Read lulogooli 1 Avami 4 Bible Online

1 Avami 4 - lulogooli bible

1 Avami 4

¹Na mwami Solomoni ya li mwami ku Israeli vosi.

²Yava navanene va a veye navo: Azaria mwana wa Zadoku, musalisi;

³Elihorefu na Ahija, avana va Shisha, avang'odi; Jehoshafatu mwana wa Ahiludu, mung'odi wetsinyinga;

⁴na Benaia mwana wa Jehoiada wa li igulu ku lihe; na Zadoku na Abiatharu va li avasalisi;

⁵na Azaria mwana wa Nathan ya li igulu ku vanyampara; na Zabudu mwana wa Nathan ya li mu nene, na a li mulina womwami;

⁶na Ahisharu ya li munene ku inyumba; Adoniram mwana wa Abida ya li igulu ku vayinzira kutunga ubushutu.

⁷N a Solomoni ya li navanyampara likumi na vaviri igulu ku Israeli vosi, va leteranga mwami navenyumba yeye vyokulia: sa mulala ya nigwa kuleta vyokulia vyomweli mulala ku muhiga.

⁸Nameta gavo ni yaga: Benhuru, wa li mu kivala kyevigulu kya Efiraim;

⁹Bendekeri, mu Makazu, na mu Shaalibim, na mu Beth shemeshi, na mu Elonbethhanan;

¹⁰Benhesedi, mu Arubothu (Soko nekivala kyosi kya Heferu ki veye kuye);

¹¹Benabinadabu, mu kivala kyegulu kya Dori (uyu ya li na a mali kukwa Tafathu mukana wa Solomoni);

¹²Baana mwana wa Ahiludu, mu Taanaka na Megido, na hosi ha Bethshean kya li himbi Zarethan, isi wa Jezireeli, kutwu, la Bethshean kuduka Abelimehola, imbiri wa Jokimeam;

¹³Bengeberi, mu Ramothugileadi (madala ga Jairo mwana wa Manase, ga li mu Gileadi; ga li mmukono gwigwe, mu kivala kya Arigobu, ki veye mu Bashan, madala makumi gatano na lilala, manene agetsingaga nemi Iuguyu gyemigasa);

¹⁴Ahinadabu mwana wa Ido, mu Mahanaim;

¹⁵Ahimaazu mu Nafitali (uyu ya kwa Basemathu mukana wa Solomoni);

¹⁶Baana mwana wa Hushai, mu Asheri na Bealothu;

¹⁷Jehoshafatu mwana wa Parua, mu Isakari;

¹⁸Shimei mwana wa Ela, mu Benjamini,

¹⁹Geberi mwana wa Uri, mu kivala kya Gileadi, kivala kya Sihon mwami wa Vaamori na wa Ogu mwami wa Bashan; na uyu ya li yeng'ine mu kivala yikyo si ha li no munyampara wundi.

²⁰Yuda na Israeli va veye ava nyingi ligali kuli muyeke gu veye ku luginga lwenyanza ku bunyingi bwavo, va lia ni va nwa na va sangala.

²¹Na Solomoni yameha ku bwami bwosi kutwula ku Mugera kuduka ku kivala kya Vafilisiti, kandi kuduka ku lwako lwa Egepeti: na va leta ubusutu nokutumekira Solomoni ma diku gosi gelivamwoyo lilye.

²²Vyo kulia vya Solomoni vyelidiku lilala vya li vigera makumi gavaka vyo busie bunyuki, nevigero makumi gatano na lilala vyobusie bwamasia,

²³tsing'ombe tsirahu tsinkomeru li kumi, netsing'ombe tsirahu makumi gaviri tsi twula mu kyayo, na magondi mia, halala na yitsi imbongo ne kisusu na kongoni, netsingoko tsinkomeru.

²⁴Kigira yameha ku kivala kyosi ku luvega yilu lwo Mugera, kutwula Tiiisa kuduka Gaza, igulu wavami vosi ku luvega yilu lwo Mugera: na ya li nemirembe tsimbega tsyosi tsyokukumbiridza.

²⁵Na Yuda na Israeli va menya bulahi, sa mulala isi womuzabibu gwigwe na isi womukuyu gwigwe, kutwula Dan kuduka Beersheba, madiku gosi ga Solomoni.

²⁶Na Solomoni ya li nevigo vyetsiparasi tsielfu makumi gane tsyamagari gege gobulwani, na avanina ku tsiparasi tsielfu likumi na tsiviri.

²⁷Na vanyampara yavo va letera mwami Solomoni vyokulia, na vosi ava duka ku meza yomwami, mundu sa mulala ku mweli gwigwe; si va leka kali kilala kugehera.

²⁸Halala na yaga va leta shairi nobunyasi bwetsiparasi netsinyama tsyetsimbiru kuduka hosi ha vanyampara va veye, sa mulala ku miyinzi gyigye.

²⁹Nyasaye ya ha Solomoni ubu geeri bunyingi nelimanya linyingi, nomwoyo gwobuhaani, kuli umuyeke gu veye ku luginga lwenyanza.

³⁰Ubugeeri bwa Solomoni bwa vita ubugeeri bwavana vevugwe, nobu geeri bwosi bwa Egepeti.

³¹Kigira ya li wobugeeri kuvita avandu vosi; kuvita Ethan Muezara, na Heman, na Kalikoli, na Darida avana va Maholu: nelidzominywa lilye lya duka ku tsihiri tsyosi tsya mu kumbiridza tsimbega tsyosi.

³²Naye ya kupa tsing'ano tsielfu tsivaka; netsinyimbu tsitsye tsya li elfu na tsitano.

³³Na ya vola makuva gemisala, kutwula mu musala gwomutaragwa agu veye mu Lebanon kuduka ku luguku imeranga ku ludigi: kandi ya vola makuva getsinyama, na gamanyonyi, negevindu vi molanga, na ga tsisudzi.

³⁴Navandu vetsihiri tsyosi vadza kuhulira ubugeeri bwa Solomoni, mu bwami bwosi bwo mu lirova, ava hulira makuva gobugeeri bwibwe.