Read lulogooli 2 Samweli 19 Bible Online

2 Samweli 19 - lulogooli bible

2 Samweli 19

¹Na Joabu ya volerwa, Henza, mwami a liranga nokusyomera Abisalom.

²Neliguuta lyobulwani ku lidiku yilyo lya girunkanywa kuva lisyoma ku avandu vosi; kigira avandu va hulira ni ga volangwa ku lidiku yilyo, Mwami a vereranga kigira mwana wewe.

³Navandu kandi vingira mu lidala lidiku yilyo makiriri, ni vivisa kuli avandu va veye isoni va tsitsanga ni vivisa ha virukanga mu bulwani.

⁴Nomwami ya kunika mumoni mwimwe, nomwami ya lira mwoyo munene, O mwana wange Abisalom, O Abisalom, mwana wange, mwana wange

⁵Na Joabu yingira mu inyumba ku mwami, na a vola, Ive lero ndi u leganyi mmoni mwa vatumekiri vovo vosi, ava honyi livamwoyo lilyo lero, nelivamwoyo lyavayai vovo navakana vovo, nelivamwoyo lyavakali vovo, nelivamwoyo lyavasuria vovo;

⁶kigira ive u yanza yava ava dunyiranga ive, nokudunyira ava yanza ive. Kigira ive u lolekidzi lero, avanene, kandi vatumekiri si va veye kindu ku ive: kigira lero ndoli, Abisalom a va u kikiri mwoyo, na kwinye kwosi ku la kudza lero hene yaho ngano inkuva yiyi ya ka ku yanzidza ligali.

⁷Kunangwa kalunu u singire, u twule, kuvolera vatumekiri vovo makuva kuvaleminya mwoyo; kigira inze nzisuha ku Yahova, ive nu u va nu u vula kutwula si a la tigala mundu kali mulala haiala nive ubudiku bwa lero yibu: nenkuva yiyi i la va indamano ku ive kuvita budamano bwosi bwa ku gwira kutwula bwana bubwo kuduka lero.

⁸Hene yaho mwami ya singira, na a tsia kwikala mu kiribwa, Na va volera avandu vosi kuvola, Henzi mwami wikaye mkiribwa: navandu vosi va tsia ho imbiri womwami. Na Israeli va li ni viruki sa mulala ya tsia mwihema lilye.

⁹Navandu vosi va li ni va hing'ananga mu tsihiri tsyosi tsya Israeli, ni va vola, Mwami ya ku honnya ku makono gavasigu vetu, na ya ku honnya ku makono ga Vafilisiti; na kalunu yiruki u twuli mu kivala kwiruka Abisalom.

¹⁰Na Abisalom wa kwa vaka maguta a ve mwami ku kwinye, u kudzeye mbulwani. Kunangwa kalunu kigira ki si mu vola likuva lyokwiranyi mwami kandi?

¹¹Mwami Daudi ya tuma vatumwa ku Zadoku noku Abiatharu avasalisi, na a vola, Volera vakulundu va Yuda, kuvola, Kigira ki mwinye mu veye avekiheri mu liranya mwami kandi mu inyumba yeye? Kigira makuva ga Israeli vosi ga duki ku mwami, ku mwirannya mu inyumba yeye.

¹²Mwinye mu veye avamitu, mu veye kigumba kyange n enyama yange: kunangwa kigira ki mwinye mu ve avekiheri kwirannya mwami?

¹³Na mu volera Amasa, Ive si u veye kigumba kyange nenyama yange? Nyasaye a nkolere yaga nokuvita, ive nu u va nu u ta veye munyampara welihe imbiri wange kazozo ha bugono bwa Joabu.

¹⁴Na yinaminya myoyo gyavandu vosi ava Yuda, kuli mundu mulala, ni va duka kuhilira mwami avatumua, ni va vola, Wirane ive, navatumekiri vovo vosi.

¹⁵Ma mwami yirana, na a duka Yordani. Na Vayuda va duka Gilgali, va tsie kwaganira mwami, kwambukidza umwami yambuke Yordani.

¹⁶Na Shimei mwana wa Gera, Mubenjamini, wa Bahurim, ya kola bwangu kusulunguta halala navandu va Yuda kwaganira mwami Daudi.

¹⁷Va li halala naye avandu eliu ava Benjamini, na Ziba mutumekiri wenyumba ya Saulo, navana veve likumi na vatano, navatumekiri veve makumi gaviri va li halala naye; na va vita hagati ha Yordani imbiri wetsimoni tsyomwami.

¹⁸Na bwatu bwambuka bu duke kwambukidza avandu venyumba yomwami, nokukola aga ya lola kuva malahi. Na Shimei mwana wa Gera ya gwa hasi imbiri womwami, lwa yambukanga mugera gwa Yordani.

¹⁹Na ya volera mwami, Munene wange a ta validza ubudamano ku inze, kinga u tidzulitsa aga inze mutumekiri wowo nda kola nobukyamu ku lidiku lyomunene wange umwami ya twulanga Yerusalemi, mwami ya duka kugavika mu mwoyo gwigwe.

²⁰Kigira mutumwa wowo a manya nda kola ubwoni: kunangwa, henza, ntangi kuduka lero ku vosi avenyumba ya Yosefa kusulunguta nduke kwaganira munene wange mwami.

