Read lulogooli Litanga 7 Bible Online

Litanga 7 - lulogooli bible

Litanga 7

¹Kandi Yahova ya volera Nuhu, Hamba, wingire mu liatu, ive navenyumba yoyo vosi; kigira ndoli ive u veye mulungi imbiri wange mu likula yili.

²Kandi ku tsinyama tsinifu tsyosi u la vugula ku si tsitano na tsiviri, isatsa na inkali yayo; kandi ku tsinyama tsi ta li tsinifu u la vugula ku si tsiviri, isatsa na inkali yayo:

³kandi ku manyonyi gegulu, si gatano na gaviri, masatsa na makali; kulinda lwaalo ku lirova lyosi.

⁴Kigira ga tigaye madiku gatano na gaviri, nda kupidza imbula ku lirova kuduka madiku makumi gane, mbasu nobudiku; noku vyosi ki veye nelivamwoyo kya nda lomba nda ki gotidza ku lirova.

⁵Na Nuhu ya kola kuli gosi ga Yahova ya mu laga.

⁶Na Nuhu ya li nemihiga tsimia tsitano na indala lwa madzi manene ga li ku lirova.

⁷Kunangwa Nuhu yingira mu liatu, na vana veve, na mukali wewe, na avakali va avana veve halala naye, kigira amadzi manene yago.

⁸Ku tsinyama tsinifu noku tsinyama tsi ta li tsinifu, noku manyonyi, noku vindu vyosi vi molanga ku lirova,

⁹vingira si viviri mu liatu ku Nuhu, kisatsa na kikali, kuli Nyasaye ya laga Nuhu.

¹⁰Kunangwa inyima wa madiku gatano na gaviri yago, amadzi manene ga li ku lirova.

¹¹Ku muhiga gwa kola tsimia tsitano na indala gwelimenya lya Nuhu, ku mweli gwegyiviri, lidiku lyelikumi na gatano na gaviri lyomweli, ku lidiku yilyo visenukiru vyosi vya madzi manene vya huduka, na madirisha gegulu ga kunulwa.

¹²Na imbula ya li ku lirova madiku makumi gane, nobudiku makumi gane.

¹³Ku lidiku yilyo Nuhu yingira mu liatu, na vana va Nuhu, Shem, na Ham, na Jafethu, no mukali wa Nuhu, na vakali vabaka va avana veve halala navo;

¹⁴yavo noku tsinyama tsyosi ku lugano lwatsyo, kandi mitugu gyosi ku lugano lwagyo kandi ku vyosi vi molanga ku lirova ku lugano lwavyo, noku manyonyi gosi ku lugano lwago, manyonyi getsimbaha tsing'ano tsyosi.

¹⁵Na vingira ku Nuhu mu liatu, si viviri ku tsinyama tsyosi tsi veye nomwika gwelivamwoyo mutsyo.

¹⁶Kandi yitsyo tsingira, tsingira isatsa na inkali ku tsinyama tsyosi, kuli Nyasaye ya mu laga: na Yahova ya mu hanira.

¹⁷Na madzi manene ga li ku lirova madiku makumi gane; na amadzi ga medeka ligali, ni geleminya liatu, kandi lya gingwa igulu ku lirova.

¹⁸Na amadzi ga gwa netsingulu, kandi ga medeka ligali ku lirova; na liatu lya tsia igulu ku amadzi.

¹⁹Kandi amadzi ga medeka ligali muno ku lirova; na vigulu vitambi vyosi vya li isi weligulu vya kunikwa.

²⁰Amadzi ga medeka kuduka ligera lya makono likumi nagatano igulu; na vigulu vya kunikwa.

²¹Kandi tsinyama tsyosi tsya gendanga ku lirova tsya kudza, namanyonyi, nemitugu, netsinyama, na vyosi vi molanga ku lirova, na vandu vosi:

²²vyosi vya li nomwika gwelivamwoyo gwa li mu amolu gavyo, navyo vyosi vya li ku lirova Iyumu, vya kudza.

²³Na vyosi vya li nelivamwoyo ku lirova vya gotidzwa, avandu, nemitugu, nevimolanga, na manyonyi gombwerefu; vyosi vya gotidzwa ku lirova. Na Nuhu yeng'ine ya tigala, navo va li halala naye mu liatu.

²⁴Na amadzi ga li netsingulu ku lirova madiku mia na makumi gatano.