Read lulogooli 1 Avami 15 Bible Online

1 Avami 15 - lulogooli bible

1 Avami 15

¹Mmuhiga gu kola likumi na gyitano na gyivaka gwelyameha lyomwami Jeroboam mwana wa Nebati, Abijam ya tanga kwameha ku Vayuda.

²Yameha mihiga gyivaka ha Yerusalemi: mama wewe ya langwa Maaka mukana wa Abishalom.

³Ya genda mu ubwoni bwosi bwa dada wewe, ya tanga kukola imbiri wewe; mwoyo gwigwe si gwa li mudukiru halala na Yahova Nyasaye wewe, kuli mwoyo gwa dada wewe Daudi.

⁴Navutswa Yahova Nya saye wewe ya mu ha itaya mu Yerusalemi, kigira Daudi, kuvika mwana wewe lwenyima kuye, nokusingeridza Yerusalemi;

⁵kigira Daudi ya kola bulungi imbiri wa Yahova, si ya girunkana kuleka likuva lya Yahova madiku gosi gelivamwoyo lilye, ni ga ta li ku likuva lya Uria Muhiti lyeng'ine.

⁶Na ubulwani bwa li hagati ha Rehoboam na Jeroboam madiku gosi gelivamwoyo lilye.

⁷Na vikolwa vya Abijam vi tigaye, nevindu vyosi vya ya kola, si vya ng'odwa mu kitabu kyetsinyinga tsyavami va Yuda? Nobulwani bwa li ho hagati Abijam na Jeroboam.

⁸Na Abijam ya gona halala navaguga veve; na va mu ta mu lidala lya Daudi: na Asa mwana wewe yameha mbugono bwibwe.

⁹Mu muhiga gwa kola makumi gaviri gwelyameha lya Jeroboam mwami wa Israeli, Asa ya tanga kwameha ku Yuda.

¹⁰Naye yameha mihiga makumi gane na mulala mu Yerusalemi: na mama wewe ya langwa Maaka mukana wa Abishalom.

¹¹Na Asa ya kola bulungi imbiri wa Yahova kuli guga wewe Daudi ya kola.

¹²Naye ya twulidza avaheyi v a twule mkivala, nokutwulidza vifwananyi vyosi vya vadada ueue va lomba.

¹³Na Maaka mama wewe ya mu twulidza mu bwami bwekikali kigira ya lomba kifwananyi kidamano ku munyasaye wekikali; na Asa ya tema kifwananyi kikye, na a kisambira ho mugera gwa Kidiron.

¹⁴Navutswa hadiguluku ha vula kutwulidzwa: navutswa mwoyo gwa Asa gwa li mudukiru imbiri wa Yahova madiku gege gosi.

¹⁵Naye ya leta mu inyumba ya Yahova vindu vya dada wewe ya gima, nevindu vyo mwene ya gima, ifetha, nethahabu, neviju.

¹⁶Na ubulwani bwa li hagati ha Asa na Baasha mwami wa Israeli madikugavo gosi.

¹⁷Na Baasha mwami wa Israeli yanegira kulwana na Yuda, na yombaka Rama, a duke kwigalira avandu va vule kutwula kinga kwingira ku Asa mwami wa Yuda.

¹⁸Hene yaho Asa ya vugula ifetha yosi nethahabu ya tigala mu butugi bwa akiba yenyumba ya Yahova, nomu ubutugi bwakiba yenyumba yomwami, ya bu vika mmukono gwavatumekiri veve; na mwami Asa ya vi hila ku Ben hadadi, mwana wa Tabirimon, mwana wa Hezion, mwami wa Siria, wa menya Damasko, na a vola,

¹⁹Ha veye nelilagana hagati hange nive, hagati ha dada wange na dada wowo: henza, nku leteye kihaanwa kyefetha nethahabu; u tsie kwononya lilagana lilyo na Baasha mwami wa Israeli, a duke kutwula ku inze.

²⁰Na Ben hadadi ya hulira mwami Asa, na ya tuma avanyampara vamahe gege ku madala ga Israeli, ni va kuya Ijon, na Dan, na Abelbethmaaka, na Kinerothu kyosi halala nekivala kyosi kya Nafitali.

²¹Na ga duka lwa Baasha ya hulira yaga, ya leka kwombaka Rama, ya tsia kumenya Tiriza.

²²Hene yaho mwami Asa ya landidza lilaga mu Buyuda bwosi, si ha veye nomundu wa lekwa: navo va hila magina ga Rama, nokugatwulidza, nemisala gyalyo, gya Baasha ya li ni yombakiye; nomwami Asa yombaka navyo, Geba lya Benjamini, na Mizipa.

²³Kunangwa vikolwa vya Asa vya tigala, netsingulu tsitsye, navyosi vya ya kola, na madala ga yombaka, si vya ng'odwa mu kitabu kyetsinyinga tsyavami va Yuda? Navutswa mmadiku gobusakulu bwibwe ya lwala virenge.

²⁴Ma Asa ya gona navaguga veve, na a tebwa halala navaguga veve mu lidala lyaguga wewe Daudi; na mwana wewe Jeho-shafatu yameha mbugono bwibwe.

²⁵Na Nadabu mwana wa Jeroboam ya tanga kwameha ku Israeli ku muhiga gu kola gyiviri gwelyameha lyomwami Asa wa Yuda; naye yameha ku Israeli mihiga gyiviri.

²⁶Na ya kola ubudamano imbiri wa Yahova, na ya genda ku tsinzira tsya dada wewe nomubwoni bwibwe bwa ya gotidzira ku Israeli.

²⁷Na Baasha mwana wa Ahija, wehiri ya Isakari, ya mwekeruka; na Baasha ya mu kuya ha Gibethon, lya li lya Vafilisiti; kigira Nadabu na Israeli vosi va kumbiridza lidala lya Gibethon.

²⁸Baasha ya mwiitira mmuhiga gwegyivaka gwelyameha lya Asa mwami wa Yuda, naye yameha mbugono bwibwe.

²⁹Nonoho ga duka, lwa ya li mwami, ya kuya vosi avenyumba ya Jeroboam: si ya lekera Jeroboam kali mulala wa li mwoyo, kuduka ya mu dividza ligali; kuli livola lya Yahova, lya ya vola nomunwa gwomutumekiri wewe Ahija Mushilon;

³⁰kigira ubwoni bwa ya kola, bwa ya gotidzira ku Israeli kigira livihiriridza lilye lya ya vihiriridza Yahova, Nyasaye wa Israeli.

³¹Kunangwa vikolwa vyosi vya Nadabu vya tigala, na vyosi vya ya kola, si vya ng'odwa mkitabu kyetsinyinga tsyavami va Israeli?

³²Ha li nobulwani hagati ha Asa na Baasha mwami wa Israeli madiku gavo gosi.

³³Mu muhiga gwegyivaka gwelyameha lya Asa mwami wa Yuda, Baasha mwana wa Ahija ya tanga kwameha mu Tiriza, ku Israeli vosi, na yameha mihiga makumi gaviri na gyine.

³⁴Na ya kola budamano imbiri wa Yahova, na ya genda mu inzira ya Jeroboam, nomu bwoni bwibwe bwa ya gotidzira ku Israeli.