Read lugbara 1 Samueli 24 Bible Online

1 Samueli 24 - lugbara bible

1 Samueli 24

¹Eri nga eca ’dini, Saulo ka ku ’ba Filisitiaa ’diyi ma vuti drozu ja, ka emvi ’bo, yi olu eri tia kini, Mi ne, Daudi ovu roko Eni-gediaria.

²Saulo nga di ’ba alifu na ope Israeli dria ma eselia’i yi mu Daudi pi ndruzu ’ba erini ’diyi be kata ndri asea ’diyini ’diyia.

³Azini eri nga emu kabilo li co geri tia ’diyia, pari oni ojini ovuzuria; te Saulo fi i ma aza kozu. Te isu Daudi pi ’ba erini ’diyi be yi ovu oni oji ma ’a’aleruria,

⁴Te ’ba Daudini ’diyi nga ’yo eri ma tia, Mi ne, o’du Yehovani ndra ’yole mi tia kini, Mi ne, ma nga ari’bo mini fe mi dria, mi ma ’ye eri be ekile ovupi onyiru mi miliarile-ri ’di. Daudi enga di ra, eri li bongo Sauloni ma ti e’yere.

⁵Te eri nga eca ’dini vilerisi, Daudi ma asi osu erini bongo Sauloni lilerisi.

⁶Azini eri ’yo ’ba ini ’diyi ma tia, Yehova leni te ma ma ’ye e’yo ’diri ambo mani Yehovani odu osule drinia ’bori vu ku, mani ma dri ejuzu ’dini eri ma ruaa, a’disiku eri ovu ’ba Yehovani odu osule drinia ’bori’i.

⁷’Dini Daudi oga ’ba ini ’diyi dri e’yo ’yoza ’diyisi, eri feni yi ma enga Saulo ma ruaa ku. Te Saulo enga fuzu oni ojiarisi ra, mu geri inia.

⁸Daudini indi enga vilerisi ra, eri efu oni ojiarisi, eri mu oyu Saulo ma vutia, kini, Opi mani inzileri! Te Saulo ka angu elu i ma vutia ra, Daudi avu su i ma andreti va nyakua, inzi eri,

⁹Te Daudi ’yo Saulo ma tia kini, Mi eri e’yo ’bani ’yole kini, Mi ne, Daudini mi ndru mi ’yezu onzi-ri ’dini a’di e’yosi ya?

¹⁰Mi ne, o’du ’disi mi ndre mi milesi andru e’yo Yehovani mi fezu ma dria oni oji aliari; ’ba azini yi ’yo ma ma fu mi, te ma ku mi ra. Ma ’yo kini, i ma ngani ma dri ’ba opi mani ma ruaa ku; a’disiku eri ’ba Yehovani odu osule driniari’i.

¹¹Indi, mi ndre, ma ati, adaru mi ne bongo mini ma ti ma dria ’do; te mani bongo mini lizu’i, te mani mi fule kurisi, mi ma ni azini mi ma ndre kini e’yo ’onzi kani ezata ma dria yo. Te ma ezani nga mi dri aruzu ku, mini ndale ma fuzurisi ti.

¹²Yehova ma iji e’yo ama eselia mi be, azini Yehova ma ofe ma arioti mi ruaani; te ma ngani dri ’ba mi ruaa ku.

¹³Ekile e’yo o’beza ’ba drio ’diyini ’yolerile, ’Ba onzi ’diyi ma lalia e’yo onzini efuni; te dri mani Ingani ovu mi ruaa ku.

¹⁴Opi Israeliniri efu a’di ma vutia ya? Mi a’di ma vuti dro ya? Oce avuni! Kani ogalirini!

¹⁵Yehova ma ovu ’ba e’yo lipiriru, eri ma li e’yo ama eselia mi be, eri ma ndre, ma so pa ma be, te eri ma pa ma mi driasi.

¹⁶Te eri nga eca ’dini, Daudini e’yo ’diyi ’yozu Saulo ma tia ’boria, Saulo nga ’yo ra, ’Diri mi o’duko, ma mvi Daudi, mini ya? Te Saulo enga di i ma o’duko awu wuzu uru.

¹⁷Azini eri ’yo Daudi ma ria, Mi onyiru aga ma ra; mini e’yo onyiru fele ma dri de ma fe mi dri e’yo onziri’irisi.

¹⁸Azini mi ece o’du ’dirisi e’yo mini ma ’yezu onyiruri ’bo, a’disiku Yehova ka ma fe mi dria ’bo, mi funi ma ku.

¹⁹Te agu ka i ma ari’bo isu, eri eri ku muzo lidriru ya? E’yo ’disi Yehova ma fe mi dri oya onyiruri e’yo mini ’yele ma vu o’du andrurisi.

²⁰Te, mi ndre, ma ni ra, mi nga ovu opiru ada, azini opi nyaza Israeli ma driliari nga pa so minini.

²¹E’yo ’disi mi so oyo curu’do, kini mi ngani ori mani ma dri ja ma vutia ku beni, azini mi ngani ma ru nze ori’ba ma atini ma eseliasi ku indi.

²²Te Daudi nga oye nde so Saulo tia ra. Saulo mvi di akua; te Daudi pi ’ba erini ’diyi pie yi tu pari ekporuria.