Read lulogooli 1 Avami 17 Bible Online

1 Avami 17 - lulogooli bible

1 Avami 17

¹Na Elija Mutishibi, wa li mu yavo va menya ha Gileadi, ya volera Ahabu, Kuli Yahova, Nyasaye wa Israeli, a veye mwoyo, wa inze singiye imbiri wewe, si ha la va nelime kinga imbula ku mihiga yigyi, ni ga ta li kuli likuva lyange.

²Likuva lya Yahova lya duka ku Elija, ni li mu volera,

³Twula hano, u tsie ivugwe, wivise ahimbi nomugera gwa Kerithu, gu henza Yordani.

⁴Na ive u la nwa amadzi gomugera; na ndagi amajikolo kukuletera yo vyokulia.

⁵Ma ya tsia na a kola kuli likuva lya Yahova; kigira ya tsia na a menya himbi nomugera gwa langwa Kerithu, gu henza Yordani.

⁶Na majikolo ga mu letera ubukima nenyama mugamba, nobukima ne nyama mgolova; naye ya nwa madzi gomugera.

⁷Na lwenyima, mugera yigwo gwa kama, kigira imbula ya vula kukupa mkivala.

⁸Na likuva lya Yahova lya duka kuye, ni li mu volera,

⁹Singira u tsie Zarefathu, lidala lya Sidone u menye yo: kigira mali kulaga mukali mukunzakali ha zana a ku dekera.

¹⁰Ma ya singira na a tsia Zarefathu; na lwa ya duka ha kiribwa kyelidala, henza mukali mukunzakali ya li ho na a tenyanga: ya mu langa, na a mu volera, Mwadza, u ndetere madzi makekeke ku kisanda, nduke kunwa.

¹¹Lwa ya li na a tsitsanga kuleta amadzi, ya mu langa kandi, na a vola Mwadza, u ndetere kadonye kobukima mmukono gugwo.

¹²Naye ya tivula, Kuli Yahova Nyasaye wowo a veye mwoyo, inze si mbeye nobukima mba, navutswa vya mbeye navyo, nobusie uluhe lulala mu inyingu, na maguta makekeke mu kiseve: na, henza, inze ntenyanga tsinku tsiviri yitsi, ntsie kulugira inze mwene nomwana wange, ku lagire ma ku kudze.

¹³Na Elija ya mu voiera, U ta tia mba; u tsie kukola kuli u voye; navutswa u tange kundugira ubukima bukekeke, u ndetere ha kyova hano, ma kandi u lugire ive mwene nomwana wowo.

¹⁴Kigira Yahova, Nyasaye wa Israeli, a vola, Inyingu yobusie yiyi si i la fwa mba, kandi kiseve kyamaguta si ki la fwa, kuduka lidiku lya Yahova a kupidza imbula ku kivala.

¹⁵Naye ya tsia na a kola kuli livola lya Elija: na uyu, na Elija, na venyumba yeye, va lagira madiku ga duki.

¹⁶Inyingu yobusie si ya fwa mba, nekiseve kyamaguta si kya fwa mba, kuli likuva lya Yahova, ya vola nomunwa gwa Elija.

¹⁷Inyima wevindu yivi, mwana womukali, mwene inyumba yeyo, ya lwala; nobulwaye bwibwe bwa li ubunene, kuduka mwika gyigye gya twula.

¹⁸Naye ya volera Elija, Nda ku kolera ki, O ive mundu wa Nyasaye? U duki hano ku inze kwidzulitsa ubwoni bwange, nokwiita mwana wange

¹⁹Naye ya mu volera, Mbe mwana wowo. Naye ya vugula mwana wewe ku kiritu kikye, na a mu hila igulu, na a mbika mu kegodi kyenyumba yomwene a menyi mu, na a mwalira ku kitali kikye.

²⁰Na yanira Yahova, na a vola, O Yahova Nyasaye wange, u leti budamano yibu ku mukunzakali uyu wa menyi hehe, kuliita mwana wewe?

²¹Na Elija ya gonera ku mwana hali gavaka, nokwanira Yahova, na a vola, O Yahova Nyasaye wange, nku saalanga, u leke mwoyo gwomwana uyu gwirane muye kandi.

²²Na Yahova ya hulira mwoyo gwa Elija; nomwoyo gwomwana gwirana muye kandi, na ya simuguka.

²³Na Elija ya vugu la mwana, na a tsia naye kutwula mu kegodi, na a mu leta mu inyumba, na a ha mama wewe; na Elija ya mu vo lera, Ole, mwana wowo a veye mwoyo.

²⁴Nomukali ya volera Elija, Kalunu manya ive u veye mundu wa Nyasaye, na makuva ga Yahova mmunwa gugwo ga veye geligali.