Read lugbara 1 Samueli 29 Bible Online

1 Samueli 29 - lugbara bible

1 Samueli 29

¹’Ba Filisitiaa ’diyi oku asikari yini ongulumuru ’diyi dria tualu Afekia; azini ’ba Israelini ’diyi ri yi a’di Yezireeliari ageia.

²Te opi ’ba Filisitiaa ’diyini ’diyi yi aga turu vusi turu vusi, azini alifu vusi alifu vusi, te Daudi pi ’ba erini ’diyi be yi aga vilerisi Akisi pie.

³Opi’anzi ’ba Filisitiaa ’diyini ’diyi yi nga di ’yo, ’Ba Ebrania ’diyi ’dia a’di ’ye ya? Te Akisi ’yo opianzi ’ba Filisitiaa ’diyini ’diyi ma tia, ’Di ovuni.Daudi ati’bo Saulo opi Israelinirini, o’api ma be o’du ’diyisi, kani eli ’diyisi,mnani onzi isuzu eri ma alia ku engazu erini emuzu ma vurisiri’i ku ya?

⁴Te opianzi ’ba Filisitiaa ’diyini ’diyi yi ovu ani adrasi eri be; te, opianzi ’ba Filisitiaa ’diyini ’diyi ’yo eri ma tia, Mi fe agu nderi ma mvi ra, eri ma mu pari erini mini pele eri driria; mi ku eri ma si ombaa ama be ku, eri kazu muzu i ojazu ombaa ’dale ama ari’boru ku. Te agu ’diri eco asi ndriza isuzu dika opi erini ma milia afa ngorisi ya? Erini ’ba ’doyi ma dri jilerisi ku ya?

⁵’Di ovuni Daudi yini ndra ongo ngozu ongo tuza be kini, Saulo ofu ini alifule, Te Daudi ofu ini alifu mudrileri’i ku ya?

⁶Akisi nga-di Daudini omve ra, ’yo tinia, Ekile Yehovani ovule idri berile, mi ’ye e’yo dria kililiru, azini fuza mini pi efiza mini ma be asikari ongulumuru ma eseliari ovu onyiru ma milia; te ma isuni e’yo onzi mi alia engazu o’du mini emuzu ma vui ’dasi kpere andru ku. Te opi yi a’ini miku.

⁷E’yo’disi curu’domimvi; mi mu asi anzuru be, ’dini mi ma fe opi ’ba Filisitiaa ’diyini ’diyi ma ovu aokosi ku.

⁸Te Daudi ’yo di Akisi ma tia, Te ma ’ye nga ’dia a’di e’yoni ya? Azini mi isu a’di e’yoni ati’bo miniri ma alia, engazu mani ecaria mi vu cazu andru, mani ani fuzu a’di ’dizu ari’ba opi manirini be ku?

⁹Te Akisi omvi e’yo ra, ’yo Daudima tia, Ma ni ra mi ovu ’ba onyiruni ma milia, ekile malaika alu Mungunirile; te ti, opianzi ’ba Filisitiaa ’diyini ’diyi yi ’yo ra, Eri ngani mu uru ombaa ama be ku.

¹⁰E’yo ’disi curu’do emi enga di o’bitisi drio drio, ati’ba ambo minirini ecapi mi be ’diyi pie; emini engaria o’biti drio drio, coti anguni ’baria atiria emi ko dri muzu.

¹¹’Dini Daudi enga o’biti drio drio, eri’i ’ba erini ’diyi pie, dri kozu o’bitisi mvizu angu ’ba Filisitiaa ’diyiniria. Te ’ba Filisitiaa ’diyi yi mu uru Yezireelia.