Read lulogooli Litanga 21 Bible Online

Litanga 21 - lulogooli bible

Litanga 21

¹Na Yahova ya henza Sara kuli ya vola, na Yahova ya kolera Sara kuli ya mu volera.

²Na Sara ya vereka na yivulira Abrahamu mwana muyai mu busakulu bwibwe, ku inyinga zana ya Yahova ya mu volera.

³Na Abrahamu ya gulika lieta lyomwana yivulwa kuye, wa Sara ya mwivulira, Isaka.

⁴Na Abrahamu ya keva mwana wewe Isaka lwa ya duka madiku gatano na gavaka, kuli Nyasaye ya mu laga.

⁵Na Abrahamu ya li nemihiga mia lwa mwana wewe Isaka yivulwa.

⁶Na Sara ya vola, Nyasaye u mbeye liseka; na ku vosi u hulira a la seka halala ninze.

⁷Kandi ya vola Ibwaha nkano ya volera Abrahamu Sara a la nyunnya avana? Kigira mmwivuye mwana muyai mbusakulu bwibwe.

⁸Na mwana ya viruka, na a luguhira: na Abrahamu ya lomba lilia linene ku lidiku lya Isaka ya luguhira.

⁹Na Sara ya lola mwana wa Hagari Muegepeti, wa yivulira Abrahamu, na a kola kihenyahenya.

¹⁰Kunangwa ya volera Abrahamu, U kunge mkana mutugwa uyu na mwana wewe: kigira mwana womutugwa uyu si a la va wemiyandu halala nomwana wange, kali halala na Isaka.

¹¹Na inkuva yiyi ya li indinyu ku Abrahamu kigira mwana wewe.

¹²Na Nyasaye ya volera Abrahamu, I ta va indinyu ku ive kigira mwana, kandi kigira mkana mutugwa wowo; ku vyosi vya Sara a ku volera, u hulire mwoyo gwigwe, kigira kisukululwi kikyo ki la langwa mu Isaka.

¹³Na kandi nda kola mwana wa mutugwa wowo kuva ihiri, kigira yivuliwa ku ive.

¹⁴Na Abrahamu ya vuka mabwebwe, na a vugula ubukima na kimuga kya amadzi, na a ha Hagari ya vi vika ku livega lilye, kandi mwana, na a mu twulidza: naye ya tsia, na a gendagenda mu kyangalangwi kya Beer-sheba.

¹⁵Na amadzi mu kimuga ga fwa, naye ya vika mwana isi womusala mukekeke.

¹⁶Naye ya tsia na yikala ha luvega ihale ha duka lilasa lyombano: kigira ya vola, Mbule kulola likudza lyomwana. Kandi yikala ha luvega, na a ginga mwoyo gwigwe, na a lira.

¹⁷Na Nyasaye ya hulira mwoyo gwomwana; na ingelosi wa Nyasaye ya langa Hagari kutwula migulu na a mu teva U veye naki Hagarii u ta tia; kigira Nyasaye u huliye mwoyo gwomwana ha a veye.

¹⁸Vuka, u vugule mwana, u mu gumire mmakono gogo; kigira nda mu kola kuva ihiri inene

¹⁹kandi Nyasaye ya kunula tsimoni tsitsye, naye ya lola kidaho kyamadzi; na a tsia kwizulitsa kimuga amadzi; na a ha mwana kunwa.

²⁰Kandi Nyasaye ya li halala nomwana, na a viruka; na a menya mwigendinyama, lwa ya li na a virukanga ya gwa mulasi wembano.

²¹Naye ya menya mwigendinyama lya Parani: na mama wewe ya mu kwehidza mukali mu kivala kya Egepeti.

²²Kunangwa inyinga yeyo, Abimeleku na Fikolu nlunene welihe lilye va volerana na Abrahamu, ni va vola Nyasaye a veye halala na ive mu vyosi vya u kolanga:

²³kalunu u nzisuhire ku Nyasaye u la vula kungada, kinga mwana wange, kinga mwisukulu wange: navutswa kuli ubulahi bwa nda ku kolera, na ive u la nkolera ndiyo, noku kivala kya u menyanga mu.

²⁴Na Abrahamu ya vola, Ndisuha.

²⁵Na Abrahamu ya gaya Abimeleku kigira kidaho kya amadzi, kya avatumekiri va Abimeleku va mu nyaga.

²⁶Na Abimeleku ya vola, Si mmanya uyu wa kola inkuva yiyi; kandi si wa mbolera, kandi si nda hulira, navutswa lero.

²⁷Kunangwa Abrahamu ya vugula magondi netsing'ombe, na a ha Abimeleku; navo vombi va lomba lilagana.

²⁸Kandi Abrahamu ya vika ha luvega avana va magondi vatano na vaviri vasuveni vekyayo.

²⁹Na Abimeleku ya teva Abrahamu, Avana vamagondi vatano na vaviri vasuveni yava, va u viki ha luvega va veye kigira ki?

³⁰Naye ya vola, Avana va magondi vatano na vaviri vasuveni yava, ive u la vugula mmukono gwange, kuva lilolekidza lyange, ninze wa yava kidaho yiki.

³¹Kigira yaga ya gulika ha zana Beersheba; kigira visuhira ho vombi.

³²Kunangwa va lomba lilagana ha Beer-sheba: na Abimeleku ya singira, na Fikolu munene welihe lilye, na virana kutsia mu kivala kya Vafilisti.

³³Na Abrahamu ya simika muvinde mu Beer-sheba, na yanira lieta lya Yahova, Nyasaye Wemihiga nemihiga.

³⁴Na Abrahamu ya menya mu kivala kya Vafilisti madiku manyingi.