Read lulogooli Litanga 9 Bible Online

Litanga 9 - lulogooli bible

Litanga 9

¹Kandi Nyasaye ya gasidza Nuhu, na avana veve, na a va volera, Mwaale rnmedeke, mwizule lirova.

²Na litibwa lyenyu, nelihendidza lyenyu li la va ku tsinyama tsyosi tsyelirova, noku manyonyi gosi gombwerefu; noku vyosi vi gendanga ku lirova, noku tsisudzi tsyosi tsyomu inyanza, vi vikeywi mu mukono gwenyu.

³Vyosi vi gendanga vi veye nelivamwoyo vi la va vyokulia vyenyu; kuli nda mu ha tsingutsa tsimbisi, kandi ndiyo mu hebeywi yivi vyosi.

⁴Navutswa inyama halala na livamwoyo lyayo, li vola li veye masahi gayo, mu ta lia mba.

⁵Kandi ligali masahi genyu, masahi gelivamwoyo lyenyu, nda ga vanza; ku mukono gwetsinyama tsyosi nda ga vanza: kandi ku mukono gwomundu, kali ku rnukono gwamwavo womundu ku vosi, nda vanza livamwoyo lyomundu.

⁶Ku vosi uyu u tahidza masahi gomundu, amasahi gege ga la tahidzwa na mundu: kigira ya lomba mundu mu lifwanana lya Nyasaye.

⁷Na mwinye, mwaale, mmedeke; mwivule ligali mu lirova, nokumedeka mulyo.

⁸Kandi Nyasaye ya volera Nuhu, na avana veve halala naye, na a vola,

⁹Ninze, henza, nsingeridzanga lilagana lyange na mwinye, noku visukululwi vyenyu inyima wenyu;

¹⁰noku vyosi vi veye nelivamwoyo vi veye halala nemwinye; manyonyi, nemitugu, netsinyama tsyelirova halala nemwinye; ku vyosi vi twulanga mu liatu, kali tsinyama tsyosi tsyelirova.

¹¹Kandi nda singeridza lilagana lyange nemwinye; kandi tsinyama tsyosi si tsi la dividzwa namadzi manene kandi mba; kandi si ga la va ho kandi amadzi manene kudividza lirova.

¹²Kandi Nyasaye ya vola, Yiki ki veye kilolekidzu kyelilagana lya nda lomba hagati hange nemwinye noku vyosi vi veye nelivamwoyo vi veye halala nemwinye, kuduka visukululwi vyosi:

¹³Mbikanga kisahi kyange mu lilesi, na ki la va kilolekidzu kyelilagana hagati hange nelirova.

¹⁴Kunangwa, lwa nda leta lilesi iugulu ku lirova, kisahi ki la loleka mu lilesi,

¹⁵na inze ndidzulitsa lilagana lyange li veye hagati hange na mwinye, na vi veye nelivamwoyo vyetsinyama tsyosi; na amadzi si ga la gwa manene kandi kudividza tsinyama tsyosi.

¹⁶Na kisahi ki la va mu lilesi; ninze nda ki henza, nzidzulitse lilagana lyemihiga gyosi li veye hagati ha Nyasaye na vyosi vi veye mwoyo ku lirova.

¹⁷Na Nyasaye ya volera Nuhu, Yiki ki veye kilolekidzu kyelilagana lya nsingeridzi hagati hange netsinyama tsyosi tsi veye ku lirova.

¹⁸Na avana va Nuhu, ava twula mu liatu, va li Shem, Ham, na Jafethu: na Ham a veye ise wa Kanani.

¹⁹Yava vabaka va li avana va Nuhu: na ku yava lirova lyosi lizula avandu.

²⁰Na Nuhu ya tanga kuva mulimi na a simika mizabibu:

²¹na a nwa ku iwaini, na a hambika; na ya li kyahonyo mu lihema lilye.

²²Na Ham, ise wa Kanani, ya lola kyahonyo kya dada wewe, na a volera avamwavo veve ava li kyova.

²³Navo Shem na Jafethu va vugula ingubo, ni va gi vika ku mavega gavo vombi, na va tsira migongo, na va fuma kyahonyo kya dada wavo; na mumoni mwa henza inyima, na va vula kulola kyahonyo kya dada wavo.

²⁴Na Nuhu ya vuka mulihambika lilye, na a manya aga mwana wewe muke ya mu kolera.

²⁵Naye ya vola, Kanani a laamwe; Mutugwa wavatugwa a la va ku vamwavo veve.

²⁶Kandi ya vola, Yahova Nyasaye wa Shem, a gasidzwe; Na Kanani a ve mutugwa wewe.

²⁷Nyasaye a mede Jafethu, Naye a menye mu mahema ga Shem; Kandi Kanani a ve mutugwa wewe.

²⁸Nuhu ya hindira inyima wa madzi manene mihiga tsimia tsivaka na makumi gatano.

²⁹Na madiku gosi ga Nuhu ga li tsimia tsitano na tsine na makumi gatano: na a kudza.