Read lugbara 1 Samueli 21 Bible Online

1 Samueli 21 - lugbara bible

1 Samueli 21

¹Daudi emu di Nobua, Ahimeleki atalau edeta edepi ri vu; te Ahimeleki emu dri fuzu Daudi be rua yaza be, ’yo eri ma ti, Mi a’dule, ’ba azini mi be yo ’dini a’di e’yosi ya?

²Te Daudi ’yo Ahimeleki atalau edeta edepiri ma tia, Opi azi ma tia azi ma e’yo, eri ’yo ma tia, Mi fe ’ba azini ma ni azi mani mi ti pezuri ma e’yo, azini e’yo mani azile mi tiari ku. Te ma ope karile ovuzu pari ’dinile ’diyi ma alia.

³Curu’do, mi dria a’di afani ya? Mi fe ma dri enya olemi towi mi dria, kani afa ngonini ti ovupi indiri.

⁴Te atalau edeta edepiri omvi e’yo Daudi ma tia, kini, Ma ovuni enya olemi tokoni be ma dria ku, pe kiri mikate alatararuri; te kiri karile ka yi eka oku be ku.

⁵Daudi omvi e’yo atalau edeta edepiri ma tia, ’yo eri tia kini, Adaru, oku yi ovuni ama be o’du na ’diyi ma alia ku, afazu karile nde ’diyini yi adri ovu alaru acita amani toko ’diyisi; ka’dini andru afazu yini yi ngani ovu alatararu aga ra ku ya?

⁶’Dini atalau edeta edepiri fe di eri dri mikate alatararuri, mikate azini de ’daa yo pe lu mikate ecetaruri ’bani ’dule jile Yehova ma driliasi ra ’yini mikate drizaru ’bazu eri ma paria o’du ’bani eri ’duzurisiri’i.

⁷Isu de agu alu ati’ba Sauloni ’diyi ma eseliari indi o’du ’dasi, oga eri Yehova ma milia ’dia; eri ma ru Doegi’i, eri ’ba Edomuari, eri ambo ’ba anyapa Saulo vile ’diyi ocepi ’diyi ma eseliari’i.

⁸Te Daudi ’yo Ahimeleki ma tia, Aju azini sei mi dria ’dia yo ya? A’disiku ma ezini sei maniri azini afa ombani mani ’diyi ku, a’disiku azi opiniri le pere pereni.

⁹Te atalau edeta edepi nderi ’yo ra, Sei Goliato ’ba Filisitiaa, ndra mini fule e’bu Elaari ma aliarini, mi ne, eri ’doa ombezaru bongosi efodi ma ngukua; mi ka le eri ’du, mi ’du, a’disiku azini ’doa yo, lu ’di’i. Te Daudi ’yo ra, Azini ’dileni yo, mi efe eri ma dri.

¹⁰Daudi enga ra, apa ra o’du ’dasi Saulo ma urisi, eri mu Akisi opi Gatuari vu.

¹¹Te ati’ba Akisini ’yo eri ma tia, Daudi ’diri ovuni opi angu ’doriari ku ya? Yi ngoni ndra ongo yi eselia eri dria ku ya, yini ongo turia kini, Saulo fu ini alifule, Te Daudi fu ini alifu mudrile?

¹²’Dini Daudi ’ba e’yo ’diyi i ma asia, eri ovu urisi tu opi Gatuni Akisi ma e’yosi.

¹³Te eri oja i ma adriza yi ma milia ra, ’ba i yi ma dria ’ba azazale, eri vi afa kalitile ma ruaa, eri ku i ma cucuni ra i ma tibi ma driasi vale.

¹⁴Akisi nga di ’yo ati’ba ini ’diyi ma tia kini, Emi ne, emi ndre agu ’diri azazani; emi eji di eri ma vu ’doa a’di e’yosi ya?

¹⁵Ma owu ’ba azaza akosi ra ya, emini ani agu ’diri ejizu aza ’yezu ma drilia ’dini? Agu ’diri nga efi ma vile joa ra ya?