Read lulogooli Litanga 44 Bible Online

Litanga 44 - lulogooli bible

Litanga 44

¹Kandi ya laga mulindi wenyumba yeye, na a vola, Wizulitse vyokulia tsimuya tsya avandu yava, kuli va nyala kuginga, kandi u vikire mundu sa mulala ifetha yeye mu imuyayeye.

²Kandi kikombe kyange, kikombe kyefetha, u vike mu imuya yomukogoti, halala nefetha, yeye yobuswage. Naye ya kola kuli likuva lya Yosefa ya vola.

³Na lwa bwakya mugamba, avandu yavo va hebwa munwa va tsie halala netsisukiri tsyavo.

⁴Lwa va mala kutwula mu lidala, ni va kikiri kwisunda ihale, Yosefa ya volera mulindi wenyumba yeye, U londerere avandu yava; na lwa u va nyola, u va volere, Kigira ki mu tungi ubudamano ku bulahi?

⁵Henza yiki si ki veye kyomwami wange a nweranga mu, kandi na geligali ni yiki kya a tooveranga ku? Mu koli ubudamano mu likola yaga.

⁶Naye ya va nyola, na a va volera makuva yaga.

⁷Navo va mu volera Kigira ki u vola makuva yaga, mwami wetu? Avatumekiri vovo si va nyala kukola kuli yaga.

⁸Henza, ifetha ya kwa nyola mu tsimuya tsyetu, kwa ku letera kandi kutwula mu kivala j kya Kanani: ku nyala ndi kwiba mu inyumba yomwami wowo if etha kinga ithahabu?

⁹Uyu u nyoleka nakyo mu kwinye avatumekiri vovo, wa zana a kudze, kandi kwinye kwosi ku la va avatugwa vomwami wange.

¹⁰Naye ya vola, Kalunu ga ve kuli makuva genyu: uyu u nyoleka nakyo a la va mutugwa wange; na mwinye mu la va bugira kindu.

¹¹Ma va kola bwangu, ni vikidza sa mulala imuya yeye hasi, kandi sa mulala ya kunula imuya yeye.

¹²Naye yenya, na a tanga ku munene kuduka ku mukogoti: na kikombe kya nyolwa mu imuya ya Benjamini.

¹³Hene yaho va tandula tsingubo tsyavo, ni va niinya misigo sa mulala ku isukiri yeye, nokwirana mu lidala.

¹⁴Na Yuda navamwavo veve va duka mu inyumba ya Yosefa; naye ya li na a kikiri yo: navo va gwa hasi imbiri wewe.

¹⁵Na Yosefa ya va teva, Ni likola ki lya mu nkoleye? Si mu manya mundu kuli inze a nyala ligali kutoova?

¹⁶Na Yuda ya vola, Ku nyala kukuvolera ki, mwami wange? Ku veye namakuva ki? Ku nyala ndi kwetwulidza? Nyasaye u lang'aminye ubudamano bwa vatugwa vovo: henza, ku veye avatugwa vomwami wange, kwinye na uyu wekikombe ki nyoleki mu makono gege.

¹⁷Naye ya vola, Si nyala kukola ndi mba: mundu uyu wekikombe ki nyoleki mu makono gege, niye a la gwa mutugwa wange; navutswa ku mwinye, mwirane ku dada wenyu nemirembe.

¹⁸Hene yaho Yuda yisunda himbi kuye, na a vola, O mwami wange, Nku goonya u ndeke inze mutumekiri wowo, mbole likuva mu amatu gomwami wange, na ubutima bwubwo bu ta duka ku mutugwa wowo; kigira ive u veye kuli Farao.

¹⁹Mwami wange ya teva avatugwa veve, na a vola, Mu veye na dada, kinga amwavo?

²⁰Na kwinye kwa volera mwami wange, Ku veye na dada, a veye musakulu, kandi a veye nomwana wobusakulu bwibwe, mkeku; na amwavo wewe wa kudza, naye u tigaye mwana muderwa wa mama wewe; na dada wewe a mu yanza.

²¹Na ive wa volera avatugwa vovo, Mu mu lete ku inze, nduke kumulola

²²Na kwinye kwa volera mwami wange, Mwana si a nyala kuleka dada wewe, kigira ni i va uyu a leka dada wewe, dada wewe a la kudza.

²³Na ive wa volera avatugwa vovo, Bugira amwavo wenyu mukogoti kusulunguta halala nemwinye, si mu la lola mumoni mwange mba.

²⁴Kunangwa lwa kwanegira, nokuduka ku mutumekiri wowo dada wange, kwa mu volera makuva gomwami wange.

²⁵Ma dada wetu ya vola, Mu tsie kandi, mu ku gulire vyokulia vikekeke.

²⁶Na kwa mu volera, Si ku nyala kusulunguta: ni i va amwavo wetu mukogoti a veye halala nekwinye, ku la sulunguta; kigira si ku nyala kulola mumoni mwomundu uyu, bugira amwavo wetu mukogoti kuva halala nekwinye.

²⁷Na mutumekiri wowo dada wange ya ku volera, Mwinye mu manya mukali wange ya nzivulira avana vaviri avayai:

²⁸na mulala ya twula ku inze na nda vola, Ligali a donyeywi; na si nda mu lola kandi:

²⁹mwinye kandi ni mu hila uyu kutwula ku inze, na ubudamano ni bu gwa kuye, mu likidza tsimbudze tsyange mu kilindwa mu ubuvereri.

³⁰Kunangwa lwa ndi tsia ku mutumekiri wowo dada wange, na mwana na a ta li halala ninze, kigira mwoyo gwigwe gu hambana nomwoyo gwomwana;

³¹hene yaho, lwa a lola mwana si a veye halala nekwinye, a la kudza: na kwinye avatumekiri vovo ku likidzd tsimbudze tsyomutumekiri wowo dada wetu mu kilindwa nobuvereri.

³²Kigira inze mutumekiri wowo ndekola kihambiriru ku dada wange mu bugono bwomwana uyu, ni mbola, Ni mbula kumwirannya ku ive, hene yaho ndingira mu likyenwa ku ive dada wange mihiga nemihiga.

³³Kunangwa kalunu nku goonya, leka inze mutumekiri wowo mmenye mutugwa womwami wange mu bugono bwomwana uyu; na u leke mwana a tsie halala naavamwavo veve.

³⁴Kigira inze nyala ndi kutsia ku dada wange, na mwana na a ta li halala ninze? Gase nda lola ubudamano bu la duka ku dada wange.