Read lulogooli 1 Avami 20 Bible Online

1 Avami 20 - lulogooli bible

1 Avami 20

¹Kunangwa Benhadadi mwami wa Siria ya vungidza lihe lilye lyosi halala; na va li ho halala naye avami makumi gavaka na vaviri, netsiparasi namagari manyingi: na yanegira kukumbiridza lidala lya Samaria, nokulwana nalyo.

²Na ya tuma vatumwa ku Ahabu mwami wa Israeli, mu lidala, nokumuvolera, Benhadadi a ku volera,

³Ifetha yoyo nethahabu yoyo ni yange; navakali vovo navana vovo, ligali ava veye avalahi, na vange.

⁴Umwami wa Israeli ya tivula na a vola, Yee, ga veye kuli u volanga, munene wange, O mwami; inze mbeye wowo, hala na vyosi vya mbeye navyo.

⁵Ma avatumwa vadza kandi, ni va vola Benhadadi a ku volera, na a vola Ligali ndeti ku ive avatumwa, ni mbola, U la mba ifetha yoyo, nethahabu yovo, navakali vovo, navana vovo;

⁶navutswa inze nda leta avatumekiri vange ku ive mu gamba, inyinga kuli yiyi, navo va la lanya inyumba yoyo, netsinyumba tsyavatumekiri vovo; na ga la va, ku vyosi ki dukana mu tsimoni tsyavo, va la ki gumira mmakono gavo, nokukitwulidza.

⁷Hene yaho mwami wa Israeli ya langa avakulundu vekivala, nokuva volera, Mu manye, mmugoonya ligali, mu lole, mundu uyu yenyanga inkuva indamano; kigira ya leta avatumwa ku inze kwenya avakali vange, navana vange, nefetha yange, nethahabu yange; na inze si nda mu gaya mba.

⁸Na vakulundu yavo vosi navandu vosi va mu volera, U ta hulira mba, kandi u ta bugirira mba.

⁹Kunangwa ya manya na a volera vatumwa va Benhadadi, Mu volere munene wange umwami, Ku vyosi kya wenya ku mutumekiri wowo lwa wa tanga kutuma, nda kola; navutswa inkuva yiyi si nyala kugikola mba. Ma vatumwa va tsia, ni va mu volera.

¹⁰Benhadadi ya tuma vatumwa kuye kandi, na a vola, Avanyasaye va nkolere ndiyo kandi, nokuvita, ulugukyi lwa Samaria ni lu va ni lu duka avandu yava vosi ava londa inze, sa mulala a nyole uluhe lulala.

¹¹Nomwami wa Israeli ya tivula, na a vola, Mu mu volere yaga, Uyu wevikanga vyuma vivye a teyidzominya kuli uyu u navulanga.

¹²Na ga duka, Benhadadi ya hulira likuva yili, lwa ya li na a nwedzanga mu lihema, uyu navami va li halala naye, hene yaho ya volera vatumwa veve, Mwelombe ku lihe. Na velomba ku lihe ku lidala yilyo.

¹³Henza, mprofeti mulala yesunda ku Ahabu mwami wa Israeli, na a mu volera, Yahova a vola ndi, U loli kiduma kinene yiki kyosi? Henza nda ki vika mmukono gugwo lero ndi, na ive u la manya inze mbeye Yahova.

¹⁴Ahabu ya teva, Ni bwaha u kola? Naye ya tivula, Yahova a vola, Avasoleli vavanene vevivala va la kola. Ma ya teva, Ni bwaha a la vukidza bulwani zana? Na a vola, Ive.

¹⁵Ma ya vungidza avasoleli vavanene avevivala, navo va li avandu tsimia tsiviri na makumi gavaka na vaviri: na inyima kuvo ya vungidza avandu vosi, va li avana vosi va Israeli, ava li tsielfu tsitano na tsiviri.

¹⁶Na va twula mbasu hagati. Navutswa Benhadadi ya li mu linwa kuduka kuhambika mu mahema, uyu navami, va li avami makumi gavaka na vaviri ava mu konya.

¹⁷Nava soleli vavanene vevivala va tanga kutwula; na Benhadadi ya tuma avatumwa, na va mu volera, ni va vola, Avandu va twula Samaria.

¹⁸Naye ya vola, Ni va va ni vadza nemirembe, mu va gumire ni va veye mwoyo; kinga ni va va ni vadza nobulwani, mu va gumire ni va veye mwoyo.

¹⁹Ma yavo va twula mu lidala, avasoleli vavanene vevivala nelihe lyavasikari lya va londa.

²⁰Na viita sa mulala mundu wewe; na Vasiria viruka, na Israeli va va londa: na Benhadadi mwami wa Siria ya honera ku iparasi yeye, halala navasikari ava nina ku tsi parasi.

²¹Nomwami wa Israeli ya twula, na a kuya tsiparasi namagari, na yiita Vasuriata nelikuya linene.

²²Na muprofeti yesunda himbi ku mwami wa Israeli, na a mu volera, Tsia, wedinyeridze, nokumanya, u lole aga u kolanga; kigira inyinga yo muhiga gwirana, mwami wa Siria a lirana kandi kulwana nive.

²³Ava tumekiri vomwami wa Siria va mu volera, Nyasaye wa yavo a veye munyasaye wevigulu; yiki ni kigira yavo va veye netsingulu kuvita kwinye: navutswa gendi ku lwanire navo mu kivala kyekireremu, ligali ku la va avetsingulu kuvita yavo.

