Read lulogooli 2 Samweli 9 Bible Online

2 Samweli 9 - lulogooli bible

2 Samweli 9

¹Na Daudi ya vola, A veye ho mulala wa tigala ku inyumba ya Saulo, nduke kumuvera tsimbabasi kigira Jonathan?

²Na ya li ho wenyumba ya Saulo mutumekiri a mulala, wa langwa lieta lilye Ziba, na va mu langa a tsie ku Daudi; nomwami ya mu teva, Ive ni Ziba? Naye ya vola, Ni inze mutumekiri wowo.

³Nomwami ya mu teva, Kalunu si a veye ho kali mulala we nyumba ya Saulo, nduke kumuvera tsimbabasi tsya Nyasaye? Na Ziba ya volera mwami, Jonathan a veye nomwana, kuduka kalunu, wa li mulemawevirenge.

⁴Nomwami ya mu teva, Wa zana a veye haliha? Na Ziba ya volera mwami, Henza, veye mu inyumba ya Makiru mwana wa Amieli, mu Lodebari.

⁵Hene yaho mwami Daudi ya tuma mutumua, na ya mu leta kutwula mu inyumba ya Makiru, mwana wa Amieli, kutwula Lodebari.

⁶Na Mefiboshethu, mwana wa Jonathan, mwana wa Saulo, ya duka ku Daudi, na a gwa mammama, na a sigamira. Na Daudi ya vola, Mefiboshethu. Naye ya bugira, Henza, mbeye hano, mutumekiri wowo

⁷Na Daudi ya mu volera, U ta tia mba; kigira ligali nda ku vera tsimbabasi kigira dada wowo Jonathan na nda kwiranyira wowo Jonathan, na nda kwiranyira milimi gyosi gya Saulo dada wowo; na ive u la lagira ku imeza yange kazozo.

⁸Naye ya sigama, na a vola, Inze mutumekiri wowo ni kindu ki, kuduka ive u luhe u henze ku imbwa inkudzu kuli inze mbeye?

⁹Hene yaho mwami ya langa Ziba, mutumekiri wa Saulo, na a mu volera. Vindu Vyosi vya li vya Saulo nevyenyumba yeye vosi mmali kuha mwana womunene wowo.

¹⁰Na ive u la mu limira milimi, ive, navana vovo, navatumwa vovo; na u la leta ryamo nekuvivika, mwana womunene wowo a duke kuva nevyo kulia: navutswa uyu Mefiboshethu mwana womunene wowo a la lagira ku imeza yange kazozo. Na Ziba ya li navana likumi na vatano avayai, navatugwa makumi gaviri.

¹¹Hene yaho Ziba ya volera mwami, Inze mutumekiri wowo nda kola kuli yaga gosi ago munene wange mwami a laga inze mutumekiri wewe. Ku makuva ga Mefiboshethu, mwami ya vola, Uyu a la lagira ku imeza yange, kuli mulala ku avana vomwami.

¹²Na Mefi boshethu ya li nomwana mulala mudoto muyai, wa langwa Mika. Na vosi ava menya mu inyumba ya Ziba va li avatumekiri va Mefiboshe thu.

¹³Kunangwa Mefiboshethu ya menya mu Yerusalemi; kigira ya li na a lagiranga kazozo ku imeza ya mwami. Naye ya li umulema virenge vyombi.