Read lulogooli Litanga 27 Bible Online

Litanga 27 - lulogooli bible

Litanga 27

¹Na ga duka, Isaka lwa ya li musakulu, na tsimoni tsitsye tsya tsengera, kuduka si ya nyala kulola, ya langa Esau mwana wewe munene, na a mu volera, Mwana wange: naye ya bugira, Mbeye hano.

²Na ya vola, Henza, kalunu mbeye musakulu, si mmanya lidiku lyelikudza lyange.

³Kunangwa, mwadza, nkugoonya u vugule vyuma vivyo, imodia yoyo, na ubuta bubwo, u tsie mu bulimu, u nyolere inyama;

⁴u nombere vyokulia vilahi, kuli vya nyanza, u ndetere, ndie; mwoyo gwange gu ku gasidze ni nkikiri kukudza.

⁵Na Rebeka ya hulira lwa Isaka ya volera Esau mwana wewe. Na Esau ya tsia mu bulimu kuhima inyama nokugileta.

⁶Na Rebeka ya volera Yakobo mwana wewe, na a vola, Henza, nda hulira dada wowo na a volera Esau amwavo wowo, na a vola,

⁷U ndetere inyama yombulimu, u nombere vyokulia vilahi, ndie, nku gasidze imbiri wa Yahova imbiri welikudza lyange.

⁸Kalunu, mwana wange, u hulire mwoyo gwange kuli nku laga.

⁹U tsie mu kyayo, u ndetere vimeme vilahi viviri; na inze nombere dada wowo vyokulia vilahi, kuli vya a yanza:

¹⁰na ive u la letera dada wowo yivyo, a lie, a ku gasidze imbiri welikudza lilye.

¹¹Na Yakobo ya volera mama wewe Rebeka, Henza, Esau amitu wange a veye mundu wa amaswa manyingi, na inze mbiri gwange gu veye muterere.

¹²Mbula dada wange a la mbavatidza, na inze nda manyekana kuye mbeye mugadi; na ndenyolera likyenwa, mbule kunyola ligasidzwa.

¹³Na mame wewe ya mu volera, Likyenwa lilyo li ve ku inze, mwana wange; u hulire mwoyo gwange, u tsie kundetera vimeme.

¹⁴Naye ya tsia, na a vi vugula na a vi leta ku mama wewe: na mama wewe ya lomba vyokulia vilahi, kuli vya dada wewe ya yanza.

¹⁵Na Rebeka ya vugula tsingubo tsindahi tsya Esau mwana wewe munene, tsya ya li natsyo mu inyumba, na a vika ku Yakobo mwana wewe muke;

¹⁶kandi ya mu vika tsingubo tsyevimeme ku makono gege, noku ligoti lilye:

¹⁷na vyokulia vilahi nobukima vya ya li kulomba, ya vi vika mu mukono gwomwana wewe Yakobo.

¹⁸Naye ya tsia ku dada wewe, na a vola, Dada wange: naye ya bugira, Mbeye hano; U veye ibwaha, mwana wange?

¹⁹Na Yakobo ya volera dada wewe, Inze mbeye Esau, mwana wowo munene; Nkoli kuli wa ndaga: mwadza, u vuke, wikale u lie inyama yange yombulimu, mwoyo gugwo gu ngasidze.

²⁰Na Isaka ya teva mwana wewe, Ga li ndi ive u gi nyoye bwangu ndi, mwana wange? Naye ya vola, Kigira Yahova Nyasaye wowo ya nkonya.

²¹Na Isaka ya volera Yakobo, Mwadza, wisunde himbi, nku havitidze, mwana wange, nu u va nu u veye mwana wange ligali, Esau, naho mba.

²²Na Yakobo yisunda himbi ku dada wewe; naye ya mu havitidza, na a vola, Mwoyo gu veye mwoyo gwa Yakobo, navutswa makono ga veye makono ga Esau.

²³Naye si ya mmanya mba, kigira makono gege ga li namaswa, kuli makono ga amwavo wewe Esau: ma ya mu gasidza.

²⁴Na ya vola, Ive u veye mwana wange, Esau, ligali? Naye ya vola, Ni inze.

²⁵Naye ya vola, U ndetere himbi, na nda lia ku inyama yombulimu yo mwana wange, mwoyo gwange gu ku gasidze. Na a gi leta kuye himbi, naye ya lia: kandi ya mu letera iwaini, na a nwa

²⁶Na Isaka dada wewe ya mu volera, Wisunde himbi, u mbuse, mwana wange.

