Read lulogooli Litanga 28 Bible Online

Litanga 28 - lulogooli bible

Litanga 28

¹Na Isaka ya langa Yakobo, na a mu gasidza, na a mu laga, na a mu volera, U ta vugula mukali ku vakana va Kanani.

²Vuka, u tsie Padan-aram, ku inyumba ya Bethueli dada wa mama wowo; u vugule muku vakana va Labani mbotso wa mama wowo.

³Kandi Nyasaye Wa Nyala Vyosi a ku gasidze, a ku kole kuva nolwivulu iunyingi, nokukumeda ligali, u duke kuva kiduma kyetsihiri;

⁴kandi a ku he ubugasu bwa Abrahamu, ku ive noku kisukululwi kikyo halala na ive; ive u duke kunyola mivandu gyekivala kya u menyanga mu, kya Nyasaye ya ha Abrahamu.

⁵Na Isaka ya siivulana na Yakobo: naye ya tsia Padanaram ku Labani mwana wa Bethueli Musiria, mbotso wa Rebeka, mama wa Yakobo na Esau.

⁶Kunangwa Esau ya lola Isaka u gasidzi Yakobo nokumuhila Padan-aram, kuvugula yo mukali; kandi lwa ya mu gasidzanga ya mu laga, na a vola, U ta vugula mukali ku avakana va Kanani;

⁷kandi Yakobo ya hulira dada wewe na mama wewe, naye u mali kutsia Padan-aram:

⁸na Esau ya lola dada wewe si ya yanzidzwa navakana va Kanani;

⁹ma Esau ya tsia ku Ishmaeli, na a vugula Mahalathu mwana wa Ishmaeli, mwana wa Abrahamu, mbotso wa Nebaiothu, kuva mukali wewe wundi, ku vakali va ya li navo.

¹⁰Kunangwa Yakobo ya twula Beersheba, na a henza ku luvega lwa Harani.

¹¹Ya duka hango halala, na a gona ho ubudiku, kigira liuva lya li kuyera; na a vugula ligina lilala lya ha zana, na a vika kulyo mutwe gwigwe, na a gona tsindolo ha zana.

¹²Na ya lota maloto, na henza, ingasi i singeridzeywi ku lirova na isonga yayo i duka migulu: na henza, tsingelosi wa Nyasaye va ninanga nokwikira kuyo.

¹³Na henza, Yahova u singiye igulu kuyo, na a vola, Inze mbeye Yahova, Nyasaye wa dada wowo Abrahamu, na Nyasaye wa Isaka: kivala kya u goni mu, nda ku ha, na kisukululwi kikyo;

¹⁴kandi kisukululwi kikyo ki la va kuli lugukyi lwelirova, na ive u la landa ku luvega lwemadioli, noku luvega lwevugwe, noku luvega lwekasikasini, noku luvega lwekusini: kandi avandu vosi velirova va la gasidzirwa mu ive nomu kisukululwi kikyo.

¹⁵Kandi henza, mbeye halala na ive, na nda ku linda hosi ha u tsitsanga, kandi nda ku leta kandi ku kivala yiki; kigira si nda ku leka mba, kuduka nduhe nku kolere gosi ga nda ku volera.

¹⁶Na Yakobo ya vuka mu tsindolo tsitsye, na a vola, Ligali Yahova a veye hango hano, na inze si nda manya.

¹⁷Na ya tia, na a vola, Hano ha tihidzanga ndi si ha la vula kuva inyumba ya Nyasaye, kandi yiki ni kiribwa kyomigulu.

¹⁸Na Yakobo ya vuka mabwebwe, na a vugula ligina lya ya vika ku mutwe gwigwe, na a li singeridza li ve munara, na tsuka kulyo maguta.

¹⁹Kandi lieta lya ha zana ya gulika Beth-eli; navutswa lieta lya ha zana ku matsyambiri lya li Luz.

²⁰Na Yakobo ya singeridza lilagana, na vola Nyasaye na a va na a veye halaia na inze, nokuninda mu inzira ya ntsitsanga, nokumpa ubukima bwokulagira, ne tsingubo tsyokwivika,

²¹nduke kwirana nemirembe mu inyumba ya dada wange, hene yaho Nyasaye a la va Nyasaye wange

²²na ligina lya nsingeridzi kuva munara, li la va inyumba ya Nyasaye: kandi ku vyosi vya u la mba, inze ligali nda ku ha kidieli kyelikumi.