Read lulogooli Litanga 45 Bible Online

Litanga 45 - lulogooli bible

Litanga 45

¹Kunangwa Yosefa si ya nyala kwigalira imbiri wavo vosi ava singira himbi naye; na ya hanzuka, na a vola, Vosi va twule imbiri wange. Na si ha tigala nomundu wa singira halala naye, lwa Yosefa yevuula ku avamwavo veve.

²Naye ya hanzuka na a lira: na Avaegepeti va hulira, na avenyumba ya Farao va hulira.

³Na Yosefa ya volera avamwavo veve, Inze mbeye Yosefa; dada wange a kiri mwoyo? Na avamwavo veve si va nyala kumutivulira; kigira va henda mwoyo imbiri wewe.

⁴Na Yosefa ya volera avamwavo veve, Mmu goonya, mwisunde himbi. Navo visunda himbi. Naye ya vola, Inze mbeye Yosefa amwavo wenyu, wa mwa gulidza a tsie Egepeti.

⁵Na kalunu mu ta verera mba, kandi mu tevihirirwa avene, kigira mwa ngulidza hano: kigira Nyasaye ya nzimiridza imbiri wenyu kuhonya livamwoyo lyavandu.

⁶Kigira inzala i veye mu kivala mihiga yigyi gyiviri: kandi gyi tigaye mihiga gyitano, mu yigyi si ha la va nelilima, kinga ligesa.

⁷Na Nyasaye ya nzimiriridza imbiri wenyu kumuhonyira avelitigala mu lirova, nokumuhonya mu ve mwoyo nelihonywa linene.

⁸Kunangwa si mwa li mwinye mwa ndeta hano, navutswa Nyasaye: naye u nkoli kuva dada ku Farao, nokuva mwami wenyumba yeye yosi, na mwamehi ku kivala kyosi kya Egepeti.

⁹Mu kole bwangu, mu tsie ku dada wange, mu mu volere, Mwana wowo Yosefa a vola ndina, Nyasaye u nkoli mwami wa Egepeti wosi: u sulungute u duke ku inze, u ta lindagira mba;

¹⁰na u la menya mu kivala kya Goshen, na u la va himbi na inze, ive, na avana vovo, na avana vavana vovo, na magondi gogo na tsing'ombe tsyitsyo, na vyosi vya u veye navyo:

¹¹na inze nda ku lihidza yo; kigira gyi tigaye mihiga gyitano gyenzala; gase ive u la damba, ive, nenyumba yoyo yosi, na vyosi vya u veye nakyo.

¹²Na henza, tsimoni tsyenyu tsi lolanga, na tsimoni tsya amwavo wange Benjamini, kuva na munwa gwange gu mu volera.

¹³Na mu la volera dada wange makuva gobukumi bwange bwosi mu Egepeti, na vyosi vya mu loli: na mwinye mu la tsia bwangu nokusulungutidza dada wange hano.

¹⁴Naye ya kumberera ku ligoti lya Benjamini amwavo wewe, na a lira na Benjamini ya lilira ku ligoti lilye.

¹⁵Naye ya busa avamwavo veve vosi, na a lilira kuvo; na lwenyima avamwavo veve va volerana naye.

¹⁶Na makuva gevindu yivi ga hulirwa mu inyumba ya Farao, kuvolwa, Avamwavo va Yosefa va duki: na Farao ya yanzidzwa ligali, na avatumekiri veve.

¹⁷Na Farao ya volera Yosefa, U volere avamwavo vovo, Mu kole yaga, mu dwike tsinyama tsyenyu misigo, mu tsie, mu duke mu kivala kya Kanani;

¹⁸na mu vugule dada wenyu na avetsinyumba tsyenyu, mudze ku inze: na nda mu ha ubulahi bwekivala kya Egepeti, na mwinye mu la lia vyobunolu bwekivala.

¹⁹Kalunu ive u mali kulagwa, mu kole yaga: mu vugulire avana venyu, na avakali venyu, magari gekivala kya Egepeti, na mu lete dada wenyu, mudze hano.

²⁰Kandi mu ta ganagana vindu vyenyu; kigira ubulahi bwekivala kyosi kya Egepeti nu bwenyu.

²¹Na avana va Israeli va kola ndiyo: na Yosefa ya va ha magari, kuli munwa gwa Farao, na ya va ha vyokulia vyoku inzira.

²²Kuvo vosi ya va ha sa mulala tsingubo; navutswa ku Benjamini ya mu ha vidonye vyefetha tsimia tsivaka, na tsingubo tsitano.

²³Noku dada wewe ya hila kuli ndi: tsisukiri likumi tsya dwikwa vindu vilihi vya Egepeti, na tsisukiri tsinkali tsya dwikwa ubuswage nevyokulia vya dada wewe vyoku inzira.

²⁴Hene yaho ya sivulana na avamwavo veve, navo va tsia: naye ya va volera, Mu henze, mu ta solanira ku inzira mba.

²⁵Navo vanegira kutwula mu Egepeti, ni va duka mu kivala kya Kanani ku Yakobo dada wavo.

²⁶Na va mu volera, Yosefa a veye mwoyo kuduka kalunu, kandi a veye wamehi ku kivala kyosi kva Egepeti. Naye ya kudza mwoyo, kigira ya vula kuvasuuvira.

²⁷Navo va mu volera makuva gosi ga Yosefa ya va volera: naye lwa ya lola magari ga Yosefa ya leta kumuginga, mwoyo gwa Yakobo dada wavo gwa simuguka:

²⁸Na Israeli ya vola, Ga duki; Yosefa mwana wange a veye mwoyo: nda sulunguta kulolana naye, ni nkikiri kukudza.