Read lulogooli Litanga 40 Bible Online

Litanga 40 - lulogooli bible

Litanga 40

¹Kunangwa inyima wevindu yivi, munwehidzi womwami wa Egepeti kandi mudeki wewe va hyola ku mwami wavo mwami wa Egepeti.

²Na Farao ya vihirirwa na vanyampara veve vaviri, ku munene wa avanwehidzi, noku munene wa avadeki.

³Na ya va vika kulindwa mu inyumba yonunena wa valindi mu inyumba yavahambe, ha Yosefa ya bofwa.

⁴Na munene wavalindi ya va vika ku Yosefa, naye ya va linda: navo va menya mu buhambe inyinga i duki.

⁵Navo vombi va lota maloto, sa mulala liloto lilye, mbudiku bulala, sa mulala kuli livuula lyeliloto lilye, munwehidzi nomudeki womwami wa Egepeti, ava bofwa mu inyumba yavahambe.

⁶Na Yosefa yingira mugamba ha va li, na a lola, henza, va vereranga.

⁷Naye ya teva avanyampara va Farao ava li mu lilindwa mu inyumba ya munene wewe, na a vola, Kigira ki mu vereranga lero?

⁸Navo va mu volera Ku loti maloto, na si ha veye nomundu u nyala kukuvuulira. Na Yosefa ya va volera, ligirunkanya si li veye lya Nyasaye? Mwadza, mu mbolere.

⁹Na munwehidzi munene ya volera Yosefa liloto lilye, na a mu volera Mu liloto lyange, henza, muzabibu gwa li imbiri wange;

¹⁰na mu muzabibu zana tsya li mu tsisiya tsivaka: nagwo gwa li kuli gu sibukanga, na vimuli vyagwo vya lang'ama; na buvya bwama mazabibu amengu:

¹¹na kikombe kya Farao kya li mu mukono gwange, na nda vugula mazabibu, nokukamira mu kikombe kya Farao, nokuha Farao kikombe mu mukono gwigwe.

¹²Na Yosefa ya mu volera, Livuula lyalyo ni yili: tsisya tsivaka tsi veye madiku gavaka;

¹³na inyima wa madiku gavaka Farao a la ginga mutwe gugwo nokwiranya ive ha bugono bubwo: na ive u la haana kikombe kya Farao mu mukono gwigwe, kuli matsyambiri lwa ive wa li munwehidzi wewe.

¹⁴Navutswa u nzidzulitse, lwa u konywa bulahi, nku goonya, u mbere tsimbabasi, u ntale imbiri wa Farao nokuntwulidza mu inyumba yiyi

¹⁵kigira ligali ndibwa, nokutwulidzwa mu kivala kya Vahebraina: na hano kandi si nda kola kindu kali kilala kya va nyala kumbikira mu inyumba ya hasi.

¹⁶Kandi mudeki munene lwa ya lola livuula zana li veye lilahi, ya volera Yosefa, Inze kandi nda li mu liloto lyange, na henza, tsideru tsivaka tsyemikati milavu tsya li ku mutwe gwange:

¹⁷na ku luderu lwegulu ha li netsing'ano tsyosi tsya videkeywi vya Farao; na manyonyi ga lia videkeywi zana ku luderu lwa li ku mutwe gwange.

¹⁸Na Yosefa ya mu tivulira, na a vola, Livuula lyago ni yili: tsideru tsi veye madiku gavaka;

¹⁹na inyima wa madiku gavaka Farao a la ginga mutwe gugwo gu twule ku ive, nokukusunga ku musala; na manyonyi ga la lia inyama yombiri gugwo.

²⁰Kunangwa lidiku lyakavaka, lya li lelivulwa lya Farao, na a dekera avatumekiri veve vosi: naye ya ginga mutwe gwomunene wa vanwehidzi na gwomunene wa vadeki hagati ha avatumekiri veve.

²¹Na yiranya munene wa vanwehidzi ku bugono bwibwe; naye ya haana kikombe mu mukono gwa Farao: navutswa munene wa vadeki ya mu sunga: kuli wa Yosefa ya va vuulira.

²²Navutswa munene wa avanwehidzi ya vula kwidzulitsa Yosefa, navutswa ya mwivirira.