Read lulogooli 2 Samweli 20 Bible Online

2 Samweli 20 - lulogooli bible

2 Samweli 20

¹Ya li ho mundu mudamano, lieta lilye lya li Sheba, mwana wa Bikiri Mubenjamini: na ya kupa kisaliva kuvola, Kwinye si ku veye nekidieli mu Daudi, kinga si ku veye nemiyandu mu mwana wa Jesse: mundu sa mulala a tsie mu lihema lilye, mwinye O Israeli.

²Ma avandu vosi va Israeli vanegira kuleka kulonda Daudi, navo va londa Sheba, mwana wa Bikiri: navutswa avandu va Yuda va hambana nomwami wavo kutwula Yordani kuduka Yerusalemi.

³Na Daudi ya duka mu inyumba yeye ha Yerusalemi; nomwami ya vugula avakali likumi, avasuria veve ava ya li ni ya leka ho kulinda inyumba, na a va vika haluvega, na ya va ha vyokulia vyokuvaduka, navutswa si yingira kuvo. Ma va vikwa haluvega kuduka lidiku lyelikudza lyavo, va menya kuli avakunzakali.

⁴Hene yaho mwami ya volera Amasa, U vungidze ku inze avandu vosi va Yuda mu madiku gavaka, na ive u veye hano imbiri wange.

⁵Ma Amasa ya tsia kuvungidza halala avandu vosi va Yuda; navutswa ya lindagira kuvita inyinga ya ya mu laga.

⁶Na Dau'di ya volera Abishai, Kalunu Sheba mwana wa Bikiri a la ku kolera budamano kuvita bwa Abisalom ya ku kolera: ive u vugula avatumekiri vomwami wowo, u tsie navo u mu londerere, gase a lenyolera amadala getsingulu, nokuhona ku vule kumulola kandi.

⁷Navandu va Joabu va mu londa, na Vakerethi na Vapelethi, na vosi avetsingulu; na va twula Yerusalemi kulonderera Sheba mwana wa Bikiri.

⁸Na lwa va li himbi neligina linene li veye ha Gibeon, Amasa yadza kuvaganira. Na Joabu ya li neyiviki ingubo yelihe, nomusipi ku tsingubo, halala nekivavi ki bofwa ku kikenge kikye, mu Iwula lwakyo; na lwa ya genda kya gwa.

⁹Na Joabu ya teva Amasa, Ga ve malahi ku ive, amwavo wange? Na Joabu ya gumira Amasa kisuli nomukono gwigwe mulungi ku mbusa.

¹⁰Navutswa Amasa si ya henza kivavi kya li mmukono gwa Joabu: ma ya mu tumita nakyo munda, nokusundula amala gege hasi, na si ya mu duya kandi; na ya kudza. Na Joabu na Abishai amwavo wewe va londerera Sheba mwana wa Bikiri.

¹¹Nomulala ku vasoleli va Joabu, ya singira himbi na a vola, Ku vosi uyu u tovola Joabu, na u veye ku luvega lwa Daudi, a londe Joabu.

¹²Na Amasa ya li na a galagala mmasahi gege hagati helihasi. Na lwa mundu ya lola avandu vosi va singiye, ya vugula Amasa na a mu twulidza mu lihasi na a mbika mbulimu, na a mu fwuma nengubo, lwa ya lola sa mulala wa vitanga himbi naye ya singira.

¹³Lwa ya mala kutwulidzwa mu lihasi, avandu vosi va tsia imbiri kulonda Joabu kulonderera Sheba mwana wa Bikiri.

¹⁴Naye ya vita mu tsihiri tsyois tsya Israeli kuduka Abeli, na Bethmaaka, na Vaberi vosi: va vungidzwa halala kumulonda.

¹⁵Na va duka ni va mu kumberidzira mu Abeli lya Bethmaaka, ni va kola kitumi imbiri welidala, ni ki singira nokuduka ku lidigi lyempinga; navandu ava li halala na Joabu va sasugula lidigi va duke kulitsoma hasi.

¹⁶Hene yaho mukali mulala wobugeeri ya kupa ikwili mu lidala, na a vola, Mu hulire, mu hulire, mwadza, mu volere Joabu, Udze ino, nduke kuvolerana nive.

¹⁷Naye yisunda himbi kuye; nomukali zana ya mu teva, Ive u veye Joabu? Naye ya tivula, Ninze. Hene yaho ya mu volera, U huliridze makuva gange inze mukana mutugwa wowo. Naye ya tivula, Yee, mbulira.

¹⁸Hene yaho ya moloma, na a vola, Inyinga ya kale va nala kuvola makuva yaga, ni va vola, Ligali va lenya livola ha Abeli: na ndiyo va heridza makuva.

¹⁹Inze mbeye ku yavo avemirembe, navasuuvirifu mu Israeli: ive wenyanga kwononya lidala, na mama wa Israeli: kigira ki ive wenyanga kumira miyandu gya Yahova?

²⁰Na Joabu ya tivula na a vola, Ga ve ihale, ga ve ihale ku inze, nduke kumira kinga kwononya.

²¹Si ga veye kuli yaga: navutswa umundu mulala wekivala kyevigulu kya Efiraim, wa langwa Sheba mwana wa Bikiri, u gingi mukono gwigwe ku mwami, kali ku Daudi; u twulidze uyu yeng'ine, na nda twula kuleka lidala. Nomukali ya volera Joabu, Henza, mutwe gwigwe gu la sikiswa ku ive igulu welidigi.

²²Hene yaho mukali ya tsia ku vandu vosi mu ubugeeri bwibwe. Navo va kala mutwe gwa Sheba mwana wa Bikiri, na va gu sikisira Joabu kyova. Na Joabu ya kupa kisiliva, ni va salana kuleka lidala, sa mulala ya tsia mu lihema lilye. Na Joabu yirana Yerusalemi ku mwami.

²³Inyinga yeyo Joabu ya li igulu ku lihe lyosi lya Israeli; na Benaia mwana wa Jehoiada ya li igulu ku Vakerethi na igulu ku Vapelethi;

²⁴na Adoram ya li igulu ku ubusutu; na Jehoshafatu mwana wa Ahiludu wa li wokung'oda;

²⁵na Sheva ya li karani; na Zadoku na Abiatharu va li avasalisi;

²⁶na kandi Ira Mujairi ya li munene halala na Daudi.