ’ba ongulumuru ekile cinya miri tiarile; yi etu ra, yi aso hema yini Mikimasia, engazu Betavenia etuni efurialeruria.

⁶’Ba Israelini yini ndreria yi ovu pari ewaruria (a’disiku ’ba ’diyi ovu taisi tu), yi nga di yi ozi oni ojia, azini asea, azini kata alia, azini yi gule alia,

⁷te ’ba Ebraniani azini ’diyi zo Yoridania ’aa’dasi angu Gadinia azini Gileadia. Te Saulo ovu nga Giligalia, ’ba dria bi vutini rua yaza be.

⁸Eri te ’daa o’du aziri, ekile ndra Samuelini pelerile; te Samueli ecani Giligalia ku, te ’ba ere yi eri ageiasi ra.

⁹Te Saulo ’yo ra, Emi eji edeta vezaruri ma vu ’doa, azini edeta asi anzuni ’diyi indio Te eri nga edeta vezaru nderi ve.

¹⁰Eri nga eca ’dini, coti erini edeta vezaru vezu dezu ’boria, mi ne, Samueli nga eca ra; te Saulo nga fu mu dri fuzu eri be, zita fezu eri dri.

¹¹Te Samueli ’yo ra, Mi ’ye a’dini ya? Te Saulo ’yo ra kini, A’disiku ma ndre ’ba ere yi ma ageiarisi ra, azini mi ecani o’du peleri ma alia ku, azini ’ba Filisitiaa ’diyi oku yi tualu Mikimasia ’bo,

¹²e’yo ’disi ma ’yo kini, ’Ba Filisitiaa ’diyi yi nga emu va ma vu Giligalia, te ma zini nga Yehovani asi ndriza fezu ku; e’yo ’disi ma omi ma asi okporu, ma ede edeta vezaru nderi ani.

¹³Te Samueli ’yo Saulo ma tia, Mi ’ye ekile ’ba ondua kokorurile; mi mbani azita Yehova Mungu minirini azile mi tiari ma ta ku; te’do isu Yehova edre suru nyaza mini Israeli ma driliari ’dani ’dani ’bo.

¹⁴Te curu’do suru nyaza ’miniri ngani ovu ’dani ku; Yehova ndru ’ba i asini lele turi ’bo, azini Yehova pe eri ovuzu opiru ’ba ini drilia ’bo, a’disiku mi mbani azita Yehovani azile mi tiari ma ta ku.

¹⁵Samueli enga ra, eri tu uru engazu Giligalia muzu Gibea Benyamininiria. Saulo la ’ba ovupi eri be ’diyi ma kalafe ra, yi ekile ’ba turu aziale.

¹⁶Te Saulo pi i mvi Yonatani pie, ’ba ovupi yi be ’diyi pie, yi adri Gibea Benyamininiria; te ’ba Filisitiaa ’diyi yi aso hema Mikimasia.

¹⁷Te ’ba angu ezapi ’diyi efu pari ’ba Filisitiaa ’diyini rizuriasi ongulumu na; ongulumu aluri oja yi muzu geri Ofiraasi, kpere Sualia,

¹⁸te ongulumu aziniri oja yi muzu geri Beti-horoniasi, te ongulumu aziniri oja yi muzu geri angu ma lokiriasi, pari ’bani luzu va e’bu Zeboimuni angu roko vuleruriasi.

¹⁹Te ’ba oka dipiri aluni ovuni de angu dria Israelini ma alia ku; a’disiku ’ba Filisitiaa ’diyi ’yo ra, ’Ba Ebraniani yi kazu sei pi dizu aju pie ku;

²⁰te ’ba Israelini dria alu alu si va ’ba Filisitiaa ’diyi vu, aya si be nyaku lipi yiniri pi ejizu okaa, e’bu pie, ogara pie, ngule pie;

²¹te yi ovu aya afa si ejizuri be ngule pi ma si ejizu, e’bu pie, aya si be treri pie, ogara pie, azini afa si be ndri ndri ti drozuri pie.

²²Te eri nga eca o’du ombanirisi ’dini, yi isuni sei kani aju ’ba ovupi Saulo pi vu Yonatani be ’diyi ma dria ku; te Saulo pi mvi Yonatani be ovu yi be.

²³Te asikari ongulumuru ’ba Filisitiaa ’diyi vile yi fu pari agazu Mikimasiasiria.