Read lulogooli Litanga 1 Bible Online

Litanga 1 - lulogooli bible

Litanga 1

¹Mu litanga Nyasaye ya lomba migulu nelirova.

²Na lirova lya gwa bugira bulolero na bugira kindu mulyo; na kisundi kya kunika ku lirova na Roho wa Nyasaye ya gonera ku amadzi.

³Kandi Nyasaye ya vola, Bu ve ubulavu: na bwa li ho ubulavu.

⁴Na Nyasaye ya lola ubulavu, bwa li bulahi: na Nyasaye yavukanya ubulavu nekisundi.

⁵Na Nyasaye ya ki gulika ubulavu Mbasu, na kisundi ya gulika Ubudiku. Na gwa li mgolova na gwa li mugamba, lidiku lilala.

⁶Kandi Nyasaye ya vola, Bu ve ho ubwerefu hagati ha amadzi, bwavukanye amadzi ku amadzi.

⁷Na Nyasaye ya lomba ubwerefu, nokwavukanya amadzi ga li isi wobwerefu ku amadzi ga li igulu ku bwerefu na ga li ndiyo.

⁸Na Nyasaye ya gulika ubwerefu, Ligulu. Na gwa li mgolova, na gwa li mugamba, lidiku lya kaviri.

⁹Kandi Nyasaye ya vola, Amadzi ga li isi weligulu ga vunge halala li loleke lirova Iyumu: na ga li ndiyo.

¹⁰Na Nyasaye ya gulika ahumu Lirova na livungwa lyamadzi ya gulika Tsinyanza: na Nyasaye ya lola nobulahi.

¹¹Na Nyasaye ya vola, Lirova li mere ubulimu, netsingutsa tsi letanga ubugutsa, nemisala gyamanga makuyu kuli lugano lwagyo, gyi veye netsinzoli tsyagyo ku lirova: na ga li ndiyo.

¹²Kandi lirova lya mera ubulimu, netsingutsa tsi letanga ubugutsa kuli lugano lwatsyo, nemisala gyamanga makuyu, ga veye netsinzoli tsyagyo mu gyene, kuli lugano lwagyo: na Nyasaye ya lola nobulahi.

¹³Na gwa li mgolova na gwa li mugamba, lidiku lya kavaka.

¹⁴Kandi Nyasaye ya vola, Bu ve ho ubulavu mbwerefu bweligulu kwavukanya mbasu ku budiku, kandi bu ve vilolekidzu, netsinyinga, namadiku, nemihiga:

¹⁵kandi vi ve vimulikiru mbwerefu bweligulu kuleta ubulavu ku lirova: na ga li ndiyo.

¹⁶Na Nyasaye ya lomba vimulikiru venene viviri; kinene kwameha mbasu, na kikekeke kwameha ubudiku: kandi ya lomba tsing'ereng'ani.

¹⁷Na Nyasaye ya vi vika mbwerefu bweligulu kuleta ubulavu ku lirova,

¹⁸nokwameha mbasu nobudiku, nokwavukanya ubulavu nekisundi: na Nyasaye ya lola nobulahi.

¹⁹Na gwa li mgolova na gwa li mugamba, lidiku lya kane.

²⁰Kandi Nyasaye ya vola, Amadzi gaale vilombe vinyingi vyelivamwoyo na manyonyi ga buluke igulu ku lirova mu bwiyangu bwobwerefu bweligulu.

²¹Kandi Nyasaye ya lomba tsinyama tsyomu inyanza tsinene, na vilombe vyosi velivamoyo vi gendanga, navyo amadzi gaalanga, kuli lugano lwavyo, na manyonyi getsimbaha, kuli tsing'ano tsyago: ne Nyasaye ya lola nobulahi.

²²Kandi Nyasaye ya vi gasidza, na a vola, Mwivulane, mu medeke, mwizule a nadzi getsinyanza, kandi manyonyi ga medeke ku lirova.

²³Na gwa li mgolova na gwa li mugamba, lidiku lya gatano.

²⁴Na Nyasaye ya vola, Lirova lyaale vilombe vyelivamwoyo kuli lugano lwavyo, mitugu, nevimolanga netsinyama tsyelirova kuli lugano lwatsyo: na ga li ndiyo.

²⁵Na Nyasaye ya lomba tsinyama tsyelirova kuli lugano lwatsyo, nemitugu kuli lugano lwagyo, na vyosi vi molanga ku lirova kuli lugano lwavyo: na Nyasaye ya lola nobulani.

²⁶Kandi Nyasaye ya vola, Ku lombe mundu ku lifwanana lyetu, na kuli liva lyetu: kandi va ve nelyameha ku tsisudzi tsyomu inyanza, noku manyonyi gombwereru, noku mitugu, noku lirova lyosi, noku vi molanga ku lirova vyosi.

²⁷Kunangwa Nyasaye ya lomba mundu ku lifwanana lilye, mu lifwanana lilye ya mu lomba; musatsa nomukali ya va lomba.

²⁸Na Nyasaye ya va gasidza: na Nyasaye ya va volera, Mwivulane, mu medeke, na mwizule lirova, noku lyameha; kandi mwamehe ku tsisudzi, tsyomu inyanza, noku manyonyi gombwerefu, noku vyosi vyelivamwoyo vi gendanga ku lirova.

²⁹Na Nyasaye ya vola, Henza, mmali kumuha tsingutsa tsyosi tsi letanga ubugutsa, tsi veye ku lirova lyosi, na musala ku gyosi, mugwo gu veye nelikuyu lyomusala gu letanga tsinzoli; ku mwinye vi la va vyokulia:

³⁰noku tsinyama tsyosi tsyelirova, noku manyonyi gosi gombwerefu, noku vyosi vimolanga ku lirova, vi veye nelivamwoyo, mbaani kuvyo tsingutsa tsyosi tsya amatu mavisi tsi ve vyokulia: na ga li ndiyo.

³¹Na Nyasaye ya lola vindu vyosi vya ya li hulomba, na henza, vya li vilahi ligali. Na gwa li mgolova na gwa li muvamba, lidiku lya gatano nelilala.