Read lugbara 1 Samueli 4 Bible Online

1 Samueli 4 - lugbara bible

1 Samueli 4

¹Te e’yo Samuelini nga eca ’ba dria Israelini ’diyi vu ra. ’Ba Filisitiaa ’diyini sanduku pazuri Te ’ba Israelini yi fu mu a’di ’dizu ’ba Filisitiaa ’diyi be; yi aso hema yini Ebenezeri ageia, te ’ba Filisitiaa ’diyi aso hema yini Afekia.

²’Ba Filisitiaa ’diyi yi oti yi a’di ’dizu ’ba Israelini be, te yini e’dozu ’bazu a’di ’dizu ’boria, ’ba Filisitiaa ’diyi aga ’ba Israelini ’diyi ra, yi ofu ’ba ekile alifu sule pari a’di ’dizuria.

³Te ’ba ka fi pari yini hema asozuria ’bo, ’ba ’wara Israelini ’diyi ’yo kini, Yehova ofu andru ama ’ba Filisitiaa ’diyi ma drilia ’doni a’disi ya? Ama ma mu amani sanduku aziza Yehovanirini ’duzu Siloa ejizu ’doa, ’dini erini ovuzu ama eseliaria, eri ma opa ama juru amani ma dria beni.

⁴’Dini yi pe ’ba ti Siloa, yi eji sanduku aziza Yehova asikari ongulumuruniri, eri’i ripi kerubi pi ma eselia uruleruri; te ami Elini iri, Hofini pi Finehasi be, yi ovu ’daa sanduku aziza Mungunirini be.

⁵Te sanduku aziza Yehovanirinini efiria pari yini hema asozuria ’boria, ’ba Israelini dria otre treta amborusi, ’dini angu no ani no no.

⁶Azini ’ba Filisitiaa ’diyi ka o’duko treta amboru nderini eri ’bo, yi ’yo ra, Otreta amboru pari ’ba Ebraniani ’diyini hema asozuriari ma awu ma efi ngoni ya? Te yi va sanduku Yehovani eca pari nde hema asozuria ’bo.

⁷Te ’ba Filisitiaa ’diyi yi ’ye urisi, te yi ’yo ra, Mungu efi pari ndea ’bo Te yi ’yo ra, Candi ama vu! e’yo ’dinilerini ovule ama vu nga oko yorisi.

⁸Candi ama vu! a’dini nga ama opa adrou okporu ’doyi ma driani ya? ’Doyi ovu adrou ndra ’ba Misiria ’diyi ofupi dra ndu ndu maturu ’diyisi roko dria ’diyi.

⁹Emi ma ovu okporu, emi ma ’ye e’yo asi agupinisi, emi ’ba Filisitiaa ’diyi la, ’dini emi ma ovu ati’baru ’ba Ebraniani dri ekile yini ovule ati’baru emi dririle ku; emi ma ’ye e’yo asi agupinisi, emi ’di a’di.

¹⁰’Dini ’ba Filisitiaa ’diyi yi ’di a’di ra, yi aga ’ba Israelini ’diyi ra, te ’ba dria alu alu apa hema yinia ra ofuta nde ovu amboru tu, asikari Israelini acipi pasi odrapi ’diyi yi alifu kali na.

¹¹Yi ’du sanduku Munguni ra, yi ofu anzi Elini iri, Hofini pi Finehasi be.

¹²Etu nderisi ’ba alu suruti Benyamininia efu omba eseliasi nzuzu cazu Siloa, bongo asiza be eri ruaa, eri omvu nyaku i dria indi.

¹³Eri ka eca ’bo, mi ne, Eli ri oguna erini dria geri tia angu oluzu, asi erini oti oti sanduku Munguni ma e’yosi. ’Ba nderi ka efi aku nderia ’bo, eri ka e’yo nde olu ra, ’ba aku ndea ’diyi dria owu ra.

¹⁴Te Eli ka yikiyi awuni eri ra eri ’yo kini, Lulu kakau awu be ’diri ma efi ngoni ya? Agu nderi nga emu mbele e’yo nderi luzu Elini.

¹⁵Isu eli Elini ovu kali oromi drini aro, azini mile erini obi yi ’bo, econi angu ndrezu ku.

¹⁶Te agu nderi ’yo Eli ma tia, Ma ovu ’ba engapi omba eseliari’i, te ma apa andru ’ba ombaa ’diyi ma eseliasi, Te eri ’yo ra kini, E’yo aci ngoni ya, ma mvi?

¹⁷Te agu e’yo kuza ejipiri ’yo ra, Israeli apa ’ba Filisitiaa ’diyi ma driliasi ra, azini futa amboru ’dale ’ba eselia; anzi mini iri ’diyi Hofini pi Finehasi be odra ’bo, azini yi ’du sanduku Munguni ra.

¹⁸Eri nga eca ’dini, erini sanduku Munguniri ma e’yo ’yoria, Eli nga e’de engazu oguna driarisi nguku ngukuru kalitile ma kalaa; ombeni nyo ira, eri dra ra, a’disiku eri ovu mbazauni, nzi tu. Te eli erini ovuzu ’ba Israelini ’diyi ma e’yo lizu ’diyi ovu kali su.

¹⁹Eri ma zi oku Finehasiniri ovu de a be, ogogo osizaru; Te eri ka e’yo ’diyi eri, kini ’du sanduku Munguni ’bo, azini anyi pi agupi ini be odra ’bo, eri asu i ru va, osi mva; a’disiku mva azo e’du eri ra.

²⁰Te ogogo etu erini drazurisi, oku pa sopi eri ageia ’diyi ’yo tinia, Mi ru ku, a’disiku mi osi agupimva ’bo. Te eri omvini e’yo ku, egani e’yo nderi ku indi.

²¹Eri ’da mva nde ma ru Ikabodi, efini kini, Diza ku Israeli ’bo; a’disiku yi ’du sanduku Munguni ra, azini anyi pi ma e’yo agupi erini berisi.

²²Te eri ’yo, kini, Diza ku Israeli ’bo, a’disiku yi ’du sanduku Munguni ra.