²⁴Kola yaga: twulidza avami sa mulala mbugono bwibwe, na u vike vanyampara mbugono bwavo;

²⁵na u validze lihe, li leng'ane nelihe lya gota, iparasi ku iparasi, na ligari ku ligari, na ku la lwanira navo mu kireremu, na ligali ku la va netsi ngulu kuvita yavo. Na ya hulira mwoyo gwavo, na a kola kuli a mu volera.

²⁶Na ga duka lwo muhiga gwirana, Benhadadi ya vungidza Ava siria, ni yanegira kutsia Afeku, a duke kulwana na Israeli.

²⁷Na vana va Israeli navo va vungidzwa, na va hebwa vyokulia, ni va tsia kulwana navo: na avana va Israeli va lomba hokusosa havo imbiri wavo va fwanana nevyayo viviri vikekeke vyevimeme; navutswa Avasiria vidzula kivala.

²⁸Na mundu wa Nyasaye yesunda himbi na a volera mwami wa Israeli, na a mu volera, Yahova a vola ndi, Kigira Avasiria va voye, Yahova a veye munyasaye wevigulu, navutswa uyu si a veye munyasaye wamavona mba; kigira yaga nda ku vikira kiduma yiki kyosi kinene mmukono gugwo, na mwinye mu la manya mbeye Yahova.

²⁹Na va lomba hokusosa havo ku henzana yava na yava madiku gatano na gaviri. Noku lidiku li kola gatano na gaviri va vugana ku bulwani; navana va Israeli viita Avasiria ku lidiku lilala avandu tsielfu mia ava genda nevirenge.

³⁰Navutswa ava tigala viruka kutsia Afeku, vingira mu lidala; nelidigi lyelidala lya va gwira, avandu tsielfu makumi gaviri na tsitano na tsiviri, ava tigala. Na Benhadadi yirukira mu lidala, ni yingira mu kegodi kyenyumba kyomugati ligali.

³¹Avatumekiri veve va mu volera, Henza kalunu, ku huliye avami ave nyumba ya Israeli va veye avami vetsimbabasi: mwadza, leka kwivike magunia ku vikenge, nemigoye ku mitwe, nokutsia ku mwami wa Israeli namusiya a la honnya mwoyo gugwo.

³²Ma vivika magunia mu vikenge vyavo, nemigoye ku mitwe, ni va tsia ku mwami wa Israeli, nokuvola, Uyu mutumekiri wowo Benhadadi a vola, Nku goonya, ndeke mbe mwoyo. Naye ya va tivulira, A veye mwoyo kuduka kalunu? A veye amwavo wange.

³³Ma avandu yavo va henzeridza ligali, nokukola bwangu kugumira kuli ga twula kuye; ni va vola, Amwavo wowo Benhadadi. Hene yaho ya vola Mu tsie, mu mu lete. Ma Benhada di ya twula kuduka kuye; naye ya mu nyinnya ku ligari lilye.

³⁴Ma Benhadadi ya mu volera, Amadala aga dada wange ya nyaga dada wowo nda kwiranyira; na u lelombera tsinzira mu Damasko, kuli dada wange ya kola mu Samaria. Ahabu ya rokl, Nda ku leka u tsie nelilagana yili. Ma ya kola lilagana halala naye, ma na a mu leka na a tsia.

³⁵Na mundu mulala ku avana vaprofeti ya volera wakye ku liku va lya Yahova, na a vola, Mwadza, u nkuye. Na mundu uyu ya sula kumukuya.

³⁶Ma ya mu volera, Kigira ive si u huliranga mwoyo gwa Yahova, henza nonoho lwa u twula ku inze, king'ang'a ki la kwiita. Naye nonoho lwa ya twula kuye, king'ang'a kya mu lola, noku mwiita.

³⁷Hene yaho ya nyola mundu wundi, na a mu volera Mwadza, u nkuye. Na mundu uyu va mu kuva na a mkuya nokumwata lugoma.

³⁸Ma muprofeti ya tsia, na ya lindirira mwami ku nyasi kwenzira, naye yegirunkanya neli kunika tsimoni tsitsye negudwa.

³⁹Na lwa mwami ya vita ku inzira, yanira mwami; na a mu volera, Inze mutumekiri wowo nda tsia kuduka hagati ho bulwani; na, henza, mundu mulala yirana, na a ndetera mundu, na ya mbolera, u linde mundu uyu: na a va na a gota, ligali mwoyo gugwo gu la va mbugono bwomwoyo gwigwe, kinga u tunge italenta ye fetha.

⁴⁰Na lwa mutumekiri wowo ya didikana yiyi neyiyi mundu uyo ya gota. Namwami wa Israeli ya mu volera, Nalikalagirwa lilyo li la va ndiyo; ive mwene u saaviye.

⁴¹Naye ya kola bwangu, na a twulidza igudwa ya li mu tsimoni tsitsye; nomwami wa Israeli ya mmanya a veye mulala ku vaprofeti.

⁴²Naye ya mu volera, Yahova a vola ndi, Kigira ive wa leka mundu na a twula mmakono gogo wa nda vika a divi dzwe ligali, kigira yaga mwoyo gugwo gu liitwa mbugono bwomwoyo gwigwe, navandu vovo mbugono bwavandu veve.

⁴³Namwami wa Israeli ya sulunguta kutsia yengo wewe nomwoyo mudinyu, gwobutima na a duka Samaria.