Read lugbara 1 Samueli 28 Bible Online

1 Samueli 28 - lugbara bible

1 Samueli 28

¹Eri nga eca o’du ’dayisi ’dini, ’ba Filisitiaa ’diyi yi oku asikari ongulumuru yini tualu a’dia, a’di ’dizu Israeli be. Te Akisi ’yo Daudi ma tia, Mi ma ni adaru, mi nga mu ma be asikari ongulumuru ma eselia, mi’i ’ba mini ’diyi pie.

²Daudi ’yo Akisi ma tia, ’Yeke, mi di nga ni e’yo ati’bo minirini ecole ’yeleri. Azini Akisi ’yo Daudi ma tia, ’Yeke, ma di nga mi ’ba ’ba ma dri agei tepi ’dani ’daniriru.

³Isu de Samueli dra ’bo, azini ’ba Israelini dria owu erisi ra, yi sa eri Ramaa aku eriniria. Azini Saulo odro de ojou adrou zipi ’diyi pi angu aliasi ra oleou pie ’bo.

⁴Te ’ba Filisitiaa ’diyi oku yi tualu, yi emu hema yini aso Sunemua; te Saulo oku ’ba Israelini ’diyi dria tualu, yi emu hema yini aso Giliboaa.

⁵Te Saulo ka asikari ongulumuru ’ba Filisitiaa ’diyini ndre ’bo, eri ovu urisi, azini asi erini ya urisi tu.

⁶Te Saulo ka Yehovani zi ra, Yehova omvini e’yo eri tia ku, kani oro’bisi, kani Urimusi, kani nabisi ku indi.

⁷Saulo nga di ’yo ati’ba ini ’diyi ma tia, Emi ndru ma dri oku ojouru adrou zipiri alu, ma ma mu eri vu e’yo zizu eri tia ani. Ati’ba erini omvi e’yo eri ma tia kini, Mi ne, oku azini ojouru orindi onzi beri Eni-doria ci.

⁸Te Saulo oja i ekile ’ba azinile, eri su bongo toko i ruaa, eri mu ra, eri’i ’ba iri azini eri be; yi eca oku nderi vu inisi. Eri ’yo ra, Ma matu ’ba mi vu, orindi mini andri ndrizurisi, mi ofu mani ’ba mani ngale runi lule mi tiari’i.

⁹Te oku nderi ’yo ra, Mi ne, mi ni e’yo Sauloni ’yeleri ra, erini ojou adrou zipi ’diyi pi dri jazu oleou pie, angu ndearisi. Ka’dini mi ’ba ma dri emba ma fuze, ma fezu drazu a’di e’yosi ya?

¹⁰Te Saulo so oyo eri dri Yehovasi kini, Ekile Yehovani ovule idri berile, mi ngani panga onzi isu e’yo ’disi ku.

¹¹Oku nde nga di ’yo, Ma nga mi dri a’dini ofu uru’i ka ya? Te eri ’yo ra, Mi ofu ma dri Samueli’i.

¹²Te oku ndeni Samuelini ndreria eri otre o’duko urusi; azini oku nde ’yo Saulo ma tia kini, Mi lei ma dri a’di, e’yosi ya? De mi Saulo’i.

¹³Te opi nga di ’yo eri ma tia, Mi ’ye urisi ku; te mi ndre a’di afani ya? Te oku nderi ’yo Saulo ma tia, Ma ndre Mungu erini efuria ibizu nyakua.

¹⁴Azini eri zi tinia, Wurani ngonile ya? Te eri ’yo tinia, Mbazau efuni; azini eri rua a’buzaru bongo izurusi ci. Saulo va ra kini eri Samueli’i, azini eri avu su i ma andreti vale i nyakua, eri inzi ra.

¹⁵Te Samueli nga ’yo Saulo ma tia, Mi ecandi ma, ma ofuzu uru ’doni a’di e’yosi ya? Saulo nga di omvi kini, Ma ovu candi be tu; a’disiku ’ba Filisitiaa ’diyi yi ’ba omba ma be, azini vini Mungu ku ma ’bo, eri omvini e’yo ma tia dika ku, kani nabisi, kani oro’bisi ti; e’yo ’disi ma omve mi, mi ma ece ma dri e’yo mani ngale ’yeleri ani beni.

¹⁶Te Samueli ’yo ra, Mi ma zi a’di e’yosi ya, mi ka ndre Yehova ku mi ’bo, azini eri oja i mi ari’boru ’bo.

¹⁷Yehova ’ye mi dri ekile erini ndra ’yole ma tisirile; azini Yehova asi suru opi nyaza mi driasi, fe eri ’ba mi ageiari dri, adaru Daudi dri.

¹⁸A’disiku mi inzini o’duko Yehovani ku, azini mi jini ndra adra aciru eriniri ’be Amalekia ’diyi ma dria ku, e’yo ’disi Yehova ’ye e’yo ’diri mi vu andru ani.

¹⁹Azini indi Yehovani nga Israeli pi fe mi be ’ba Filisitiaa ’diyi dri; azini dru mi’i, mi anzipi be, emi nga ovu ma be; Yehovani nga asikari ongulumuru Israelini ’diyi fe vini ’ba Filisitiaa ’diyi dri.

²⁰Coti Saulo nga di i eco o’bukuru va sakpa, eri ovu urisi tu e’yo Samuelini ’yole ’diyisi; azini rua erini aka aka, a’disiku nyani nyaka o’du ’dasi zu ku, ini rra ku indi.

²¹Te oku tekari emu Saulo vu, eri ndre eri ovu candisi tu, eri ’yo eri matia, Mi ne, ati’bo mini okururi inzi mi o’duko ra; azini ma ’ba idri mani ma dri agelia, ma co ma bile e’yo mini ’yole ma tia ’diyi erizu.

²²E’yo ’disi curu’do, ma matu ’ba mi vu, mi co vini alu bile mini o’duko ati’bo mini okururini erizu indi; mi fe ma ma ’ba enya mikate were mi palaa; mi ma nya, mi ma ovu okpo be ani mini muzu geria.

²³Te eri ga si, eri ’yo ra, Ma ngani nyaka nya ku. Te ati’ba erini piyi oku nderi pie yi omi eri; te eri eri o’duko yini ra. ’Dini eri enga nyakuarisi ra, eri ri gbolo dria.

²⁴Isu de oku nderi ovu kojaa osoru be joa indi, eri ’ye mbele, eri li eri ra, eri ’du anyafura, eri onzo eri ra, eri omba ani mikate akufi kokoruri ra,

²⁵eri eji ’ba Saulo ma drilia, azini ati’ba erini ’diyi ma drilia indi; yi nya ra. Yi nga di enga, yi mu ini ’dasi ra.