Read lulogooli 1 Avami 11 Bible Online

1 Avami 11 - lulogooli bible

1 Avami 11

¹Kunangwa Solomoni ya yanza avakali avanyingi avageni, halala na mukana wa Farao, avakana va Vamoabu, na Vaamon, Vaedom, na Vasidone na Vahiti;

²avetsihiri tsya Yahova ya volera avana va Israeli, na a vola, Si mu la duka kuvo, kinga si va la duka ku mwinye; kigira ligali va la girunkannya myoyo gwenyu kulonda vanyasaye vavo: Solomoni ya hambana navo mbuyanzi.

³Na ya li navakali tsimia tsitano na tsiviri, avakana vavami, na vasuria tsimia tsivaka; na vakali veve va girunkannya mwoyo gwigwe.

⁴Kigira Solomoni lwa ya duka musakulu, ga duka, avakali veve va giru nkannya mwoyo gwigwe a londe avanyasaye vandi; nomwoyo gwigwe si gwa li mudukanu ku Yahova Nyasaye wewe, kuli liva lyomwoyo gwa dada wewe Daudi.

⁵Kigira Solomoni ya londa Ashitorethu munyasaye wekikali wa Vasidone, na Milikom livihiriridza lya Vaamori.

⁶Solomoni ya kola ubudamano imbiri wetsimoni tsya Yahova, na ya vula kulonda Yahova nobudukiru, kuli dada wewe Daudi.

⁷Ma Solomoni yombakira Kemoshu ha diguluku, livihiriridza lya Moabu, mu kigulu ki henza Yerusalemi, kandi yombakira Moleku livihiriridza lyavana va Amon.

⁸Na ya kola ndiyo kandi kigira avakali veve vageni vosi, avavuyidza kimuli nokuhaana vihaanwa ku vanyasaye vavo.

⁹Na Yahova ya vihirirwa Solomoni, kigira mwoyo gwigwe gwa girunkana kuleka Yahova, Nyasaye wa Israeli, wa loleka kuye hali kaviri,

¹⁰nokumulaga ku inkuva yiyi, a vule kulonda avanyasaye vandi: navutswa ya vula kugumira kya Yahova ya mu laga.

¹¹Kigira yaga Yahova ya volera Solomoni, na a vola, Kigira ive u veye nenkuva yiyi na u vuli kugumira lilagana lyange na malago gange, ga nda ku laga, ligali nda tandula ubwami bu twule ku ive, na nda ha mutumekiri wowo.

¹²Navutswa si nda kola likuva yili mmadiku gogo, kigira dada wowo Daudi: navutswa nda bu tandula nokubutwulidza mmukono gwomwana wowo.

¹³Navutswa si nda tandula nokutwulidza ubwami bwosi mba nda ha mwana wowo ihiri indala kigira mutumekiri wange Daudi, kandi kigira Yerusalemi lidala lya nda tovola.

¹⁴Na Yahova ya vukidza musigu ku Solomoni, Hadadi Muedom: a veye wekisukululwi kyomwami mu Edom.

¹⁵Kigira ga duka, lwa Daudi ya li mu Edom, na Joabu munene welihe lwa ya li na a tsia kuta aviitwa, naye ya li na mali kwiita avekisatsa vosi mu Edom

¹⁶(kigira Joabu na Israeli vosi va menya yo inyinga yemyeli gyitano na mulala, kuduka lwa ya mala kukuya avasatsa vosi mu Edom);

¹⁷Ha dadi yiruka, uyu na Vaedom valala avatumekiri va dada wewe halala naye, va tsie Egepeti, Hadadi zana ya li na a kikiri mwana mukekeke.

¹⁸Na va singira kutwula Midiani, na va duka ha Paran; na va vugula avandu halala navo ava twula Paran ni va duka Egepeti, ni va duka ha Farao mwami wa Egepeti, wa mu ha inyumba, nokulaga vyokulia kuye nokumuha hokulima.

¹⁹Na Hadadi ya nyoia tsimbabasi imbiri wa Farao, kuduka ya mu sererera amwavo womukali wewe mwene, amwavo wa Tahapenesi mwami weki kali.

²⁰Na uyu amwavo wa Taha penesi yivulira Hadadi Genubathu muyai wewe, wa Tahapenesi ya lugu hidzira mu inyumba ya Farao; na Genubathu ya li mu inyumba ya Farao hagati ha avana va Farao.

²¹Na lwa Hadadi ya hulira mu Egepeti, Daudi u mali kugona navaguga veve, kandi Joabu munene welihe u kudzi, hene yaho Hadadi ya volera Farao, Mbe umunwa ntsie kuduka mu kivala kyange.

²²Hene yaho Farao ya mu volera, Navutswa u daki kindu ki ku inze hano, kya wenyeranga kutsia mkivala kikyo? Naye ya tivula, Auwa: kindu mba, navutswa mbe munwa ntsie vutswa.