²⁷Naye yisunda himbi m a mbusa: naye ya hulira malusu getsingubo tsitsye, na a mu gasidza, na a vola, Henza, malusu gomwana wange Gu veye kuli malusu gomulimi gwa Yahova a gasidzi:

²⁸Kandi Nyasaye a ku he vyelime lyomigulu, Na vyobunulu bwelirova Nobunyingi bwobuswage, newaini indoto:

²⁹Avandu va tumekire ive, Na tsihiri tsi ku sigamire: Ive u ve mwami ku avamwavo vovo: Kandi avana va mama wowo va ku sigamire: Ku vosi a laama ive, a laamwe, Noku vosi a gasidza ive, a gasidzwe.

³⁰Na ga duka, nonoho, lwa Isaka ya mala kugasidza Yakobo, na Yakobo lwa a veye mitwula imbiri wa Isaka dada wewe, Esau amwavo wewe yingira na a twula mu lihima lilye.

³¹Naye kandi ya lomba vyokulia vilahi, na a letera dada wewe na ya volera dada wewe, Dada wange a vuke, a lie inyama yomwana wewe, mwoyo gugwo gu ngasidze.

³²Na Isaka dada wewe, ya mu volera, U veye ibwaha? Naye ya vola, Mbeye mwana wowo munene, Esau.

³³Na Isaka ya degera ligali muno, na a vola, Ni bwaha wa vugula inyama yombulimu, na ya ndetera, na inze mmali kulia ku vyosi nive nu u kikiri kuduka, na mmu gasidzi? Yee, naye a la gasidzwa.

³⁴Na Esau, lwa ya hulira makuva ga dada wewe, ya hanzuka, na a lira lilira linene lyobululu, na a volera dada wewe, U ngasidze, inze kandi, O dada wange.

³⁵Naye ya vola, Amwavo wowo yadza nobugadi nokwigulira ubugasu bubwo.

³⁶Naye ya vola, Si ya gulikwa lieta lilye Yakobo nobulungi? Kigira hali kaviri wingiye mbugono bwange: ya vugula miyandu gyobunene bwelivulwa lyange, na henza, kalunu u vuguye ubugasu bwange. Ya vola, Si u tigaye nobugasu bu ve bwange?

³⁷Na Isaka ya tivula na a volera Esau, Mmu koleye munene ku ive, navamwavo veve mmu heye kuva avatumekiri veve; mmwigutidzi nobuswage newaini: na kalunu nda ku kolera ki, mwana wange?

³⁸Na Esau ya teva dada wewe, U veye neligasidza lilala lyeng'ine, dada wange? U ngasidze, inze kandi dada wange. Na Esau ya ginga mwoyo gwigwe na a lira.

³⁹Na Isaka dada wewe, ya tivula na a mu volera Henza, limenya lilyo li la va lyobunulu bwelirova, Na lyelime lyomigulu;

⁴⁰U la hindira nekivavi kikyo, na u la tumekira amwavo wowo; Na ga la duka, lwa u li twula kuye, U la vunanya inira yeye ku ligoti lilyo.

⁴¹Na Esau ya dunyira Yakobo kigira ligasidza lya dada wewe ya mu gasidza: na Esau ya vola mu mwoyo gwigwe, Madiku gelisyomera dada wange ga veye himbi; inyinga zana ndiita Yakobo amwavo wange.

⁴²Na Rebeka ya volwa makuva ga Esau mwana wewe munene; naye ya langa Yakobo mwana wewe muke, na a mu volera, Henza, Esau amwavo wowo yeleminya mwoyo gwigwe ku ive, yenya kukwiita.

⁴³Kalunu, kigira yaga, mwana wange, u hulire livola lyange; singira, wiruke kutsia ku Labani mbotso wange, ku Harani;

⁴⁴u menye yo naye madiku makekeke, ubutima bwamwavo wowo bu luhe bu kalike;

⁴⁵kuduka livihirirwa lyamwavo wowo li twuli ku ive, na yivirira aga wa mu kolera: inyinga zana nda ku leta u twule yo: kigira ki mu gota ku inze mwombi lidiku lilala?

⁴⁶Na Rebeka ya volera Isaka, Ubuhindiri bwange bu luhi kigira avakana va Hethu; ni i va Yakobo a vugula mukali ku vakana va Hethu, kuli avakana yava vekivala, ubuhindiri bwange bu la va nobulahi ki?