Read lugbara 1 Samueli 15 Bible Online

1 Samueli 15 - lugbara bible

1 Samueli 15

¹Te Samueli ’yo Saulo ma tia, Yehova epe ma ti emuzu odu osuzu mi dria ovuzu opiru ’ba ini Israeli ma drilia; ka’dini curu’do mi ma co bile e’yo Yehovani erizu.

²Yehova asikari ongulumuruni ’yo ’dini, Ma ndre afa ’ba Amalekini ’yele ’ba Israelini vu ’diyi dria ’bo, yini ndra yi ma geri ogazu yini ndra efuzu Misiriarisi.

³Curu’do emi mu ’ba Amalekini yi ofuzu, emi eza afa dria yini ovuzu yi be ’diyi teketeke; emi ku yi ku, te emi ofu agupi, oku pie, odekua nga ba ndrupi ndru ’diyi pie, ti kabilo pie, ngamia akanya, gaari pie dria.

⁴Saulo omve ’ba dria tualu, eri la yi ma kalafe Telaimua, asikari pasi ’diyi alifu turu iri, azini ’ba Yudani ’diyi alifu mudri,

⁵Te Saulo emu aku amboru Amalekinia, emu i zizu yi tezu e’bua.

⁶Dika Saulo ’yo ’ba Kenini ma tia, Emi mu, emi ku angu ’diri, emi si va ’ba Amalekinima eseliarisi ra, ma kazu emi dri jazu yi pie ku; a’disiku emi ece ndra asi ndriza ’ba Israelini dri, yini efuria Misiriarisi ra. ’Dinile ’ba Kenini fu ’ba Amalekini ma eseliarisi ra.

⁷Te Saulo ofu ’ba Amalekini engazu Havilaa kpere geri tuzu Suri ovupi Misirialeruria,

⁸Azini eri bi Agagi opi ’ba Amalekiari idriru, te eri oli ’ba dria ’dale ’diyi seisi teketeke ra.

⁹Te Saulo pi ’ba nde ’diyi pie, yi ku Agagi pi idriru, kabilo onyiru ’agapi tu ’diyi pie, ti pie, anyapa a’buzaru ’diyi pie, kabilo anzi pie, afa dria ovupi onyiru ’diyi pie dria, a’ini yi dri jazu teketeke ku; te afa dria onzikanyaru ’bani ’bale aparakaru ’diyi pie, ja yi dri teketeke ra.

¹⁰E’yo Yehovani nga eca Samueli vu kini,

¹¹Ma asi ovu candisi mani ndra Sauloni ’bale ovuzu opirurisi ra; a’disiku eri asi mvi vile, eri ku ma vuti bizu ja azini eri ’yeni azita mani ’diyi ku. Te Samueli ovu aokosi, ’dini eri wu ani Yehova vu i ini be rra.

¹²Te Samueli nga enga o’bitisi drio drio dri fuzu Saulo be; te ’yo Samueli tia kini, Saulo emu Karimelia ra, te mi lu, eri edre i dri afa egata fepiri, eri oja i, eri aga drile, eri si muzu Giligalia.

¹³Te Samueli emu Saulo vu, azini Saulo ’yo eri ma tia, Yehova ma fe mi dri asi ndriza; ma ’ye azita Yehovani azileri ’bo.

¹⁴Te Samueli ’yo, Afa owupi ma bilia kabilole, azini ti; awule, eri a’dini ya?

¹⁵Te Saulo ’yo ra, Yi eji yi engazu Amalekia; a’disiku ’ba nde ’diyi yi ku kabilo onyiru agapi tu ’diyi azini ti ovupi onyiru tu ’diyi pie, fezu edetaru Yehova Mungu mini dri; azini acepi ’diyi ama ofu dria teketeke ra.

¹⁶Samueli nga di ’yo Saulo ma tia, Mi te nga! te ma nga mi dri e’yo Yehovani ’yole ma tia ini ’dorisi ’diyi olu. Te eri ’yo eri tia, Mi ’yo,

¹⁷Samueli ’yo ra, Mini ndra ovuria were mi ngulupi ma milia ti, ’bani mi suruti Israelini ma drilia ku ya? Yehova osu odu mi dria ovuze opiru Israeli ma drilia.

