Read lulogooli Litanga 15 Bible Online

Litanga 15 - lulogooli bible

Litanga 15

¹Inyima wevindu yivi likuva lya Yahova lya duka ku Abram mu malola, kuvola, U ta tia, Abram: Inze mbeye inkingiru yoyo, na madanyi gogo manene ligali.

²Na Abram ya vola, O Mwami Yahova, u la mba ikindu ki, kigira ngendanga vutswa bugira mwana, na uyu u li lia miyandu gyenyumba yange ni Eliezeru wa Damasko?

³Kandi Abram ya vola Henza, u vuli kumba lwivulu: na henza, mulala wivulwa mu inyumba yange a veye wemiyandu gyange.

⁴Na, henza, likuva lya Yahova lya duka kuye, na a vola, Mundu uyu si a la va wemiyandu gyigyo mba; navutswa u li twula munda mumwo mwene a la va wemiyandu gyigyo.

⁵Na ya mu hila kyova, na a mbolera Henza kalunu migulu, u validze tsing'ereng'ani, nu u va nu nyala kutsivalidza: na ya mbolera, Lwivulu lulwo lu la va ndi.

⁶Naye ya suuvira Yahova; naye ya ga vola kuye kuva ubulungi.

⁷Na ya mu volera, Inze mbeye Yahova wa ku twulidza mu Uru lya Vakalidei, kukuha kivala yiki kuva miyandu gyigyo.

⁸Naye ya vola, O Mwami Yahova, Nda manya ndi nda ki nyola kuva miyandu?

⁹Naye ya mu volera, U mbugulire iroli yemihiga gyivaka, na isuveni yemihiga gyivaka, na ligondi likole lye mihiga gyivaka, na kiduga, ne likuulu lisoleli.

¹⁰Naye ya mu vugulira yivi vyosi, na ya vyatannya hagati, na a vika vidieli vilala ku luvega lulala, na vindi ku luvega lundi: navutswa manyonyi si ya gatannya mba.

¹¹Na tsisoti tsiika ku vikudzu zana, na Abram ya tsi kunga.

¹²Na liuva lwa ya yera, tsindolo tsinene tsya gumira Abram; kandi, henza, litihidza lyekisundi kinene lya duka kuye.

¹³Na ya volera Abram, U manye ligali visukurulwi vivyo vi la va avamenya mu kivala ki ta li kyavo, na va la va tumekira; navo va la va dambidza mihiga tsimia tsine;

¹⁴na ihiri zana, ya va li tumekira nda va kalagira: kandi lwenyima va la twula nobutugi bunyingi.

¹⁵Navutswa ive u la tsia ku vadada vovo nemirembe; na ive u la tebwa mu buhindiri bulahi.

¹⁶Na mu kisukululwi kya kane va lirana hano kandi: kigira ubudamano bwa Vaamori bu kikiri kwizula.

¹⁷Kunangwa, liuva lwa ya yera, na ha li ne kisundi, henza, kisambiru kyo mwoki, nolumuli lwetsimemo lwa vita hagati hevidieli vyetsinyama.

¹⁸Mu lidiku yilyo Yahova ya kola lilagana na Abram, na a vola, Mmali kuha visukululwi vivyo kivala yiki, kutwula ku mu gera gwa Egepeti kuduka ku mugera munene gwa Farati:

¹⁹Vakeni, na Vakenizi, na Vakadimoni,

²⁰na Vahiti, na Vaperizi, na Varafaim,

²¹na Vaamori, na Vakanani, na Vagirigashi, na Vajebusi.