Read lulogooli Litanga 13 Bible Online

Litanga 13 - lulogooli bible

Litanga 13

¹Na Abram yanegira kutwula Egepeti, uyu, nomukali wewe, na vyosi vya ya li navyo, na Loti ya li halala naye, na a duka mu kivala kya Kusini.

²Na Abram ya li nobutugi ligali ku mitugu, na ifetha, na ithahabu.

³Na ya londa tsinzira tsitsye kutwula Kusini kuduka Betheli, kuduka ha lihema lilye lyokutanga lya li, hagati ha Betheli na Ai;

⁴kuduka ha ubwali, bwa ya lomba kutanga: na Abram yanirira ho lieta lya Yahova.

⁵Kandi Loti wa tsia halala na Abram, ya li ne vyayo, ne mitugu, na mahema.

⁶Na kivala si kya nyala kudukana navo, va menye halala: kigira ubutugi bwavo bwa li bunyingi, va luha va vula kumenya halala.

⁷Kandi ha li nehhing'ana hagati ha avayi, avayanga mitugu gya Abram na gya Loti: na Vakani na Vaperizi va li mu kivala inyinga yeyo.

⁸Na Abram ya volera Loti, Nku goonyanga, li ta va ho lihing'ana hagati hange nive, na hagati ha avayi vange na vovo; kigira ku veye amwavo na amwavo.

⁹Kivala yiki kyosi si ki veye imbiri wowo? Nku goonya, weyahule u ndeke; ive nu u tovola ku luvega lwomukono mmosi, inze nda tsia ku mukono mulungi; kinga nu u tovola mukono mulungi, inze nda tsia ku mukono mmosi.

¹⁰Kunangwa Loti ya ginga tsimoni tsitsye, na a henza kivala kyosi kya Yordani, kya li kikindu ligali tsimbega tsyosi kuli mulimi gwa Yahova, na kuli kivala kya Egepeti lwa u tsia Zoaru, Yahova ya li na a kikiri kudividza Sodoma na Gomora.

¹¹Kunangwa Loti yetovolera kivala kyosi kya Yordani; na Loti ya samula na a tsia ivugwe: navo vavukana mulala ku wundi.

¹²Abram ya menya mu kivala kya Kanani, na Loti ya menya mu madala ge kivala kye kereremu, na sunda lihema lilye kuduka Sodoma.

¹³Na avandu va Sodoma va li avadamano ligali, na va kola, ubwoni munonono imbiri wa Yahova.

¹⁴Na Yahova ya volera Abram, inyima wa Loti yavukana naye, na a vola, Ginga tsimoni tsitsyo ha u veye, na u henze kasikasini, na kusini, na ivuewe, na madioli:

¹⁵kigira kivala yiki kyosi kya u lolanga, nda ha ive, ne kisukululwi kikyo mihiga nemihiga

¹⁶Kandi nda kola kisukululwi kikyo kuva kuli lugukyi lwelirova: Luduka ni i va mundu a nyala kuvalidza lugukyi lwelirova, na ndiyo kisukululwi kikyo ki nyala kuvalidzwa.

¹⁷Vuka, u gende mu kivala mu butambi bwakyo nomu bugalamu bwakyo; kigira nda ku ha kivala yiki.

¹⁸Abram ya sunda lihema lilye, na a tsia kumenya himbi ne misala gya Mamre, gya li mu Hebironi, na yombakira yo Yahova ubwali.