Read lulogooli Litanga 12 Bible Online

Litanga 12 - lulogooli bible

Litanga 12

¹Kunangwa Yahova ya volera Abram, Twula mu kivala kikyo, na mu bwiko bwavo, nomu inyumba ya dada wowo; u tsie mu kivala kya nda ku mannya:

²na nda kola Ive u ve ihiri inene, na nda ku gasidza, na nda kola lieta lilyo li ve linenena ive u ve ubugasu:

³kandi nda gasidza yavo ava gasidza ive, na nda laama yavo ava laama ive: na aviko vosi velirova va la gasidzirwa mu ive.

⁴Kunangwa Abram ya tsia, kuli Yahova ya mu volera; na Loti ya tsia halala naye: na Abram ya li nemihiga makumi gatano na gaviri na gyitano lwa ya twula Harani.

⁵Na Abram ya vugula Sarai mukali wewe, na Loti mwana wamwavo wewe, na vindu vyosi vya venyolera, na vandu ava va nyola mu Harani; na va twula kutsia mu kivala kya Kanani; na va duka mu kivala kya Kanani.

⁶Na Abram ya vita hagati he kivala na a duka ha Shekem, hango ha More. Kandi Mukanani ya li mu kivala inyinga yeyo.

⁷Kandi Yahova ya loleka ku Abram, na a mu volera, Inze nda ha kisukululwi kikyo kivala yiki: naye yombakira ho Yahova ubwali, wa loleka kuye.

⁸Na ya twula ho na a tsia mu kigulu kya ivugwe wa Betheli, na yombaka lihema lilye, Betheli li veye madioli ml Ai li veye ivugwe: na yombakira ho Yahova ubwali na yanira lieta lya Yahova.

⁹Kandi Abram ya samula, na a tsia luvega lwa Kusini.

¹⁰Na ha li nenzala mu kivala zana: na Abram ya sulunguta na a duka Egepeti a menye yo; kigira inzala ya li inene mu kivala.

¹¹Kunangwa lwa ya li himbi kuduka Egepeti, ya volera Sarai mukali wewe, Henza Mmanya ive u veye mukali mulahi ku liloleka lilyo:

¹²kunangwa ga la va lwa Vaegepeti va la ku lola, va la vola, Uyu nomukali wewe: navo va la nziita, navutswa va la ku vererera u ve mwoyo.

¹³Mwadza, u vole, u veye mbotso wange; nyole ubulahi kigira ive, na nda va mwoyo kigira ive.

¹⁴Kunangwa lwa Abram ya duka Egepeti, Avaegepeti va lola mukali a veye mulahi ligali.

¹⁵Avandu vanene va Farao va mu lola na va mwidzominya imbiri wa Farao: kunangwa mukali zana ya vugulwa na a vikwa mu inyumba ya Farao.

¹⁶Naye ya kolera Abram bulahi kigira uyu: ya li namagondi, na tsing'mbe, na tsisukiri tsisatsa, na vatumiki avasatsa, na vakana, na tsisukiri tsinkali, na tsing'amia.

¹⁷Na Yahova ya duya Farao na inyumba yeye na maduywa manene kigira Sarai, mukali wa Abram.

¹⁸Na Farao ya langa Abram, na a mu volera, U nkoleye kindu ki? Kigira ki wa vula kumbolera uyu a veye mukali wowo?

¹⁹Kigira ki ive wa v ola, a veye mbotso wange kuduka inze nda mu hila a ve mukali wange? Kalunu, henza mukali wowo, u mbugule, u tsie.

²⁰Farao ya laga avandu veve kuye: na va mu hereka ku inzira yeye, na mukali wewe, na vyosi vya li navyo.