Read lulogooli Litanga 48 Bible Online

Litanga 48 - lulogooli bible

Litanga 48

¹Kunangwa inyima wevindu yivi, mulala ya volera Yosefa, Henza, Dada wowo a lwalanga; naye ya hila avana veve vaviri, Manase na Efiraim.

²Na mulala ya volera Yakobo, Henza, mwana wowo Yosefa yadzanga ku ive: na Israeli yedinyeridza ni yikala ku kitali.

³Na Yakobo ya volera Yosefa, Nyasaye Wanyala Vyosi ya loleka ku inze ha Luz mu kivala kya Kanani, na ya ngasidza,

⁴na a mbolera, Henza, nda ku ha lwivulu, na nda ku meda, na nda ku kola kuva kiduma kya avandu, kandi nda haana kivala yiki ku visukululwi vivyo inyima wowo kuva miyandu gyemihiga nemihiga.

⁵Na kalunu avana vovo avayai vaviri, avivulwa ku ive mu kivala kya Egepeti lwa inze nkikiri kuduka ku ive mu Egepeti, va veye vange; Efiraim na Manase, kuli Rubeni na Simeoni, va la va vange.

⁶Na avana va u livula lwenyima ku yava, va la va avovo; va la langwa ku ameta ga avamwavo vavo mu miyandu gyavo.

⁷Kandi ku inze, inyinga nda twula Padan, Raheli ya kudzira mu kivala kya Kanani ku inzira, lwa kwa duka himbi Efirathu: na inze nda mu ta yo ku inzira i tsitsanga Efirathu, (ha zana ha langwa Beth-lehemu).

⁸Na Israeli ya henza avana va Yosefa, na a teva, Yava ni vaha?

⁹Na Yosefa ya volera dada wewe Yava va veye avana vange, va Nyasaye ya mpera hano. Naye ya vola Mwadza, u va sunde himbi ku inze na nda va gasidza.

¹⁰Na tsimoni tsya Israeli tsya li tsya vakula kigira busakulu bwibwe, kuduka si ya nyala kulola. Naye ya va sunda himbi kuye; na ya va busa na a va kumberera.

¹¹Na Israeli ya volera Yosefa, Si nda ganagana kulola mumoni mumwo: na, henza, Nyasaye u mpeye kulola avana vovo kandi.

¹²Na Yosefa ya leta avana veve va twula ha masigamo gege; naye yeyinaminya kuduka hasi.

¹³Na Yosefa ya va vugula vombi, Efiraim ku mukono mulungi gwigwe kukagatidza ku mukono gwa Israeli mmosi, na Manase ku mukono mmosi gwigwe kukagatidza ku mukono gwa Israeli mulungi, na a va sunda himbi kuye.

¹⁴Na Israeli ya nyira mukono mulungi, na a vika ku mutwe gwa Efiraim wa li umuke, na mukono gwigwe mmosi ku mutwe gwa Manase, ya nyira makono nelimanya; kigira Manase ya li wokutanga kwivulwa.

¹⁵Naye ya gasidza Yosefa, na a vola, Nyasaye wavaguga vange Abrahamu na Isaka va genda imbiri wewe, Nyasaye wa ndageridza mu buhindiri bwange bwosi kuduka lero,

¹⁶Ingelosi wa mbonnya kuntwulidza ku budamano bwosi, a gasidze avayai; na lieta lyange litalirwe kuvo, na lieta lya vaguga vange Abrahamu na Isaka; navo va viruke, nokukula kuva avanyingi mu lirova.

¹⁷Na lwa Yosefa ya lola dada wewe na aviki mukono mulungi ku mutwe gwa Efiraim, si ga mu yanzidza mba: na ya ginga mukono gwa dada wewe, kugutwulidza ku mutwe gwa Efiraim, nokuguvika ku mutwe gwa Manase.

¹⁸Na Yosefa ya volera dada wewe, Ga ta va ndiyo, dada wange; kigira wokutanga ni uyu; u vike mukono mulungi ku mutwe gwigwe.

¹⁹Na dada wewe ya sula, na a vola, Mmanya, mwana wange, mmanya; uyu kandi a la gwa ihiri, kandi a la va munene: navutswa amwavo wewe muke a la va munene kuvita uyu, na kisukululwi kikye ki la gwa ubunyingi bwetsihiri.

²⁰Naye ya va gasidza ku lidiku zana na a vola, Ku litala ive, Israeli va ia gasidza, ni va vola, Nyasaye a kole ive kuva kuli Efiraim na kuli Manase: na ya vika Efiraim imbiri wa Manase.

²¹Na Israeli ya volera Yosefa, Henza, nkudzanga: navutswa Nyasaye a la va halala nemwinye, naye a la mu hila kumuvika kandi mu kivala kya avaguga venyu.

²²Kandi mmali kukuha kidieli kilala kuvita avamwavo vovo, kya nda twulidza mu mukono gwa Avamori nekivavi kyange nobuta bwange.