Read lulogooli Litanga 4 Bible Online

Litanga 4 - lulogooli bible

Litanga 4

¹Na Adamu ya manya Hawa mukali wewe; na ya va inda, na yivula Kaini, na a vola, Nnyoye musatsa nobukonyi bwa Yahova.

²Kandi yivula amwavo wewe Habili. Na Habili ya li mwayi wamagondi, navutswa Kaini ya li mulimi we lirova

³inyinga ya madiku yago Kaini ya letera Yahova isadaka yelyama lyomulimi.

⁴Kandi Habili ya leta ku vimeme vya imbiri vyekyayo kikye, noku maguta gavyo. Na Yahova ya bugirira Habili na isadaka yeye;

⁵navutswa si ya bugirira Kaini na isadaka yeye. Na Kaini ya vihirirwa ligali, na a kunnya mu tsimoni tsitsye.

⁶Na Yahova ya volera Kaini, Kigira ki u vihirirwa? Kandi kigira ki u kunnya mu tsimoni?

⁷Nu u va nu u kola bulahi, si u la bugirirwa? Kandi nu u ta kola bulahi kihaanwa kyobwoni ki gona ha kiliango. Na liyenya lyakyo li la va ku ive, nive u la va netsingulu kukyo.

⁸Na Kaini ya volera Habili amwavo wewe. Na ga duka, lwa va li mmulimi, Kaini ya twulira Habili amwavo wewe, na a mwiita.

⁹Na Yahova ya volera Kaini, Amwavo wowo Habili a veye haliha? Naye ya vola, Si mmanya mba: inze mbeye mulindi wa amwavo wange?

¹⁰Kandi ya mu teva, U koli kindu ki? Mwoyo gwa masahi ga amwavo wowo gu kupanga lwanga ku inze mu lirova.

¹¹Kalunu u laameywi kutwula mu iirova, li kunuye munwa gwalyo kuvugula amasahi ga amwavo wowo ku mukono gugwo;

¹²kutwula kalunu lwa u lima, si li la leta ku ive tsingulu tsyalyo; u la va mwivisi nomugendagendi ku lirova.

¹³Na Kaini ya volera Yahova, Likalagirwa lyange ni linene kuvita lya nyala.

¹⁴Henza, u nkungi ku lirova; kandi mbiseywi kutwula mmoni mwumwo; na nda va mwivisi nomugendagendi ku lirova; na ga la va, ku vosi u ndola a la nziita.

¹⁵Na Yahova ya mu volera, Kigira yaga ku vosi u liita Kaini, kisalya ki la vanzwa kuye hali katano na kaviri. Kandi Yahova ya vika kiloleru ku Kaini, gase mulala ku vosi u mu nyola a la mwiita.

¹⁶Na Kaini ya twula imbiri wa Yahova, na a menya mu kivala kya Nodu, ki veye ivugwe wa Edeni.

¹⁷Na Kaini ya manya mukali wewe; na a va inda, na yivula Enoka: naye yombaka lidala, na a li gulika kuli lieta lya mwana wewe, Enoka.

¹⁸Na Enoka yivula Iradu; na Iradu yivula Mehujaelu; na Mehujaelu yivula Methusaelu; Methusaelu yivula Lameku.

¹⁹Na Lameku ya leta avakali vaviri; lieta lya mulala ya langwa Ada, na wundi ya langwa Zilla.

²⁰Na Ada yivula Jabalu: uyu ya li ise wa va menyanga mu mahema nokuva netsing'ombe.

²¹Kandi amwavo wewe ya langwa Jubali: uyu niye ise wa yavo ava kupanga inangoli na indulele.

²²Kandi Zilla yivula Tubalikaini, mutuli wevyogi vyosi vyomugasa na vyekivya: na mbotso wa Tubali-kaini ya li Naama.

²³Na Lameku ya volera avakali veve: Ada na Zilla, hulira mwoyo gwange; Mwinye avakali va Lameku, mu tegidze amatu ku livola lyange: Kigira nziiti wa kuya inze, Na musoleli wa nkindukidza;

²⁴Na Kaini na a va ni ya vanzirwa kisalya hali katano nakaviri, Ligali Lameku a la vanzirwa hali makumi katano na gaviri na katano na kaviri.

²⁵Na Adamu ya manya mukali wewe kandi; na yivula mwana muyai, na a mu gulika Sethu: na a vola, Kigira Nyasaye u mbeye lwivulu ha bugono bwa Habili; kigira Kaini ya mwiita.

²⁶Kandi Sethu yivula mwana muyai; na a mu gulika Enosh: mu madiku yago avandu va tanga kwanira lieta lya Yahova.