Read lugbara 1 Samueli 23 Bible Online

1 Samueli 23 - lugbara bible

1 Samueli 23

¹Te yi olu Daudi tia kini, Mi ne, ’ba Filisitiaa ’diyi ’yi a’di ’di Keila be, azini yi opa afa pari yini anya cozu ’diyi dria.

²E’yo ’disi Daudi zi Yehova tia, kini, Onyiru ma mu ’ba Filisitiaa ’diyi ofuzu ra ya? Te Yehova ’yo Daudi ma tia, Mi mu, mi ofu ’ba Filisitiaa ’diyi, te mi pa Keilani ra.

³’Ba Daudini ’diyi ’yo tinia, Mi ne, ama ’ye urisi Yudaa ’doa; te ama ka mu Keilaa omba ’bazu asikari ongulumuru Filisitiaa ’diyi be, ama ngani ovu urisi aga ra ku ya?

⁴Daudi nga di Yehovani zi dika. Te Yehova omvi e ’yo eri tia kini, Mi enga, mi si Keilaa; ma nga ’ba Filisitiaa ’diyi fe mi dria ra.

⁵’Dini Daudi pi mu Keilaa ’ba erini ’diyi pie, yi ’di a’di ’ba Filisitiaa ’diyi pie, ofu yi azavuru, ace ti yini ji indio ’Dini Daudi opa ’ba Keilaa ’diyi ra.

⁶Te eri eca ’dini, Abiatari Ahimeleki mvi ka apa Daudi vu Keilaa ra, eri esi koti alinari be eri ma dria.

⁷Te yi olu Saulo tia kini, Daudi eca Keilaa ’bo. Azini Saulo ’yo ra, Mungu fe eri ma dria ’bo; a’disiku eri opi i ti ci, erini fizu aku ovupi kalitile be azini afa katalaru ’diyi beri ma aliarisi,

⁸Te Saulo omve ’ba dria tualu a’dia, sizu andra Keilaa, muzu Daudi pi acezu ombasi ’ba erini ’diyi be.

⁹Te Daudi ni e’yo Sauloni e’yo onzi otuzu i ruaari; eri nga ’yo Abiatari atalau edeta edepiri ma tia, Mi eji koti alinari ’doa.

¹⁰Daudi nga di ’yo kini, Yehova Mungu Israeliniri la, adaru ati’bo miniri eri ra kini, Saulo le emu Keilaa aku ’diri ma dri jazu ma ma e’yosi.

¹¹’Ba Keilaa ’diyi nga ma fe eri dri ra ya? Sauloni nga esi ’dole ekile ati’bo minirini erilerile ra ya? Yehova Mungu Israeliniri la, ma matu ’ba mi vu, mi olu ati’bo mini dri fo! Yehova ’yo ra kini, Eri nga esi ra.

¹²Daudi nga di ’yo, ’Ba Keilaa ’diyi nga ma adi fe, ’ba mani ’diyi pie, Saulo ma dria ra ya? Yehova ’yo ra, Yi nga mi adi fe ra.

¹³Daudi pi ’ba erini ’diyi be ekile turu aziale, nga di enga ra fu Keilaarisi ra, yi mu pari yini ecozu muzuria. Azini ’ba olu Saulo tia kini, Daudi apa Keilaarisi ’bo, eri ku efuko ja.

¹⁴Te Daudi adri roko dria pari okporu ’diyia, eri awu angu oniru roko Zifiaria. Te Sauioni adri eri nda o’du dria, te Mungu feni eri eri ma dria ku.

¹⁵Daudi ndre Sauioni emuzu i ndazu fuzu; te Daudi ovu roko Zifinia Horesia.

¹⁶Te Yonatani Saulo mvi enga ra, eri mu Daudi vu Horesia, fe dri mbaza eri dri Mungu alia.

¹⁷Eri ’yo eri ma tia, Mi ru ku; a’disiku dri ma ati Sauloni ngani mi isu ku; te mi nga ovu opiru Israeli ma drilia, azini ma nga ovu mi ma iriru; ma ati Saulo ni e’yo ’di ra.

¹⁸Yi iri tro azi aziza Yehova ma milia ra; te Daudi adri di ini Horesia ’daa, te Yonatani mvi i vile joa.

¹⁹’Ba Zifia ’diyi nga di etu Saulo vu Gibea, kini, Daudi zini i ama be pari okporu Horesia ’diyia, oni Hakilani ovupi Yesimoni ma kala uruleruriaria ku ya?

²⁰E’yo ’disi curu’do, opi la, mi si ekile mi asini lele tu sizu varile; azi amani nga ovu eri fezu opi ma dria.

²¹Te Saulo ’yo ra, Yehova a ’ba asi ndriza emi dria; emini ovule yikisi ma vurisi.

²²Ma matu ’ba emi vu, emi mu, emi ne e’yo kilili dika; emi ni, emi ma ndre pari erini i zizuri, azini ’ba eri ndrepi ’dale ra ’diyi a’di pi ya; a’disiku yi olu ma dri kini, eri ma lokiri tu.

²³E’yo ’disi emi ndre, emi ma ni pari zizaru dria erini ladrizu i ozizu ’diyi, emi ma emu ma vu dika e’yo ada be. Te ma nga mu emi be, eri nga eca ’dini, eri ka ovu angu nderia, ma nga eri ndru ’ba alifu alifu Yudaa ’diyi ma eselia dria.

²⁴Te yi enga ra, yi mu Zifia Saulo ma drilia. Daudi piyi ’ba erini ’diyi pie yi ovu de angu rokoru Maoniaria e’bu Arabaa kala Yesimoni uruleruria.

²⁵Te Saulo pi ’ba erini ’diyi be yi mu eri ndruzu. Te yi olu Daudi tia ra; e’yo ’disi eri esi va kataa oni oji alia, eri adri angu rokoru Maoniria. Saulo ka eri ’dini ’bo, eri dro Daudi ma vuti angu rokoru Maoniri ma alia.

²⁶Te Saulo mu oni ma kala ’dolerisi, azini Daudi mu ’ba ini ’diyi be oni nde ma kalaa ’dalerisi; azini Daudi mu mbele mbele apazu Saulo ma urisi, a’disiku Saulo pi ’ba ini ’diyi be yi ace Daudi pi ’ba erini ’diyi be kurumu yi bizu.

²⁷Te ojio nga emu Saulo vu kini, Mi ’ye mbele mbele, mi emu; a’disiku ’ba Filisitiaa ’diyi yi efi angua ’bo.

²⁸’Dini Saulo ku Daudi ma vuti drozu ja, mvi mu omba ’bazu ’ba Filisitiaa ’diyi be; e’yo ’disi yi omve di angu ’dari ma ru Sela-hamalekoti’i.

²⁹Te Daudi mu ’diarisi uru, mu adrizu pari okporu Eni-gedia ’diyi ma alia.