Read lulogooli Litanga 24 Bible Online

Litanga 24 - lulogooli bible

Litanga 24

¹Kunangwa Abrahamu ya li musakulu, nowemihiga minyingi: kandi Yahova ya mu gasidza mu vindu vyosi.

²Na Abrahamu ya volera mutumekiri, mulindi wenyumba yeye, nowameha ku vyosi vya ya li navyo, Mwadza, u vike mukono gwugwo ku litango lyange:

³na inze nda kwisuhidza ku Yahova, Nyasaye womigulu na Nyasaye welirova, u ta vugulira mwana wange mukali ku vakana Vakanani, ava mmenya hagati havo:

⁴navutswa u la tsia ku kivala kyange, noku aviko vange, na u la vugulira yo Isaka mwana wange, mukali.

⁵Na mutumekiri ya mu volera, Mbula mukana a la sula kubugirira kunonda, yadze mu kivala yiki: ga ndukira kwirannya mwana wowo kandi mu kivala kya wa twula mu?

⁶Na Abrahamu ya mu volera, Henza bulahi, u tirannya mwana wange yo mba.

⁷Yahova, Nyasaye womigulu, wa ntwulidza mu inyumba ya dada wange, nomu kivala kya ndivulwa mu, wa mbolera, na ya nzisuhira, kuvola, Nda ha kivala yiki ku kisukululwi kikyo; uyu a la tuma ingelosi wewe imbiri wowo, na ive u la vugulira yo mwana wange mukali.

⁸Kandi ni i va mukana si a bugirira kukulonda, hene yaho u la bohololwa ku lyesuha lyange yili; navutswa u tirannya yo mwana wange kandi.

⁹Na mutumekiri ya vika mkono gwigwe ku litango lya Abrahamu mwami wewe, na yisuha mu inkuva yiyi.

¹⁰Kunangwa mutumekiri ya vugula tsing'amia likumi, ku tsing'amia tsyomwami wewe, na a tsia, kigira vindu vilahi vyosi vyomwami wewe vya li mmukono gwigwe: na ya twula, na a tsia Mesopotamia, ku lidala lya Nahoro.

¹¹Na ya sigaminya tsing'amia kyova welidala himbi nekidaho inyinga ya mgolova, inyinga ya vakali va tsitsanga kudaha amadzi.

¹²Na ya vola, O Yahova, Nyasaye womwami wange Abrahamu Nku saala, u mbe inkavi indahi lero na u vererere mwami wange Abrahamu.

¹³Henza nsingira himbi na kidaho kya amadzi na avana avakana va vandu velidala yili vadza kudaha amadzi:

¹⁴ga duke kuva, mukana wa mbolera, Mwadza, u tuule isiongo yoyo, nduke kunwa amadzi; naye a la vola, U nwe, kandi nda nwehidza tsing'amia tsitsyo: uyu a ve niye wa u tovoleye mutumekiri wowo Isaka; ku yaga nda manya u verereye mwami wange.

¹⁵Kunangwa, lwa ya li na a ki vola yaga, henza, Rebeka ya twula mu lidala, uyu yivulirwa Bethueli mwana wa Milika, mukali wa Nahoro, amwavo wa Abrahamu, naye ya li na isiongo ku livega lilye.

¹⁶Kandi mukana uyu ligondo lilye lya li lilahi, mukana mugyima, kandi musatsa a kikiri kummanya: naye ya sulunguta kuduka ku kisenukiru kya amadzi, na yizulitsa isiongo yeye, na yanagira kandi.

¹⁷Na mutumekiri ya nyagula kuvugana naye, na a vola, Mwadza, u mbe amadzi gesiongo yoyo makekeke, nwe.

¹⁸Naye ya vola, U nwe, mwami wange: naye ya kola bwangu na a tuula isiongo ku mkono gwigwe, na a mu ha amadzi kunwa.

¹⁹Na lwa ya mala kumuha kyokunwa, ya vola, Nda dahira tsing'amia tsitsyo kandi, kuduka tsi nweye,

²⁰naye ya kola bwangu, na a sundula isiongo yeye ku mulinga gwemitugu gyi nwera ku, na a tsia tsimbiru kandi mu kidaho kudaha na ya dahira tsing'amia tsitsye tsyosi.

²¹Na mundu uyu ya mu henza ligali, na a kiring'ana, a duke kumanya Yahova u gasidzi lugendo lwilwe naho si ga li ndiyo.

