Read lulogooli Litanga 8 Bible Online

Litanga 8 - lulogooli bible

Litanga 8

¹Na Nyasaye yidzulitsa Nuhu, netsimyama tsyosi, nemitugu gyosi vya li halala naye mu liatu: na Nyasaye ya leta imbuudza ku lirova, na amadzi ga geha;

²kandi visenukiru vyamadzi na madirisha gomigulu ga kunikwa, nembula yomigulu ya gaywa;

³kandi amadzi girana kutwula ku lirova kazozo: na inyima wa madiku mia na makumi gatano amadzi ga geha.

⁴Na liatu lya singira ku kigulu kya Ararati ku mweli gu kola gyitano na gyiviri, ku lidiku li kola likumi na gatano na gaviri.

⁵Na madzi ga kamuluka kazozo kuduka ku mweli gu kola likumi; noku mweli gwelikumi, ku lidiku lyokutanga mweli, tsisonga tsyevigulu tsya loleka.

⁶Kunangwa inyima wa madiku makumi gane, Nuhu yigula lidirisha lyeliatu lya ya lomba:

⁷kandi ya tuma lijikolo, nalyo lya tsia yiyi na yiyi, kuduka amadzi guuma ku lirova.

⁸Kandi ya tuma likuulu, a lole amadzi ni ga va ni ga kama ku lirova;

⁹Navutswa likuulu zana lya vula kunyola ha li sena kirenge kyalyo, na lirana kuye mu liatu; kigira amadzi ga li ni ga kikiri ku lirova lyosi: naye ya nyira mkono gwigwe, na a li vugula, nokulileta kuye mu liatu.

¹⁰Na a linda madiku gatano na gaviri gandi; kandi ya tuma likuulu kutwula mu liatu;

¹¹na likuulu lirana kuye mgolova; na henza, mmunwa gwalyo lya li nelitu livisi lya mzeituni lya nogwa: kunangwa Nuhu ya manya amadzi ga kami ku lirova.

¹²Na ya linda madiku gatano na gaviri gandi, na a tuma likuulu; nalyo lya vula kwirana kuye kandi.

¹³Kunangwa ga duka mu muhiga gwetsimia tsitano na indala na mulala, ku mweli gwokutanga, lidiku lyokutanga lyomweli, amadzi guma ku lirova: na Nuhu ya vimbula liatu, na, henza, marova gumi.

¹⁴Na mu mweli gwa kaviri, ku lidiku li kola likumi na gatano na gaviri lyomweli, lirova Iyuma.

¹⁵Na Nyasaye ya volera Nuhu, na a vola,

¹⁶Twula ku liatu, ive, nomukali wowo, na avana vovo, navakali va avana vovo halala nive.

¹⁷Twulidza halala nive, vyosi vi veye nelivamwoyo vi veye halala nive, ku tsinyama tsyosi, manyonyi, nemitugu, noku vyosi vi molanga ku lirova; vivulane ligali ku lirova, nokwaala, nokumedeka ku lirova.

¹⁸Na Nuhu ya twula, navana veve, nomukali wewe, navakali va avana veve halala naye:

¹⁹tsinyama tsyosi, nevimolanga vyosi, na manyonyi gosi, na vyosi vi gendanga ku lirova, kuli tsihiri tsyavyo, vya twula mu liatu.

²⁰Kandi Nuhu yombakira Yahova bwali; na a vugula ku tsinyama tsinifu tsyosi, noku manyonyi manifu gosi, na a leta vihaanwa vyokusambwa ku bwali.

²¹Na Yahova ya hulira mwayu munolu; na Yahova ya vola mmwoyo gwigwe, Si nda laama lirova kandi kigira avandu, kigira tsiganagani tsyomwoyo gwavandu tsi veye tsindamano kutwula bwana boke; kandi si nda kuya kandi vyosi vi veye mwoyo, kuli nda kola.

²²Tsinyinga tsyamadiku gosi ku lirova, tsi la va tsinyinga tsyokutaga na tsyokugesa, ubukindu noluya, kimeyu nenkindirira, umbasu nobudiku, tsinyinga yitsyi si tsi la hera mba.