Read lugbara 1 Samueli 30 Bible Online

1 Samueli 30 - lugbara bible

1 Samueli 30

¹Te eri nga eca ’dini, Daudi pi ’ba erini ’diyi pie yi ka eca Zikilagia o’du narisi ’bo, isu ’ba Amalekia ’diyi yi mu omba ’ba angu uruleruria, azini Zikilagi be. Isu yi aga Zikilagi ’bo, eve eri acisi,

²azini yi o’i de oku azini ’ba dria alenia ’diyi, ’ba were ’ba ’wara pie iri tro; yi funi yi aluni ku, te obi yi, mu ra.

³Te Daudi piyi ’ba erini ’diyi pie yi ka eca akua, mi ne, ve eri acisi ’bo, azini oku yini anzi yini pie, ezopi yini pie dria ovu de obizaru ati’baru ’bo.

⁴Daudi pi ’ba erini ’diyi pie yi nga di yi ma o’duko enga uru, yi wu ra, kpere okpo awu wuzurini i deria.

⁵Isu de oku Daudini iri, Ahinoamu Yezireeli zaaruri pi Abigaili ndra Nabali ’ba Karimeliari ma okururi be, obi yi ati’baru indi.

⁶Te Daudi ovu candisi amboru tu; a’disiku ’ba nde ’diyi ’yo yi nga eri o’be onisi, a’disiku bi nde ’diyi dria ovu candisi asi drazaru be, ’ba dria alu alu anzi yini piyi ma e’yosi ezopi be. Te Daudi ’ba i okporu Yehova Mungu eriniri ma alia.

⁷Azini Daudi ’yo Abiatari Ahimeleki mvi atalau edeta edepiri ma tia, Ma matu ’ba mi vu, mi eji nga mi koti alinari ’di. Te Abiatari eji i koti alinari Daudi dri ra.

⁸Te Daudi zi e’yo Yehova ma tia kini, Onyiru mani asikari ongulumuru ’diyi ma vuti drozu ra ya? Ma nga ca yi vu ra ya? Te eri omvi e’yo eri ma tia, Mi dro yi ma vuti; a’disiku mi nga ca yi vu adaru ra, azini mi nga afa dria isu ecekokoru.

⁹’Dini Daudi mu ra, eri’i ’ba erini ovupi eri be turu azia ’diyi be, yi eca yi Besoria, pari ’ba nde yini kule vile ’diyini rizuria.

¹⁰Te Daudi mu ’dani, eri’i ’ba turu su ’diyi pie; a’disiku ’ba turu iri ovupi okpo kokoru, ’dini yi econi yi Besorini agazu ku ’diyi, yi awu vile.

¹¹Te yi isu ’ba Misirini alu asea, yi eji eri Daudi vu; yi fe eri dri enya, eri nya ra, azini yi fe eri dri yi mvuza,

¹²yi fe vini eri dri elio efi ekpazaru ngulu ma ali, azini pati efi a’wi ngulu iri. Eri ka nya ’bo, orindi erini emvi eri ruaa ’bo; a’disiku eri nyani de enya ku kani mvuni yi ku, paleko na, etusi inisi indi.

¹³Te Daudi ’yo tinia, Mi a’di ma ’ba ya? Mi enga ngoa ya? Te eri ’yo ra, Ma karilau Misiria, ati’bo ’ba Amalekiariniri; te ambo maniri ku ma, a’disiku o’du aga curu’do na ’bo ma ndra de azoru.

¹⁴Ama mu de omba ’bazu kala uruleru ’ba Keretia ’diyiniria, azini angu ovupi Yudaniria, azini kala Kalebuni uruleruria; azini ama eve Zikilagini acisi.

¹⁵Te Daudi zi tinia, Mi nga ma ji andra asikari ongulumu ’diyi vu ra ya? Te eri ’yo ra, Mi so ma dri oyo Mungu rusi ’dini, kini, mi ngani ma fu ku, kani mi ngani ma fe ambo maniri dri dika ku, te ka’dini ma nga mi ji andra asikari ongulumu ’diyi vu ra.