²²Kunangwa, lwa tsing'amia tsya mala kunwa, mundu ya vugula imingiri yethahabu, ubuliduhu bwayo bwa li kidonye kyesekeli, na visambo viviri vyoku makono gege, gyobuliduhu bwavyo bwa duka tsishekeli likumi tsyethahabu;

²³naye ya mu teva, U veye mwana wa bwaha? Mwadza, u mbolere. Ha veye nobwiyangu mu inyumba ya dada wowo bwa ku nyala kumenya mu?

²⁴Naye ya mu volera, Mbeye mukana wa Bethueli mwana wa Milika, yivulira Nahoro.

²⁵Kandi ya mu volera, Ku veye nobunyasi nevyokulia vi duki, nobwiyangu bwokumenya mu.

²⁶Na mundu yina minya mutwe gwigwe na a sigamira Yahova.

²⁷Na ya vola, A gasidzwe Yahova, Nyasaye womwami wange Abrahamu, wa vula kuleka tsimbabasi tsitsye na geligali gege ku mwami wange: kandi inze, Yahova u nzimiriye ku inzira i duka ku inyumba yamwavo wa mwami wange.

²⁸Na mukana uyu ya nyagula, na a volera avenyumba ya mama wewe kuli makuva yaga.

²⁹Na Rebeka ya li na mbotso, wa langwa Labani: na Labani ya nyagula kutsia ku mundu, ha kidaho.

³⁰Na ga li lwa ya lola imingiri, na visambo vyoku makono ga mbotso wewe, na lwa ya hulira makuva ga Rebeka mbotso wewe, na a vola, Mundu ya mbolera yaga na yaga; ya duka ku mundu; na henza, ya li na a singiye himbi na tsing'amia tsitsye ha kidaho.

³¹Naye ya vola, Wingire, ive wa Yahova ya gasidza; kigira ki u singira kyova? Kigira nombi inyumba, nobwiyangu bwetsing'amia.

³²Na mundu yingira mu inyumba, na a boholola tsing'amia misigo; na ya ha tsing'amia bunyasi nevyokulia, na amadzi gokwisavidza virenge vivye, na virenge vya vandu va li halala naye.

³³Na va i mu lombera vyokulia a lie; navutswa ya vola Si nyala kulia lwa nkikiri kumuvoiera inkuva ya mbeye nayo. Naye ya tivula, U vole.

³⁴Na ya vola, Inze mbeye mutumekiri wa Abrahamu.

³⁵Na Yahova u gasidzi mwami wange ligali, naye u duki kuva munene ligali: kandi u mu heye imitugu gyamagondi na tsing'ombe, na ifetha, na thahabu, na vatugwa vayai, na vatugwa vakana, na tsing'amia, na tsisukiri.

³⁶Kandi Sara mukali womwami wange yivulira mwami wange mwana muyai lwa ya duka kuva mukeere: na mwami wange u mu heye vyosi vya a veye navyo.

³⁷Kandi mwami wange ya nzisuhidza, na a vola, U ta vugulira mwana wange mukali ku vakana va Vakanani, ava mmenya mu kivala kyavo;

³⁸navutswa u la tsia mu imyumba ya dada wange, noku aviko vange, u vugulire mwana wange mukali.

³⁹Na inze nda volera mwami wange, Mbula mkana a la sula kubugirira kunonda.

⁴⁰Naye ya mbolera, Yahova wa ng'enda imbiri wewe, a la tuma ingelosi wewe a tsie halala nive, a gasidzire ulugendo lulwo; na ive u la vugulira mwana wange mukali mu viko vange, nomu inyumba ya dada wange:

⁴¹hene yaho u la bohololwa ku lyesuha lyange, lwa u duka mu viko vange; navo ni va vula kukuha mukana, ive u la bohololwa ku lyesuha lyange.

⁴²Na inze nda duka lero ndi ha kidaho, ni mbola, O Yahova, Nyasaye womwami wange Abrahamu, nu u va nu u ngasidzeye ulugendo lwange lwa ntsitsanga:

⁴³henza, nsingira himbi nekisenukiru kyamadzi; na ga duke kuva, mukana u twula mu lidala kudaha, wa mbolera, Nku goonya, mbe ku madzi gesiongo yoyo makekeke, nwe;

⁴⁴naye a la ntivulira, U nwe, kandi nda dahira tsing'amia tsitsyo: wa zana a ve niye wa Yahova a tovoleye mwana womwami wange.

