Read lulogooli Litanga 20 Bible Online

Litanga 20 - lulogooli bible

Litanga 20

¹Kandi Abrahamu ya samula kutwula ho kutsia ku luvega lwa Kusini, na a menya hagati ha Kadesh na Shur; na a menya mu Gerari.

²Na Abrahamu ya vola ku Sara mukali wewe, A veye mbotso wange: na Abimeleku mwami wa Gerari ya tuma avandu ni va vugula Sara.

³Navutswa Nyasaye yadza ku Abimeleku mu lilota lyobudiku, na a mu volera, Henza, u veye mukudzu, kigira mukali uyu wa u vuguyea veye mukali womundu.

⁴Navutswa Abimeleku ya li na a kikiri kuva nalala naye: naye ya vola, Mwami u liita ihiri inungi?

⁵Mwene si ya mbolera, A veye mbotso wange? Naye kali mukali mwene ya vola, A veye mbotso wange: nda kola yaga mu bulungi bwomwoyo gwange nombunifu bwamakono gange.

⁶Na Nyasaye ya mbolera mu lilota, Yee, mmanya wa kola yaga mbulungi bwomoyo gugwo, na Inze kandi nda ku gayidza u vule kukola ku inze ubwoni: kigira yaga si nda ku lekera ubwiyangu kumudira.

⁷Kunangwa wiranyire mundu mukali wewe; kigira a veye muprofeti, naye a la ku saalira, na ive u la hindira: kandi nu u va nu u vula kumwiranya, u manye ligali u la kudza, ive, na vovo vosi.

⁸Na Abimeleku ya vuka mabwebwe, na a langa avatumekiri veve vosi, na a vola makuva gaga mmato gavo: navandu yava va tia ligali.

⁹Kunangwa Abimeleku ya langa Abrahamu, na a mu volera, U ku koleye ki? Na inze nku koleye ubwoni ki, kuduka ive u leteye ku inze noku bwami bwange ubwoni bunene? U nkoleye vikolwa vi ta dukana kukolwa ligali.

¹⁰Na Abimeleku ya volera Abrahamu, Wa lola kindu ki u duke kukola inkuva yiyi?

¹¹Na Abrahamu ya vola, Kigira nda ganagana, Ligali si ha veye na litibwa lya Nyasaye hano; navo va la nziita kigira mukali wange.

¹²Kandi ligali a veye mbotso wange, mwana wa dada wange, navutswa si a li mwana wa mama wange; naye ya gwa mukali wange:

¹³na ga duka, lwa Nyasaye ya nkola mugendagendi kutwula mu inyumba ya dada wange, nda volera mukali wange, Yitsi ni tsimbabasi tsya u li nkolera: hosi ha ku li duka, u vole, A veye mbotso wange.

¹⁴Kunangwa Abimeleku ya vugula magondi na tsing'ombe, navatugwa avayai, navatugwa avakana, na a ha Abrahamu, kandi ya mwiranyira Sara mukali wewe.

¹⁵Na Abimeleku ya vola, Henza, kivala kyange ki veye imbiri wowo: u menye ha u yanza.

¹⁶Na ya volera Sara, Henza, mmali kuha mbotso wowo, vidonye elfu vyefetha: henza, i veye ku ive kyokufuma tsimoni ku vosi ava veye halala nive; na imbiri wa vandu vosi ive u hebeywi ubulungi bwubwo.

¹⁷Na Abrahamu ya saala Nyasaye; na Nyasaye ya honya Abimeleku, nomukali wewe, navakana vatugwa veve; navo vivula avana.

¹⁸Kigira Yahova yigalira tsinda tsyosi tsyavenyumba va Abimeleku kigira Sara, mukali wa Abrahamu.