Read lugbara 1 Samueli 18 Bible Online

1 Samueli 18 - lugbara bible

1 Samueli 18

¹Te eri nga eca ’dini, eri ka e’yo ’yo Saulo be ’bo, asi Yonatanini pi eci i Daudiniri be tualu, azini Yonatani le eri ekile ini i ma ngulupi lelerile.

²Saulo ’du di eri o’du ’dasi, eri kuni eri ma mvi di i ati vile akua dika ku.

³Yonatani pi nga di aziza azi Daudi be, a’disiku eri le eri ekile ini i ma ngulupi lelerile.

⁴Te Yonatani tru kanzu ovupi i ma ruaari, fe eri Daudi dri, afa suza ombani ayaru ’diyi pie, sei pie, osu pie, afa erini i ma opile adizuri pie.

⁵Te Daudi fu mu pari dria Sauloni tini pezuria, e’yo ’yezu dria onduasi; te Saulo ’ba eri ’ba ombaa ’diyi ma drilia, azini e’yo nde ovu onyiru ’ba dria ma milia, azini ati’ba Sauloni ’diyi ma milia indi.

⁶Eri nga eca ’dini yini emuria, Daudini emviria engazu ’ba Filisitiaa ’diyi ofuzuriasi, oku yi efu aku dria Israelini ’diyi vusi, yi emu ayikosi dri fuzu opi Saulo be, ongo ngoza be ongo tuza pie, arimva ’diyi pisi, ayiko pie, afa o’di cozu ’diyi be.

⁷Oku nde ’diyi yi ngo yi eselia yini o’di cozuria kini, Saulo ofu ini alifule, Te Daudi ofu ini alifu mudrile.

⁸Te Saulo ovu adrasi, e’yo ’yoza ’diri fe eri dri asi onzi; te eri ’yo ra kini, Kini Daudini alifu mudrile, azini mani alifule a’dule; azini erini a’dini ya pe lu opi nyazani?

⁹Te Saulo su mile Daudi ma ruaa engazu o’du ’dasi kpere drile.

¹⁰Eri nga eca drusi ’dini, orindi onzi engapi Mungu vuri eca Saulo ma dria okporu, fe eri azazu saaru jo alia; te Daudi co o’di i ma drisi ekile erini adrile ’yele etu vusirile. Isu de Saulo ma dria aju indi.

¹¹Te Saulo ’di aju nderi ra; a’disiku eri ’yo ra, Ma nga Daudini ’di abi ruaa ani. Te Daudi ona i paleko iri.

¹²Te Saulo ovu Daudisi urisi a’disiku Yehovani ovule eri berisi, azini erini Sauloni kule rarisi.

¹³’Dini Saulo dro eri i ma ageiasi fa, ’ba eri asikari alifu alu ma drilia; ’dini eri fu azini eri efi ’ba dria ma milia.

¹⁴Te Daudi ’ye e’yo dria onduasi geri inia dria; azini Yehova ovu eri be.

¹⁵Te Saulo ka ndre eri e’yo dria ’ye onduasi, eri ovu erisi urisi,

¹⁶Te ’ba Israelini dria azini ’ba Yudani ’diyi dria yi le Daudini; a’disiku eri fu amve azini efi yi ma milia.

¹⁷Te Saulo ’yo Daudi ma tia, Mi i ne, ma zi osipi okori Merabu’i; ma nga eri fe mi dri okuru; mi ma adri kiri asi teza be ma dri, a’di Yehovani ’dizu. Te Saulo ’yo ra, Ma ngani ma dri ’ba eri ma ruaa ku, te ’ba Filisitiaa ’diyi nga dri ’ba eri ma ruaani.

¹⁸Te Daudi ’yo Saulo ma ria, Ma a’dini ya, kani ori’ba ma atini Israeli ma eselia a’dini ya, mani ovuzu opi zi ma agupiru?

¹⁹Te eri nga eca etu yini ’yezu Merabu Saulo ma zini fezu Daudi dririsi, fe eri Adrieli ’ba Meholatini dri okuru.

²⁰Te Mikali, Saulo zi, le Daudini ra; yi olu e’yoni Sauloni ra, te e’yo nde ovu eri ma milia onyiru.

²¹Saulo ’yo ra, Ma nga eri fe erini ra, ’dini ma ovu embaru eri dri beni, azini ’ba Filisitiaa ’diyi ma dri ma ovu eri ma ruaa beni. E’yo ’disi Saulo ’yo Daudi ma tia pale irisi kini, Andru mi nga ovu ma zi be.

²²Te Saulo azi ati’ba erini ’diyi ria kini, Emi ndro e’yo Daudi be, emi ’yo, Mi ne, opi ovu ayikosi mi e’yosi, azini ati’ba erini ’diyi dria yi le mi ra; e’yo ’disi curu’do mi ma ovu opi zi ma agupiru.

²³Te ati’ba Sauloni ’diyi yi olu e’yo ’diyi Daudi ma bilia ra. Te Daudi ’yo, Ovuzu opi zi ma agupiru e’da emini e’yo wereru ya; mi ne, ma alioni, ru mani kuni ku.

²⁴Te ati’ba Sauloni olu eri ma tia kini, Daudi ’yo e’yo ’dinile.

²⁵Te Saulo ’yo ra, Emi ma ’yo Daudi ma tia ’dini, Opi leni lenyi ku, te agele ma enyi drile ’ba Filisitiaa ’diyi ma ruaa ’diyi turu alu, ’dini ari’ba opini ma arioti ofezu, Te Saulo le de Daudini fe e’dezu ’ba Filisitiaa ’diyi ma dria.

²⁶Te ati’ba erini ka e’yo ’diyi olu Daudi tia ’bo, eri ovu onyiru tu Daudi ma milia ovuzu opi zi ma agupiru. De nga o’du nde ’diyi deni yi ku,

²⁷Daudi enga ra, eri mu ra, eri’i ’ba ini pie, yi ofu ’ba Filisitiaa ’diyi turu iri; te Daudi eji agele drile yini ma enyi, fe vini yi dria opi dri, ’dini eri ma ovu opi zi ma agupiru ani. Te Saulo fe i zi Mikalini eri dri okuru,

²⁸Te Saulo ne, eri ni kini Yehova ovu Daudi be, azini Mikali Saulo ma zi le eri ra.

²⁹’Dini Saulo nga kiri ’ye Daudisi urisi; te Saulo ovu ari’bo Daudiniru’dani.

³⁰Opianzi Filisitiaa ’diyi efu ra, eri nga eca ’dini, o’du dria yini efuzuria, Daudi ’ye e’yo onduasi ga ati’ba Sauloni ’diyi dria ra; ’dini ru erini ku tu ani.