¹⁸Azinii Yehova pe mi ti acizu, eri ’yo, Mi mu, mi ja ’ba onzi ’ba Amalekini ’diyi ma dri teketeke, azini mi ’di a’di yi be kpere yi ma dri jazu dria.

¹⁹Ka’dini mi erini o’duko Yehovani ku a’disi ya? Te mi afi afa mini opaleri ma driasi rii, mi ’ye e’yo ovupi Yehova ma milia onziri a’di e’yosi ya?

²⁰Te Saulo ’yo Samueli ma tia kini, Ada ma inzi o’duko Yehovani ra, ma mu geri Yehovani ma ti pezuria, ma eji vini opi Amalekini Agagini ra, te ma ja ’ba Amalekini ’diyi ma dri teketeke ra.

²¹Te ’ba ode ’diyi yi o’du afa opale ’diyi, kabilo pi ranya pie, yi afa opele dri jazaru ’diyi ma esele onyiru agapi ra ’diyi, afa ’diyi edezu edetaru Yehova Mungu mini dri Giligalia.

²²Te Samueli kini, Mi milia Yehova ovu ayiko be afa ’bani vele azini edele edetaru ’diyisi tro tro ekile ’bani o’duko Yehovani erizurisirile ra ya? Mi ne, o’duko inzizuri eri onyiru aga edeta edezuri ra, azini bile cozu aga ranya oso ra.

²³Gazu e’yo eriko siri ovu ekile azi onzi ’ba rozu olesirile, azini ovuzu asi ambosiri ovu tro tro ezatale azini wura toko inzizurile. Mini Yehova ma o’duko gale sirisi, eri ga vini alu mi ovuzu opiru si ’bo.

²⁴Te Saulo ’yo Samueli tia, Ma eza ra; mani azita Yehovani pi ezale e’yo ’yoza mini be, mani ’ba rulerisi, azini mani o’duko yini erile’irisi.

²⁵’Dini curu’do ma matu ’ba mi vu, Mi zi onzi mani ra, ama ma mvi mi be tualu dika, ma ma inzi Yehovani beni.

²⁶Te Samueli ’yo Saulo ma tia, Ma ngani mvi mi be ku; a’disiku mini e’yo Yehovani gale sirisi, azini Yehova ga vini alu mi ovuzu opi Israeliniru si ’bo.

²⁷Samuelinii ojaria muzu, Saulo bi eri ma bongo ci, asi i ra.

²⁸Te Samueli ’yo eri ma tia kini, Yehova asi suru Israelini mi driasi andru, fe eri ’ba mi ageia ovupi onyiru mi agapi rari dri ’bo.

²⁹Azini Okpo Israeliniri ngani inzo li ke, ngani vini i asi oja ku indi; la’disiku eri ovuni ’bani ku, erini asi ’ojazu.

³⁰Dika eri ’yo ra, Ma eza ra; te ti, mi fe nga ma dri inzita, ma matu ’ba mi vu, ’ba ’wara suru manini ’diyi ma milia azini Israeli ma milia indi, azini ama ma mvi mi be tualu dika, ma ma inzi Yehova Mungu miniri ani beni.

³¹’Dini Samueli oja i muzu Saulo vutia; te Saulo inzi Yehovani.

³²Samueli nga di ’yo kini, Emi eji Agagi opi ’ba Amalekini ’doa. Te Agagi emu eri vu, ayikosi. Te Agagi kini, Ndi dra ma candi okaruri aga ’bo.

³³Te Samueli ’yo ra, Ekile sei minirini fele okuni ovuzu anzi kokorule, ’dinile mi andrini nga ovu mva kokoru oku ma eselia. ’Dini Samueli oga Agagini ndu ndu Yehova ma milia Giligalia.

³⁴Samueli nga di mu Ramaa; azini Saulo tu uru i vile joa Gibea Sauloniria.

³⁵Te Samueli emuni Sauloni ndrezu dika ku kpere o’du erini drazuria, te Samueli wu Saulosi ra. Te Yehova ma asi ovu candisi erini ndra Sauloni ’bale ovuzu opiru ’ba Israelini ma driliarisi.