²¹Navutswa Abishai mwana wa Zeruia ya tivula na a vola, Uyu Shimei si a liitwa kigira yaga, kigira ya nyega mbake wa Yahova?

²²Na Daudi ya vola, Inze mbeye naki ku mwinye, avana va Zeruia, kuduka mwinye mu gwiye avasigu vange lero? Si a liitwa umundu ku vosi mu Israeli lero, kigira si mmanya ninze umwami lero ku Israeli, naho?

²³Nomwami ya volera Shimei, Si u la kudza mba. Nomwami ya mwisuhira.

²⁴Na Mefiboshethu mwana wa Saulo ya sulunguta a duke kwaganira mwami; naye ya li na a kikiri kusaavidza virenge vivye, kinga kukalaga tsinderu tsitsye, kinga kwogidza tsingubo tsitsye, kutwula ku lidiku lya mwami va twula kuduka lidiku lya yirana nemirembe.

²⁵Na ga duka, lwa ya duka Yerusalemi kwaganira mwami, mwami ya mu volera, Mefiboshethu, kigira ki si wa londa inze?

²⁶Naye ya tivula, Munene wange, O mwami, mutumekiri wange ya ngada: kigira inze mutumekiri wowo nda vola, Nda lomba isukiri, nduke kunina, ntsie halala nomwami; kigira inze mutumekiri wowo mbeye mulema.

²⁷Naye ya gemehidza mutumekiri wowo imbiri womunene wange mwami; navutswa munene wange mwami a veye kuli ingelosi wa Nyasaye: kunangwa u kole aga u lolanga kuva malahi.

²⁸Kigira vosi avenyumba ya dada wange va li avakudzu avere imbiri womunene wange mwami; navutswa wa vika inze mutumekiri wowo mu yavo ava litsanga ku imeza yoyo mwene. Mbeye na ki kuduka kalunu nduke kulira ku mwami kandi?

²⁹Nomwami ya mu volera, Kigira ki u volanga ku makuva gogo mwene? Mbola, Ive na Ziba mu gavane kivala.

³⁰Na Mefiboshethu ya volera mwami, Yee, a nyala kuvugula kyosi, kigira munene wange mwami udzi nemirembe ku inyumba yeye mwene.

³¹Na Barizilai Mugileadi ya sulunguta kutwula Rogelim; na yambuka Yordani halala nomwami, a duke kumwambukidza Yordani.

³²Na Barizilai ya li musakulu ligali, liduka lilye lya li mihiga makumi gatano na gavaka: niye wa lihidza mwami lwa ya menya Mahanaim; kigira ya li umundu munene ligali.

³³Nomwami ya volera Barizilai, Hamba kwambuke vombi, na inze nda ku lihidza ha Yerusaelmi.

³⁴Na Barizilai ya volera mwami, Madiku gemihiga gyelivamwoyo lyange, gyi veye gyanga, gya ndanegira Yerusalemi halala nomwami?

³⁵Lero mbeye mihiga makumi gatano na gavaka: na nyala kwavukanya malahi na madamano? Inze mutumekiri wowo nyala kuhulira ubunolu bwa nditsanga kinga bwa nwedzanga? Nyala kuhulira myoyo gyavasatsa vimbanga navakali vimbanga? Kunangwa inze mutumekiri wowo nduke kuva musigo gwokumina munene wange mwami, kigira ki?

³⁶Mutumekiri wowo yenya vutswa kwambuka Yordani halala nomwami: na kigira ki mwami a tunga madanyi kuli yaga?

³⁷Mwadza, leka mutumekiri wowo yirane, nduke kukudzira mu lidala lyange, himbi nekilindwa kya dada wange na kya mama wange. Navutswa henza, mutumekiri wowo Kimham; uyu yambuke halala nomunene wange mwami; nu u kolera uyu aga u lola kuva malahi.

³⁸Nomwami ya tivula, Kimham a lambuka halala ninze, na nda mu kolera ga ive u lola kuva malahi: noku vindu vyosi kya wenya ku inze, nda ku kolera.

³⁹Ma avandu yavo vosi vambuka Yordani, nomwami yambuka: nomwami ya busa Barizilai, na a mu gasidza; ni yirana hango hehe.

⁴⁰Kunangwa mwami yambuka kuduka Gilgali, na Kimham yambuka halala naye: navandu vosi ava Yuda vambukidza mwami, kandi inusu yavandu va Israeli.

⁴¹Na, henza, avandu vosi va Israeli va tsia ku mwami, ni va volera mwami, Kigira ki avamwavo vetu yava ava Yuda viba ive, nokuleta mwami, navandu venyumba yeye, nokumwambukidza Yordani, navandu vosi va Daudi halala naye?

⁴²Navandu vosi va Yuda va tivulira avandu va Israeli, Ga veye kigira mwami nomwiko wa himbi ku kwinye: kigira ki mwinye mu dunyira kigira yaga? Kwinye kwa lia vyelitunga lyomwami? Kinga ya kuha kihaanwa?

⁴³Navandu va Israeli va tivulira avandu va Yuda, ni va vola, Kwinye ku veye nevidieli likumi mu mwami, na ku veye neliva lyetu mu mwami kuvita mwinye: kigira ki mwinye mu leganga kwinye, kuduka likuva lyetu li vule kutanga kwenywa lyokwirannya mwami wetu? Namakuva gavandu va Yuda ga li malulu kuvita makuva gavandu va Israeli.