Read lulogooli 2 Samweli 1 Bible Online

2 Samweli 1 - lulogooli bible

2 Samweli 1

¹Na ga duka mylma welikudza lya Saulo, Daudi lwa ya mala kwirana kutwula kwiita Vaamaleki, Daudi ya menya Ziklagu madiku gaviri;

²noku lidiku lya kavaka, henza, ya duka musatsa mulala ya twula mu hokusosa ha Saulo, naye tsingubo tsitsye tsya tandulwa, na ya li namarova ku mutwe gwigwe: na ga duka, lwa ya duka ku Daudi, ya gwa hasi, nokumsigamira.

³Na Daudi ya mu teva, U twula haliki? Naye ya mu volera, Inze nda hona mu hokusosa ha Israeli.

⁴Na Daudi ya mu teva, na a vola, Makuva ga li ndi yo? Mwadza, u mbolere. Naye ya tivula, Avandu yavo viruki kutwula mu bulwani, avandu vanyingi kuvo va gwiye na va kudzi; na kandi Saulo na Jonathan mwana wewe va kudzi.

⁵Na Daudi ya teva musoleli uyu wa mu volera, U manyi ndi Saulo na Jonathan mwana wewe va kudzi?

⁶Nomusoleli uyu ya mu volera, Inze ndizukanira ni mbeye ho ku kigulu kya Giliboa, henza, Saulo yedira ku litimu lilye; na, henza, magari na va nina ku tsiparasi va mu londerera budinyu.

⁷Na lwa yekevuka, ya ndola, na ya nanga. Na nda bugira, Mbeye hano.

⁸Na ya nteva, Ive ni bwaha? Na nda mu tivulira, Inze mbeye Muamaleki.

⁹Naye ya mbolera, Mwadza, singira hano himbi ninze, u nziite, kigira kivi kinene ki nyoye, kigira livamwoyo lyange li kikiri ligali mu inze.

¹⁰Ma nda singira himbi naye, ni mmwiita, kigira nda manya ligali si a nyala kuhona inyima weligwa lilye: na nda vugula itaji ya li ku mutwe gwigwe, nekisambo hya li ku mukono gwigwe, na mbi leti hano ku ive, munene wange.

¹¹Hene yaho Daudi ya gumira tsingubo tsitsye na a tsi tandula; navandu vosi ava li halala naye va kola ndiyo:

¹²na va syomera Saulo, namwana wewe Jonathan, navandu va Yahova, navenyumba ya Israeli; ni va lira, ni va honga lilia kuduka mgolova, kigira va gwiye ku kivavi.

¹³Ma Daudi ya teva musoleli uyu wa mu volera, na a vola, Ive u twula haliha? Naye ya tivula, Inze mbeye mwana womugeni, Muamaleki.

¹⁴Na Daudi ya mu volera, Ga li ndi ive u vule kutia kunyira mukono gugwo kudividza mbake wa Yahova?

¹⁵Na Daudi ya langa mulala ku vasoleli veve, na ya mu volera, Wisunde himbi, u mu gwire. Naye ya mu kuya, kuduka ya kudza.

¹⁶Na Daudi ya mu volera, Masahi gogo ga veye ku ive, ku mutwe gugwo; kigira munwa gugwo gu ku lolekidii, ni gu vola, Inze nziiti mbake wa Yahova.

¹⁷Daudi ya syomera Saulo na Jonathan mwana wewe nelisyoma yili

¹⁸(na ya laga vegidze avana va Yuda lwimbu lwobuta: henza, lwa ng'odwa mu kitabu kye Jasharu):

¹⁹Ubukumi bubwo, O Israeli, bwiiteywi ku hadiguluku hoho Avetsingulu va gwa kuli ndina

²⁰U tilwadza yaga mu Gathu, Mu ta landidza yaga ku mahasi ga Ashikelon; Gase avakana va Vafilisiti va la sangala, Gase avakana va vasinde va la guuta.

²¹Mwinye vigulu vya Giliboa, Imbula nelime li vule kuva ku mwinye, kinga milimi gyevihaanwa: Kigira ingavo ya vetsingulu ya tebwa netsisoni ha zana Ingavo ya Saulo, kuli uyu wa vula kuvakwa maguta.

²²Ku masahi gaviitwa, noku tsitinya tsyavetsingulu, Ubuta bwa Jonathan bwa vula ki kwirana inyima, Nekivavi kya Saulo kya vula kwirana vutswa.

²³Saulo na Jonathan va li avalahi avokuyanzidza, mu livamwoyo ki lyavo, Kandi mu likudza lyavo va vula kwavukanywa: Va li netsimbiru kuvita tsindidzu, Va li netsingulu kuvita ving'ang'a.

²⁴Mwinye avakana va Israeli, mu lirire Saulo, Uyu wa mu vika tsingubo tsinzakanyu tsyokuyanzidza, Uyu wa mu vikira vindu vyethahabu ku tsingubo tsyenyu.

²⁵Avetsingulu va gwa kuli ndina hagati hobukvani Jonathan yiitirwa ku ha diguluku hoho.

²⁶Inze mbeye nobuvereri bunene kigira ive, Jonathan amitu wange: Ive wa nyanzidza ligali: Ubuyanzi bubwo bwa wa li bwokugenya, Bwa vita ubuyanzi bwa vakali va yanzanga.

²⁷Avetsingulu va gwa ndina, Nevyuma vyobulwani vya diva ndina