²³Nyasaye ya singeridza ku Solomoni musigu uundi, naye ni Rezon mwana wa Eliada, wiruka kutwula ku munene wewe Hadadezeri mwami wa Zoba.

²⁴Naye ya vungidza avandu kuye, naye ya duka kuva munene ku lihe, lwa Daudi yiita avandu wa Zoba: navo va tsia mu kivala kya Damasko, ni va menya yo, na vameha mu kivala kya Damasko.

²⁵Naye ya li musigu wa Israeli madiku gosi ga Solomoni kuvita ubudamano bwa Hadadi ya kola: naye ya dunyira Israeli, na yameha Siria.

²⁶Na Jeroboam mwana wa Nebati Muefiraim wa Zereda, mutumekiri wa Solomon, wa mama wewe ya la ngwa Zerua, naye ya li mukunzakali, uyu kandi ya ginga mukono gwigwe ku mwami.

²⁷Na kivuni kyagira na a ginga mukono gwigwe ku mwami ni yiki: Solomoni yombaka impinga ya Milo, nokulomba ha gwa mu lidala lya dada wewe Daudi.

²⁸Nomundu uyu Jeroboarn ya li musatsa wetsingulu; na Solomoni ya lola musoleli uyu a veye mundu mugulu ligali, na ya mu vika igulu ku miyinzi gyosi gyenyumba ya Yosefa.

²⁹Ga duka inyinga yeyo, Jeroboam lwa ya twula Yerusalemi, muprofeti Ahija Mushilon ya mu nyola ku inzira; na Ahija ya li ni yeviki ingubo impya, navo vombi va li veng'ine mmulimi.

³⁰Na Ahija ya gumira ingubo impya ya ya li ni yeviki; na a gyi tandula vidonye likumi na viviri.

³¹Na ya volera Jeroboam, Vugula vidonye likumi; kigira Yahova, Nyasaye wa Israeli, a vola, Henza, nda tandula ubwami nokubutwulidza mmukono gwa Solomoni, na nda ku ha tsihiri likumi

³²(navutswa a la va nehiri indala, kigira mutumekiri wange Daudi, kandi kigira Yerusale mi, lidala lya nda tovola mu tsihiri tsyosi tsya Israeli);

³³kigira va mali kunzivirira, nokusigamira Ashitore thu nyasaye wekikali wa Vasidone, na Kemoshu nyasaye wa Vamoabu, na Milikom nyasaye wavana va Amon; na va vula kugenda ku tsinzira tsyange, nokukola ubulungi imbiri wange, nokuoumira amalago gange, nelikalaga lyange, kuli dada wewe Daudi ya kola.

³⁴Navutswa si nda twulidza ubwami bwosi mmukono gwigwe; navutswa nda mu kola a ve munene madiku gelivamwoyo lilye lyosi, kigira mutumekiri wange Daudi, wa nda tovola, kigira uyu ya gumira lilagana lyange namalago gange;

³⁵navutswa nda nyaga mwana wewe mmukono gwigwe, ubwami, na nda ha ive, kuduka tsihiri likumi

³⁶Na nda ha mwana wewe ihiri indala, umutumekiri wange Daudi a duke kuva netaya yokwaaka imbiri wange madiku gosi mu Yerusalemi, lidala lya nda tovola nduke kuvika lieta lyange mu.

³⁷Na nda vugula ive, na u lameha kuli gosi ga roho gugwo gwenyanga, na u la va mwami ku Israeli.

³⁸Na ga la va, ive nu u va nu u hulira gosi ga nku laga, no kugenda mu tsinzira tsyange, noku kola ubulungi imbiri wange, kugumira amalago gange nelilagana lyange, kuli mutumekiri wange Daudi ya kola; nda va halala nive, nda kwo mbakira inyumba yetsingulu, kuli ndombakira Daudi, nda ha ive Israeli.

³⁹Na kigira yaga nda dambidza visukululwi vya Daudi, navutswa si nda yi dambidza madiku gosi mba.

⁴⁰Solomoni yenya kwiita Jeroboam kigira yaga; navutswa Jeroboam yiruka kutsia Egepeti, na a duka ku Shishaka mwami wa Egepeti, na ya li mu Egepeti kuduka likudza lya Solomoni.

⁴¹Na vikolwa vya Solomoni vya tigala, nevindu vyosi vya ya kola, nobugeeri bwibwe, si vya ng'odwa mu kitabu kyevikolwa kya Solomoni?

⁴²Na inyinga ya Solomoni yameha mu Yerusalemi ku Israeli vosi ya li inyinga yemihiga makumi gane.

⁴³Na Solomoni ya gona navaguga veve, na a tebwa mu lidala lya dada wewe Daudi: na Rehoboam mwana wewe yameha mubugono bwibwe.