Read lulogooli Litanga 6 Bible Online

Litanga 6 - lulogooli bible

Litanga 6

¹Na ga duka, lwa vandu va tanga kumedeka ku lirova, na vakana vivulwa kuvo,

²avanava Nyasaye va lola avakana va vandu va veye avalahi; na vevugulira kuvo avakali ava va tovola.

³Na Yahova ya vola, Roho wange si a la hing'ana nomundu, mihiga nemihiga, kigira a veye inyama kandi: navutswa madiku gege ga la va mihiga mia na makumi gaviri.

⁴Na mindu gya li mu lirova mmadiku yago, Kandi inyima wa yago, avana va Nyasaye lwa va li halala navakana va avandu, na vivula avana kuvo: va zana va li avetsingulu ava li va kale, avasatsa velidzominywa.

⁵Kandi Yahova ya lola ubudamano bwa avandu bwa li bunene ku lirova, kandi lisaavira lyosi na tsinganagani tsyomwoyo gwavo tsya li ubudamano bwere kazozo.

⁶Na Yahova yeganira ku lilomba mundu ku lirova, na a vereridzwa mmowyo gwigwe.

⁷Na Yahova ya vola, Nda gotidza avandu ava nda lomba, va twule ku lirova; vyombi avandu na tsinyama, na vimolanga, na manyonyi gegulu; kigira ndeganira ku lilomba lyavyo.

⁸Navutswa Nuhu ya verwa tsimbabasi imbiri wa Yahova.

⁹Yivi ni visukululwi vya Nuhu. Nuhu ya li mundu mulungi, nomudukiru mu likula lilye: Nuhu ya genda halala na Nyasaye.

¹⁰Na Nuhu yivula avana vabaka avayai, Shem, na Ham, na Jafethu.

¹¹Na lirova lya li ni lyoneki imbiri wa Nyasaye, na lirova lya li ni lizuye kirage.

¹²Kandi Nyasaye ya lola lirova, na, henza, lya li ni lyoneki; kigira vyemibiri vyosi vyononya inzira yavyo ku lirova.

¹³Kandi Nyasaye ya volera Nuhu, Kiheri kya vyembiri vyosi ki duki imbiri wange; kigira lirova lizuye kirage kigira yivyo; kunangwa, henza, nda vi dividza halala nelirova.

¹⁴Welombere liatu lyemisala gyomvinde; kandi u lombe mulyo vigodola, na u vake na irangi mugati na kyova.

¹⁵Kandi u la li lomba ku lugano yilu: ubutambi bweliatu bu la va vigero vya makono tsimia tsivaka, na bugalamu bwalyo vigero vyamakono makumi gatano, na budiguluku bwalyo vigero vyamakono makumi gavaka.

¹⁶Kandi u la vika ubwiyangu bwobulavu mu, ku ligera lyo mukono mulala u la li malilidza ha lugulu; na kiliango u la vika mmbalu mwalyo; kandi u la lomba lya hasi na lya hagati, na lya igulu mulyo.

¹⁷Kandi inze, henza, inze ndesanga amadzi manene ku lirova kudividza vyemibiri vyosi vi veye nomwika gwelivamwoyo muvyo vi twule isi weligulu; vyosi vi veye ku lirova vi la kudza.

¹⁸Navutswa nda singeridza lilagana lyange halala nive; nive u lingira mu liatu, ive, na avana vovo, na mukali wowo, na vakali va vana vovo halala nive.

¹⁹Kandi ku vyosi vi veye mwoyo vyetsinyama tsyosi, siviviri ku tsing'ano tsyosi u la vi leta mu liatu, kuvilinda vi ve mwoyo halala nive, vi la va kisatsa na kikali.

²⁰Ku manyonyi ku lugano lwago, noku mitugu ku lugano lwagyo, noku vi molanga vye lirova ku lugano lwavyo, siviviri ku tsing'ano tsyosi viladza ku ive, vi lindwe kuva mwoyo.

²¹Kandi u vugule nokuvungidza ku vyokulia vyosi vi libangwa, navyo vi la va vyokulia vivyo, na vya yivyo.

²²Nuhu ya kola ndiyo; kuli gosi ga Nyasaye ya mu laga, ya kola ndiyo.