Read lulogooli 2 Samweli 5 Bible Online

2 Samweli 5 - lulogooli bible

2 Samweli 5

¹Kunangwa tsihiri tsyosi tsya Israeli tsya duka ku Daudi ha a Hebironi, na va mu volera, ni va vola, Henza, ku veye kigumba kikyo, nombiri gugwo.

²Inyinga ya matsyambiri, lwa Saulo ya li mwami ku kwinye, ni ive wimirira Israeli va twula nokuvingiridza: na Yahova ya ku volera, Ive u la va mwayi wavandu vange Israeli, na u la va munene ku Israeli.

³Ma avakulundu vosi va Israeli va tsia ku mwami ku Hebironi; na mwami Daudi ya lomba lilagana navo ha Hebironi imbiri wa Yahova: navo va vaka Daudi maguta a ve mwami ku Israeli.

⁴Daudi ya li nemihiga makumi gavaka lwa ya tanga kwnmeha, naye yameha mihiga makumi gane.

⁵Yameha mu Hebironi ku Yuda mihiga gyitano na gyiviri nemyeli gyitano na mulala; na mu Yerusalemi yameha mihiga makumi gavaka na gyivaka ku Israeli na Yuda vosi.

⁶Nomwami navandu veve va tsia Yerusalemi kulwana na Vajebusi, avamenyi mu kivala, va volera Daudi, ni va vola, Nu u va nu u ta twulidza avaboku navalema, si u lingira yimu mba; va ganagana Daudi si a nyala kwingira mu.

⁷Navutswa Daudi ya guuta impinga ya Zion; nayo i veye lidala lya Daudi.

⁸Na Daudi ya vola lidiku yilyo, Uyu u kuya Avajebusi, yanegire kuduka ku mugera gwamadzi, na a kuye avaboku navalema, avomwoyo gwa Daudi gu vihirirangwa. Kigira yaga va vola, Va va ho vaboku navalema; si a nyala kwingira mu inyumba.

⁹Ma Daudi ya menya mu impinga, na ya gi gulika lidala lya Daudi. Na Daudi yombaka kukumbiridza kutwula Milo kuduka hagati.

¹⁰Daudi ya tesa kuva umunene; kigira Yahova, Nyasaye wa mahe, ya li halala naye.

¹¹Na Hiram mwami wa Turo ya tuma vatumwa ku Daudi, na a hila misala gyomutaragwa, na vavadzi, na vombaki; na vombakira Daudi inyurmba.

¹²Na Daudi ya lola Yahova u mu dinyeridzi a ve mwarni ku Israeli, na ya nenehidza ubwami bwibwe kigira avandu veve Israeli.

¹³Na Daudi ya vugula avasuria avandi navakali avandi mu Yerusalemi, inyima welitwula Hebironi; ni yivula avandi vayai navakana.

¹⁴Ameta gavana vivulwa kuye ha Yerusalemi ni yaga: Shamua, na Shobabu na Nathan, na Solomoni

¹⁵na Ibiharu, na Elishua, na Nefegu na Jafia,

¹⁶na Elishama, na Eliada, na Elifeleti.

¹⁷Na Vafilisiti lwa va hulira va vaki Daudi maguta a ve mwami ku Israeli, Vafilisiti vosi vanegira kwenya Daudi; na Daudi ya ga hulira, na a sulunguta kutsia mu impinga.

¹⁸Na Vafilisiti va li ni va mali kuduka kwilandidza mivona lya Refaim.

¹⁹Na Daudi ya teva Yahova, na a vola, Nyanegire kulwana na Vafilisiti, naho? U la va vika mmukono gwange, naho? Na Yahova ya volera Daudi, Wanegire, kigira ligali nda vika Vafilisiti mmukono gugwo.

²⁰Na Daudi ya duka Baalperazim, na Daudi ya va kuyira yo; naye ya vola, Yahova u vunanye avasigu vange imbiri wange, kuli litegula lyamadzi. Kunangwa ya gulika lieta lya ha zana, Baalperazim.

²¹Navo va leka ho vifwananyi vyavo; na Daudi navandu veve va vi vugula ni va vi samba.

²²Na Vafilisiti vanegira kandi, ni velandidza mwivona lya Refaim.

²³Na lwa Daudi ya teva Yahova, ya mu volera, U tanegira mba: u kupe amangodze inyima wavo, na u duke kuvo himbi nemisala gyetsinyengereri.

²⁴Na ga la va, lwa u hulira muliviti gweligenda ku tsisonge tsyemisala gyetsinyengereri, hene yaho u la singira bwangu; kigira Yahova u mali kutsia imbiri wowo inyinga yeyo kukuya lihe lya Vafilisiti.

²⁵Na Daudi ya kola ndiyo, kuli Yahova ya mu laga, na ya kuya Vafilisiti kutwula Geba kuduka Gezeri.