¹⁶Azini eri ka eri eji andra ’dale ’bo, mi ne, yi ere de yi angua dria, yini nyaria azini mvuria, azini ongo turia, a’disiku afa yini opale ombasi ambo yuangu ’ba Filisitiaa ’diyiniria azini angu Yudania ’diyi ma e’yosi.

¹⁷Te Daudi ofu yi engazu omuneretisi kpere dru ondresi; te ’ba aluni yi eselia pani i ku, pe lu karile turu su tupi ngamia dria apapi ’diyi.

¹⁸Daudi o’du dika afa dria ’ba Amalekia ’diyini opale ’diyi ra; azini Daudi opa i nia oku iri ’diyi ra.

¹⁹Te afa azini yini ovuzu yi pie yoni yo, kani wereni, kani amboruni, kani agupianzi, kani ezoanzi, kani afa yini opale ombaa ’diyi, kani afa azini yini ’dule yi drisi ’diyi ma aluni yo; Daudi omvi yi dria vile li.

²⁰Azini Daudi o’du kabilo o’biru ’diyi, ti o’biru ’diyi pie dria; yi dro yi anyapa azini ’diyi drilia, kini, ’Diyi afa Daudini opale ombaa ’diyi.

²¹Te Daudi emu ’ba turu iri ’diyi vu, yi’i ndra ovupi okpo kokoru ecopi Daudi ma vuti bipi ku ’diyi, yi’i ndra yini kule awupi e’bu Besoria ’diyi; yi fu mu dri fuzu Daudi pi be, ’ba ovupi eri be ’diyi be; azini Daudi ka eca inyia ’ba nde ’diyi vu ’bo, eri zi yi ci ci.

²²’Ba onzi, azini ’ba asi ngiri be ’ba mupi Daudi be ’diyi ma eselia ’diyi dria nga di e’yo omvi kini, A’disiku yini mule ama be kurisi, ama ngani yi dri afa aluni afa amani opale vile ’diyi ma azi fe yi dri ku, pe lu ’ba alu alu dri oku erini anzi pie, eri ma ji yi ’dale, yi ma ko dri muzu.

²³Te Daudi nga di ’yo ra kini, Emi ngani ’ye ’dini ku, ma adripi, afa Yehovani fele ama dri ’diyisi; eri’i ama ta mbapi azini asikari ongulumu nde emupi ombaa ama be ’diyi fepi ama driari.

²⁴Te a’dini nga bile co emi vu e’yo ’ disini ya? Te ekile esele ’ba sipi ombaarinirile, ’dini ’ba awupi vile afa agei tepiri nga esele ini isu trotro; yi nga isu dria trotro.

²⁵Te eri ovu ’dini engazu o’du ’dasi kpere drile, eri ’ba e’yo nde azitaru azini e’yo azileriru Israeli dri kpere andru.

²⁶Daudi ka eca Zikilagia ’bo, eri pe afa erini opale ’diyi ma esele azini ’ba ’wara Yudani ’diyi vu, adaru i ma agyi vu, kini, Emi ne, feta emi dri ’di afa ’bani opale ari’ba Yehovani dri ’diyi ma eselia;

²⁷’ba adripi Betelia ’diyi pi dri, ’ba adripi Ramoti kala uruleruria ’diyi pie, ’ba adripi Yatiria ’diyi pie,

²⁸azini ’ba adripi Aroeria ’diyi pie, ’ba adripi Sifimotia ’diyi pie, ’ba adripi Esitemoa ’diyi pie,

²⁹azini ’ba adrip Rakalia ’diyi pie, ’ba adripi aku ’ba Yerameelini ’diyi ma alia ’diyi pie, ’ba adripi aku ’ba Kenini ’diyi ma alia ’diyi pie,

³⁰azini ’ba adripi Horimaa ’diyi pie, ’ba adripi Borasania ’diyi pie, ’ba adripi Atakia ’diyi pie,

³¹azini ’ba adripi Hebironia ’diyi pie, azini ’ba pari Daudi pini adrizu muzu alenia ’ba erini ’diyi pie ’diyi vu dria.