Read lulogooli Litanga 47 Bible Online

Litanga 47 - lulogooli bible

Litanga 47

¹Kunangwa Yosefa yingira na a volera Farao, na a vola, Dada wange na avamwavo vange, na vyayo vyavo, na imitugu gyavo, na vyosi vya va veye navyo, vadzi kutwula mu kivala kya Kanani; na henza, va veye mu kivala kya Goshen.

²Na ya twulidza avandu vatano ku avamwavo veve, na a va singeridza imbiri wa Farao.

³Na Farao ya teva avamwavo veve, Miyinzi gyenyu gyi veye ki? Navo va volera Farao, Avatumekiri vovo va veye avatugi vemitugu, kwinye, na avadada vetu.

⁴Navo va volera Farao, Ku udzi kuva avamenya mu kivala; kigira si ha veye nobwayiru i bwevyayo vyavatumekiri vovo; kigira inzala i veye yekihalatu mu kivala kya Kanani; kunangwa, ku goonya ive, u he avatumekiri vovo munwa, va menye mu kivala kya Goshen.

⁵Na Farao ya volera Yosefa, na a vola, Dada wowo na avamwavo vovo vadzi ku ive:

⁶kivala kya Egepeti ki veye imbiri wowo; u vike dada wowo na avamwavo vovo, va menye mu kivala kilahi kuvita; va menye mu kivala kya Goshen: kandi nu u manya hagati havo avandu avanyala, u va vike kwameha imitugu gyange.

⁷Na Yosefa ya leta Yakobo dada wewe, na a mu vika imbiri wa Farao: na Yakobo ya gasidza Farao.

⁸Na Farao ya teva Yakobo, Madiku gemihiga gyobuhindiri bubwo gyi veye gyanga?

⁹Na Yakobo ya volera Farao, Madiku gemihiga gyeligenda lyange gyi veye mihiga mia na makumi gavaka: madiku gyemihiga gyobuhindiri bwange gyi veye mikekeke na midamano, kandi si gyi duki kuli madiku gemihiga gyobuhindiri bwa avaguga vange mu madiku geligenda lyavo.

¹⁰Na Yakobo ya gasidza Farao, ma na a twula imbiri wewe.

¹¹Na Yosefa ya vika dada wewe na avamwavo veve, na a va ha miyandu gyemilimi mu kivala kya Egepeti, mu kivala kya li kilahi ligali, mu kivala kya Ramesese, kuli Farao ya laga.

¹²Na Yosefa ya lageridza dada wewe, na avamwavo veve, na vosi avenyumba ya dada wewe, vyokulia kuli liva lyetsihiri tsyavo.

¹³Na vyokulia si vya li mu kivala kyosi mba; kigira inzala ya li kihalatu, kuduka kivala kya Egepeti na kivala kya Kanani vya gwa videdekere kigira inzala.

¹⁴Na Yosefa ya vungidza ifetha yosi i nyoleka mu kivala kya Egepeti, nomu kivala kya Kanani, kigira ubuswage bwa va gula: na Yosefa ya vika if etha mu inyumba ya Farao.

¹⁵Na ifetha yosi ya li mu kivala kya Egepeti, nomu kivala kya Kanani, lwa ya mala kutumekirwa, Avaegepeti vosi vadza ku Yosefa, na va vola, U ku he vyokulia: ku kudzira ki imbiri wowo? Kigira ifetha i fweye.

¹⁶Na Yosefa ya vola, Mu haane mitugu gyenyu; na nda mu ha vyokulia ku mitugu gyenyu, ifetha ni i va ni i fweye.

¹⁷Navo va leta mitugu gyavo ku Yosefa; na Yosefa ya va ha vyokilia ku tsiparasi tsyavo, noku magondi, noku tsing'ombe, noku tsisukiri: naye ya va ha vyokulia ku mitugu gyavo gyosi mu muhiga yigwo.

¹⁸Kandi lwa muhiga yigwo gwa vita, va tsia kuye muhiga gundi, ni va mu volera Si ku la visa ku mwami wetu, kuli ifetha yetu ya tumekirwa yosi; kandi vyayo vyemitugu vi veye vyomwami wetu; si ha veye nekindu kya tigala imbiri womwami wetu, ni gyi ta li imibiri gyetu, nemilimi gyetu:

¹⁹kunangwa kigira ki ku kudza imbiri wetsimoni tsyitsyo, kwinye nemilimi gyetu? U ku gule kwinye nemilimi gyetu kigira vyokulia, na kwinye nemilimi gyetu ku la va avatugwa va Farao: kandi u ku he bugutsa, ku duke kuhindira, ku vule kukudza, na kivala ki vule kuva vutswa.

²⁰Ma Yosefa ya gulira Farao kivala kyosi kya Egepeti; kigira Avaegepeti sa mulala ya gulidza mulimi gwigwe, kigira inzala ya li yekihalatu kuvo; na kivala kya gwa kya Farao.

²¹Kandi ku avandu avene, ya vadikidza mu madala kutwula ku lwako lwoluvega yilu, kuduka ku lwako lwoluvega yilwo lwa Egepeti.

²²Navutswa milimi gya avasalisi si ya gyi gula mba: kigira avasalisi va li nevyokulia vya twula ku Farao, ni va lia vyokulia vyavo vya Farao ya va ha; kigira yaga si va gulidza imilimi gyavo mba.

²³Kunangwa Yosefa ya volera avandu, Henza, nguli mwinye nemilimi gyenyu mu ve va Farao: henzi, bugutsa yibu, mu tage milimi gyenyu.

²⁴Na inyinga yeligesa, mu la ha Farao kidieli kyevitano, na vidieli vine vi la va venyu avene, vi ve vyobugutsa bwemilimi, na vyokulia vyenyu, na vya avetsinyumba tsyenyu, na vya avana venyu.

²⁵Navo va vola, Ive wa honnya livamwoyo lyetu: ku nyole liverererwa imbiri womwami wetu, na ku la va avatugwa va Farao.

²⁶Na Yosefa ya laga lilaga ku kivala kya Egepeti, kuli Farao a nyole kidieli kyevitano; navutswa milimi gye vasalisi gyeng'ine gya vula kukolwa gya Farao.

²⁷Na Avaisraeli va menva mu kivala kya Egepeti, mu kivala kya Goshen; navo venyolera mu miyandu, navo va li nolwivulu, ni va medeka ligali.

²⁸Na Yakobo ya hindira mu kivala kya Egepeti mihiga likumi na gyitano na gyiviri: na madiku ga Yakobo, mihiga gyobuhindiri bwibwe, gya li mihiga mia na makumi gane na gyitano na gyiviri.

²⁹Na inyinga yelikudza lya Israeli ya duka himbi: naye ya langa mwana wewe Yosefa, na a mu volera, Ni mba ni mberereywi imbiri wetsimoni tsyitsyo, nku goonya u vike mukono gugwo ku ivadzwa yange, u nkolere malahi na ageligali: u ta nta mu Egepeti mba, nku goonyanga;

³⁰navutswa lwa ngona halala na avaguga vange, u la mbila kutwula Egepeti, na u nte mu kilindwa kyavo. Naye ya vola, Nda kola kuli u voye.

³¹Na ya vola, Nzisuhira: na ya mwisuhira. Na Israeli yinaminya mutwe gwigwe ku kitali.