⁴⁵Kandi lwa nda li ni ki vola mu mwoyo gwange, henza, Rebeka yadza nesiongo kwivega lilye; na ya sulunguta kuduka ha kisenukiru kyamadzi, na a daha: na inze nda mu volera, Mwadza, u mbe ku madzi, nwe.

⁴⁶Naye ya kola bwangu, na a tuula isiongo yeye, kutwula ku livega lilye nokuvola, U nwe, kandi nda nwehidza tsing'amia tsitsyo: ma nda nwa, na ya nwehidza tsing'amia kandi.

⁴⁷Na nda mu teva, ni mbola, U veye mwana wa bwaha? Naye ya mbolera, Mbeye mwana wa Bethueli, mwana wa Nahoro, wa Milika ya mwivulira: ma nda vika inono ku amolo gege, na visambo ku makono gege.

⁴⁸Na ndinaminya mutwe gwange, nokusigamira Yahova, na nsantidza Yahova, Nyasaye womwami wange Abrahamu, wa nyimirira ku inzira inungi kuvugula mukana wamwavo wa mwami wange kuva mukali womwana wewe.

⁴⁹Kunangwa ni mu va mu la kolera mwami wange ubulahi nageligali, mu mbolere: naho ni ga ta li ndiyo, mu mbolere; nzegirunkanye ku mukono mulungi kinga ku mukono mmosi.

⁵⁰Kunangwa Labani na Bethueli va tivula ni va vola, Inkuva yiyi twulanga ku Yahova: na kwinye si kunyala kukuvolera makuva madamano kinga malahi.

⁵¹Henza, Rebeka mwene a veye imbiri wowo, u mbugule, u tsie, a ve mukali womwana womwami wowo, kuli Yalhova ya vola.

⁵²Kunangwa lwa mutumekiri wa Abrahamu ya hulira makuva gavo, yinaminya mutwe gwigwe hasi imhiri wa Yahova.

⁵³Na mutumel iri ya twulidza viju vyefetha, na viju vyethahabu, na tsingubo, na a ha Rebeka: kandi ya ha mbotso wewe, na mama wewe, vindu vyobuguli budinyu.

⁵⁴Navo va lia ni va nwa, uyu na vandu va li halala naye, ni va gona ubudiku buno; na va vuka mugamba, na ya vola, Mu ntwulidze ntsie ku mwami wange.

⁵⁵Na mbotso wewe, na mama wewe va vola, Mukana a menye nekwinye madiku ga duka, mbula likumi; na inyima a la tsia.

⁵⁶Naye ya va volera, Mu ta ngaya, kigira Yahova u gasidzi ulugenda lwange; mu ntwulidze ntsie ku mwami wange.

⁵⁷Navo va mbolera, Ku la langa mukana, ku mu teve ku munwa gwigwe.

⁵⁸Navo va langa Rebeka, ni va mu teva, U la tsia nomundu uyu? Naye ya vola, Nda tsia.

⁵⁹Kunangwa va tuma Rebeka, mbotso wavo, nomleli wewe, na mutumekiri wa Abrahamu, navandu veve.

⁶⁰Na va gasidza Rebeka, ni va mboiera, Mbotso wetu, ive u ve mama wa tsielfu hali tsielfu makumi, kandi kisukululwi kikyo ki gumire kiribwa kya yavo ava va dunyiranga.

⁶¹Na Rebeka ya twula navakana veve, na va nina ku tsing'amia, na va londa mundu uyu: na mutumekiri ya hila Rebeka na a tsia.

⁶²Kandi Isaka ya twulira ku inzira ya Beerlahairoi; kigira ya li na a menya mu kivala kya Kusini.

⁶³Na Isaka ya tsia kuganaganira mu mulimi inyinga ya mgolova: na a ginga tsimoni tsitsye, na a lola, na henza, tsing'amia tsitsanga.

⁶⁴Kandi Rebeka ya ginga tsimoni tsitsye, na lwa ya lola Isaka, yika ku ing'amia yeye.

⁶⁵Na ya teva mutumekiri, Ni bwaha mundu uyu u gendanga mmulimi kuvugana nekwinye? Na mutumekiri ya vola Uyu nomwami wange: naye ya vugula ingubo yeye yokukunika ni yekunika mutwe.

⁶⁶Na mutumekiri ya volera Isaka vindu vyosi vya ya li kukola.

⁶⁷Na Isaka ya leta Rebeka na a mu vika mu lihema lya mama wewe Sara na a mu vugula, na Rebeka ya gwa mukali wewe; naye ya mu yanza: na Isaka ya leminywa mwoyo inyima welikudza lya mama wewe.