Read lulogooli Litanga 42 Bible Online

Litanga 42 - lulogooli bible

Litanga 42

¹Kunangwa Yakobo ya lola ubuswage bu veye mu kivala kya Egepeti, na Yakobo ya volera avana veve, Kigira ki mu henzana butswa avene na avene?

²Naye yavola, Henza, mbulira ubuswage bu veye mu Egepeti: mu sulungute yo, mu ku gulire yo; ku ve mwoyo, ku vule kukudza.

³Na avamwavo va Yosefa likumi va sulunguta Egepeti kugula ubuswage.

⁴Navutswa Benjamini, amwavo wa Yosefa, Yakobo ya vula kumuhila halala namwavo veve; kigira ya vola, Gase kindu kivi ki la mu gwira

⁵Na avana va Israeli va duka mu vandi ava tsia yo kugula: kigira inzala ya li mu kivala kya Kanani.

⁶Na Yosefa ya li mwami ku kivala; niye wa gulidza avandu vosi avekivala. Na avamwavo, va Yosefa va duka, na va mwinamira kudukidza mumoni mwavo hasi.

⁷Na Yosefa ya lola avamwavo veve, na a va manya, navutswa yekola mwene wundi mundu kuvo, na a volerana navo nobululu; na ya va teva, Mwinye mu twuli haliha? Navo va vola, Ku twuli mu kivala kya Kanani kugula vyokulia.

⁸Na Yosefa ya manya avamwavo veve, navutswa si va mu manya mba.

⁹Yosefa yidzulitsa maloto ga ya lota ku makuva gavo, na a va volera, Mu veye avaluti: mu duki kuluta kyahonyo kyekivala.

¹⁰Navo va mu volera, Auwa mwami wange, navutswa kwinye avatumekiri vovo ku duki kugula vyokulia.

¹¹Kwinye kwosi ku veye avana vomundu mulala; ku veye avasuuvirifu, avatumekiri vovo si ku veye avaluti mba.

¹²Naye ya va volera, Auwa, navutswa mu duki kuluta kyahonyo kyekivala.

¹³Navo va vola, Kwinye avatumekiri vovo ku veye avamwavo likumi na vaviri avana vomundu mulala mu kivala kya Kanani; na henza, mukogoti a veye halala na dada wetu lero, na mulala si a veye ho mba.

¹⁴Na Yosefa ya va volera, Ga veye kuli mmu voleye, ni mboia, Mu veve avaluti:

¹⁵ku yaga mu la manyeridzwa: ku livamwoyo lya Farao, si mu la twula hano mba, mukogoti wenyu na a va na a vula kuduka hano.

¹⁶Mu tume mulala ku mwinye, a tsie kuleta amwavo wenyu, na mwinye mu la bofwa, amakuva genyu ga manyeridzwe, ni mu va ni mu veye ava vola ageligali naho mba: kinga, ku livamwoyo lya Farao, ligali mu veye avaluti.

¹⁷Naye ya va boha halala madiku gavaka.

¹⁸Ku lidiku lya kavaka Yosefa ya va volera, Mu kole ndina na mu ve mwoyo; kigira inze ntia Nyasaye:

¹⁹Ni mu va ni mu veye avandu aveligali, mulala ku avamwavo venyu a bofwe mu inyumba yavahambe yenyu; navutswa mwinye mu tsie kuhilira avenzala vetsinyumba tsyenyu, ubuswage:

²⁰na mu ndetere amwavo wenyu mukogoti; na ndina amakuva genyu ga la manyeridzwa, na mwinye mu la vula kukudza. Navo va kola ndiyo.

²¹Navo va volerana avane na avene, Ligali ku veye ne kivi ku amwavo wetu, kigira kwa lola ubusaliri bwomwoyo gwigwe, lwa ya ku goonya, ni ku vula kumuhulra; kigira yaga ubusaliri yibu bu duki ku kwinye.

²²Na Rubeni ya va tivulira, na a vola, Si nda mu volera, ni mbola Mu ta kola kindu ku mwana; na mwinye si mwa bugirira kumbulira? Kunangwa kandi amasahi gege ga vanzangwa

²³Navo si va manya Yosefa ya va hulira; kigira mugirunkanyi ya li hagati havo.

²⁴Na yegirunkanya mugongo, na a lira; ma yirana kuvo na a va volera makuva, na a vugula Simeoni kuvo, na a mu boha imbiri wavo.

²⁵Ma Yosefa ya haana munwa kwizulitsa tsimuya tsyavo ubuswage, kandi sa mulala yiranyirwe if etha yeye mmuya yeye, kandi va hebwe vyokulia vyoku inzira: na va kolerwa ndiyo.

²⁶Navo va vika tsimuya tsyobuswage ku tsisukiri tsyavo, ni va tsia.

²⁷Na mulala kuvo lwa ya kunula imuya yeye ha va gona kulihidza isukiri yeye, ya lola ifetha yeye; na henza, ya li mmunwa gwemuya yeye.

²⁸Na ya volera avamwavo veve Nzeranyeywi ifetha yange; na henza, i veye mu imuya yange: na mwoyo gwavo gwa kudza, navo va henzana nokudegera, ni va vola, Ni kinduki yiki kya Nyasaye a ku koleye?

²⁹Na va duka ku Yakobo dada wavo mu kivala kya Kanani, na va mu volera makuva yaga gosi aga va gwira; ni va vola,

³⁰Mundu uyu, mwami wekivala, ya volerana nekwinye nobululu, na a ku lola ku veye avaluti ava lutanga kivala.

³¹Na kwa mu volera, Kwinye ku veye avasuuvirifu; si ku veye avaluti mba:

³²ku veye avamwavo likumi na vaviri, avana va dada wetu; mulala si a veye ho, na mukogoti a veye halala na dada wetu mu kivala kya Kanani.

³³Na mundu uyu munene wekivala, ya ku volera, Nda manya mu veye avasuuvirifu ku ikuva yiyi: mu leke amwavo wenyu mulala ku inze, ma mu hiie ubuswage bwokukonya inzala yetsinyumba tsyenyu, mu tsie;

³⁴ni mu ndetere amwavo wenyu mukogoti: hene yaho nda manya si mu veye avaluti, navutswa mu veye avasuuvirifu: kandi nda mu ha amwavo wenyu, na mwinye mu la kiranya mu kivala.

³⁵Kunangwa lwa vitulula ubuswage bwavo, henza, sa mulala liboho lyefetha yeye lya li mu imuya yeye: yava na dada wavo lwa va lola maboho gefetha gavo, va tia.

³⁶Na Yakobo dada wavo ya va volera Mu mbereridzi ku avana vange Yosefa si a veye ho, na Simeoni si a veye ho, na mu la hila Benjamini: yaga gosi ga veye ku inze.

³⁷Na Rubeni ya volera dada wewe, na a vola, Wiite avana vange vaviri, ni mba ni mbula kumuleta ku ive: u mu vike mu mukono gwange, na inze nda mu leta ku ive kandi.

³⁸Naye ya vola, Mwana wange si a la sulunguta na mwinye mba; kigira anwavo wewe u kudzi, naye u tigaye muderwa: ni i va kivi ki gwa ku uyu ku inzira ya mu tsia ku, kunangwa mwinye mu likidza tsimbudze tsyange kuduka mu kilindwa mu buvereri.