Read lulogooli Litanga 33 Bible Online

Litanga 33 - lulogooli bible

Litanga 33

¹Kandi Yakobo ya ginga tsimoni tsitsye, na a lola, henza, Esau yadzanga, na vandu tsimia tsine halala naye. Naye ya gavula avana ku Leah, noku Raheli, noku avakana avatugwa vaviri.

²Na ya vika avakana avatugwa na avana vavo imbiri, na inyima ya vika Leah na avana veve, na Raheli na Yosefa inyima wa vosi.

³Naye mwene yemira imbiri wavo, na yinama mwene kuduka hasi hali gatano na kaviri, kuduka lwa yisunda himbi ku amwavo wewe.

⁴Na Esau ya nyagula kuvugana naye, na a mu kuberera, na a mu gwira mu ligoti, na a mu busa: navo va lira.

⁵Naye ya ginga tsimoni tsitsye, na a lola avakali na avana; na a teva, Ni vaha yava ava veye halala nive? Naye ya vola, Va veye avana va Nyasaye ku tsimbabasi tsitsye ya ha mutumekiri wowo.

⁶Kandi avakana vatugwa visunda himbi, yava na avana vavo, ni vinama avene.

⁷Kandi Leah na avana veve visunda himbi, navo vinama avene: kandi inyima Yosefa yisunda himbi na Raheli, ni vinama avene.

⁸Naye ya teva, Ku lihe yili lyosi lya nda vugana nalyo, ive u vola ki? Naye ya vola, Nduke kunyola tsimbabasi imbiri wa mwami wange.

⁹Na Esau ya vola, Inze mbeye navyo vi duki, amitu wange; kya u veye nakyo ki ve kikyo.

¹⁰Na Yakobo ya vola, Auwa, ni mba ni nyoye tsimbabasi imbiri wowo, mwadza, u vugule kihaanwa mmukono gwange; kigira ndoli mumoni mumwo, kuli mundu a lolanga mumoni mwa Nyasaye, na inze nyanzeki ku ive.

¹¹Mwadza, u vugule kihaanwa kyange kya u leteywi; kigira Nyasaye u nkoleye tsimbabasi tsinyingi, kandi kigira mbeye navyo vi duki. Naye ya mu goonya, na ya vugula.

¹²Na Esau ya vola, Genda ku tsie ulugendo lwetu, na inze ndimirira imbiri wowo.

¹³Naye ya mu volera, Mwami wange a manya avana va veye vadoto, na magondi netsing'ombe tsya mbeye natsyo tsi nyunya, ni va tsi gendidza kuvita kali ga dukanga lidiku lilala, vyayo vyosi vi la hera.

¹⁴Mwadza, mwami wange, yimire imbiri womutumekiri wewe: na inze nda londa galaha, kuli ligenda lyemitugu gyi veye imbiri wange, kandi kuli ligenda lya avana, nduhe nduke ku mwami wange ha Seiru.

¹⁵Na Esau ya vola, Mbula ndeke avalala ku yavo ava mbeye navo halala nive. Naye ya vola, Kigira ki? Nduke kunyola tsimbabasi imbiri womwami wange.

¹⁶Kunangwa Esau yirana lidiku zana, na a tsia Seiru.

¹⁷Na Yakobo ya samula, na a tsia Sukothu, na yombaka yo inyumba, nokulomba yo vidioli vyemitugu gyigye: kigira yaga ha zana ha langwa Sukothu.

¹⁸Na Yakobo ya duka nemirembe mu lidala lya Shekem, mu kivala kya Kanani, lwa ya twula Padan-aram; na ya lomba limenya lilye himbi ku lidala.

¹⁹Naye ya gula mulimi gwa yombaka ho lihema lilye, mu mukono gwa avana va Hamoru, dada wa Shekem, nevidonye vyefetha mia.

²⁰Na yombaka ho ubali, na a bu gulika El-Elohe-Israeli.