Read lulogooli Litanga 26 Bible Online

Litanga 26 - lulogooli bible

Litanga 26

¹Kunangwa inzala ya li mu kivala, lugano ku inzala yokutanga mmadiku ga Abrahamu. Kandi Isaka ya tsia ku Abimeleku mwami wa Vafilisiti, kuduka Gerari.

²Kandi Yahova ya loleka kuye, na a mu volera, U ta suhmguta kutsia Egepeti; u menye mu kivala kya nda ku volera:

³wikale mu kivala yiki, na inze nda va halala nive, na nda ku gasidza kigira nda ha ive na kisukululwi kikyo, vivala yivi vyosi, kandi nda singeridza lyesuha lyange lwa ndisuhira Abrahamu dada wowo;

⁴kandi nda meda ligali kisukululwi kikyo kuli tsing'ereng'ani tsyomigulu, kandi nda ha kisukululwi kikyo vivala yivi vyosi; na tsihiri tsyosi tsyelirova tsi la gasidzirwa mu kisukululwi kikyo

⁵kigira Abrahamu ya hulira mwoyo gwange, nokugumira lyeganehidza lyange, na malago gange, na miima gyange, na malagano gange.

⁶Kunangwa Isaka ya menya mu Gerari:

⁷na vandu va ha zana va mu teva amakuva gomukali wewe; naye ya vola, Uyu a veye mbotso wange: kigira ya tia kuvola, A veye mukali wange, gase avandu va ha zana va la nziita kigira Rebeka; kigira ligondo lilye lya li lilahi.

⁸Kunangwa lwa ya menya yo madiku manyingi, Abimeleku mwami wa Vafilisti ya henzera mu lidirisha, na a henza, na a lola Isaka na a kinanga na Rebeka mukali wewe.

⁹Na Abimeleku ya langa Isaka, na a mu volera, Henza, ligali uyu a veye mukali wowo: kigira ki wa vola, A veye mbotso wange? Na Isaka ya mu volera, Kigira nda vola, Gase nda kudza kigira uyu.

¹⁰Na Abimeleku ya vola, U ku koleye ki? Mulala ku avandu a lola si bu li budinyu kuva halala nomukali wowo, nkano wa ka leta ku kwinye ubuhimwa.

¹¹Kandi Abimeleku yeganehidza avandu vosi, na a vola Ku vosi u dira mundu uyu kinga mukali wewe ligali a liitwa.

¹²Na Isaka ya taga mulimi mu kivala zana, na a gesa ku muhiga yigwo kilala kya leta mia: na Yahova ya mu gasidza.

¹³Mundu uyu ya gwa munene, na a medeka lugali kuduka kuva munene ligali:

¹⁴Naye ya li nobutugi bwamagondi netsing'mbe, na vandu vanyingi: na Vafilisti va mu kendekera.

¹⁵Kandi vidaho vyosi vya vatumekiri va dada wewe va yava mu madiku ga Abrahamu dada wewe, Avafilisti va li ni va vitiyavira, nokuvizulitsa ubudohi.

¹⁶Kunangwa Abimeleku ya volera Isaka? U twule ku kwinye; kigira veye munene kuvita kwinye ligali.

¹⁷Na Isaka ya twula ho, na yombaka mahema gege mwivona lya Gerari na a menya yo.

¹⁸Na Isaka ya yava kandi vidaho vya va yava mu madiku ga Abrahamu dada wewe; kigira Vafilisti va li ni va vitiyavira inyima welikudza lya Abrahamu: kandi ya vi gulika ameta kuli ameta ga Dada wewe ya vi gulika.

¹⁹Kandi avatumekiri va Isaka va yava mwivona zana, na va nyola kidaho kya madzi ga senukanga.

²⁰Na avayi va Gerari va lembana na avayi va Isaka, ni va vola, Amadzi yaga ni getu: na ya gulika kidaho zana Eseku; kigira va hangalidzana naye.

²¹Kandi va yava kidaho kindi; na va lembanira ku yiki kandi: naye ya ki gulika Sitina.

²²Naye ya twula ha zana, na a tsia kuyava kidaho kindi; navo si va lembana ku yiki mba: ma ya ki gulika Rehobothu; na a vola, Kigira kalunu Yahova u ku heye ubwiyangu, na ku la va neliyama mu kivala yiki.

²³Na ya twula ha zana na yanegira kuduka Beer-sheba.

²⁴Na Yahova ya loleka kuye ubudiku zana, na a mu volera, Inze mbeye Nyasaye wa dada wowo Abrahamu: u ta tia mba, kigira inze mbeye halala nive, na nda ku gasidza, na a nda meda kisukululwi kikyo kigira mutumekiri wange Abrahamu.

²⁵Naye yombaka yo ubwali, nokwanira lieta lya Yahova, na yombaka yo lihema lilye: navatumekiri va Isaka va yava yo kidaho.

²⁶Hene yaho Abimeleku ya tsia kuye kutwula Gerari, halala na Ahuzathu mulina wewe, na Fikolu munene welihe lilye.

²⁷Na Isaka ya va teva, Kigira ki mudzi ku inze, na mwinye mwa ndunyira, ni mu nkunga iwenyu?

²⁸Navo va vola, Kwa lola bulahi Yahova a veye halala nive: na kwa vola, Lyesuha li ve hagati hetu kalunu, kali hagati hetu na ive, ku lombe lilagana halala nive;

²⁹u ta ku kolera kidamano, kuli kwinye kwa vula kukudira, kandi kuli kwa vula kukukolera kindu, navutswa kuli kwa ku kolera bulahi, kandi kwa ku ha munwa kutsia nemirembe: na ive kalunu u veye wa Yahova a gasidzi.

³⁰Naye ya va lombera lilia, navo va lia ni va nwa.

³¹Navo va vuka mabwebwe ni visuhirana avene navene: na Isaka ya sivulana navo, na va twula kuye nemirembe.

³²Na ga duka ku lidiku zana, avatumekiri va Isaka vadza, ni va mu volera makuva gekidaho kya va yava, ni va mu volera, Ku nyoye amadzi.

³³Naye ya ki gulika Shiba: kigira yaga lidala yili lya langwa Beer-sheba kuduka lero.

³⁴Na Esau lwa ya duka mihiga makumi gane ya leta Judith mukana wa Beeri Muhiti, kuva mukali wewe, kandi Basemathu mukana wa Elon Muhiti.

³⁵Na Isaka na Rebeka va verera mu myoyo gyavo kigira avakali yava.