Read lulogooli 2 Avami 17 Bible Online

2 Avami 17 - lulogooli bible

2 Avami 17

¹Ku muhiga gwelikumi na gyiviri gwelyameha lya Ahazu mwami wa Yuda, Hoshea mwana wa Ela ya tanga kwameha mu Samaria ku Israeli, na yameha mihiga gyitano na gyine

²Na ya kola budamano imbiri wa Yahova, navutswa si bwa li kuli bwa avami va Israeli avimira imbiri wewe.

³Shalimanezeru mwami wa Asuria yanegira kulwana naye; na Hoshea ya gwa mutumekiri wewe, na ya mu hilira ubushutu.

⁴Nomuami wa Asuria ya nyola bwebaali mu Hoshea; kigira ya tuma avatumwa ku So mwami wa Egepeti; na si ya ha muami wa Asuria ubushutu, kuli ya kolanga muhiga nomuhiga: kigira yaga mwami wa Asuria ya mu'boha, na a mbika mbuhambe.

⁵Hene yaho mwami wa Asuria yanegira mu kivala kyosi, na a duka Samaria, nokulikumbiridza mihiga gyivaka.

⁶Ku muhiga gwa kola gyitano na gyine gwelyameha lya Hoshea, mwami wa Asuria ya vugula Samaria, na ya hila Israeli avahambe kuduka Asuria, na ya va vika mu Hala, nomu Haboru, himbi na mugera gwa Gozan, nomu madala ga Vamedi.

⁷Ga li ndiyo, kigira avana va Israeli va kola ubwoni ku Yahova Nyasaye wavo, wa va twulidza mu kivala kya Egepeti, kutwula isi womukono gwa Farao mwami wa Egepeti, na va tia vanyasaye vandi

⁸nokugenda mu miima gyetsihiri tsindi, tsya Yahova ya kunga imbiri wavana va Israeli, negyavami va Israeli, gya va kola.

⁹Navana va Israeli va kola makiriri vindu vi ta li vilungi ku Yahova Nyasaye wavo: ne veyombakira hadiguluku mu madala gavo gosi, kutwula ku kitaladzi kyomulindi kuduka ku lidala lya madigi getsingaga;

¹⁰na vesingeridzira minara nemisala gyemisambwa ku kigulu sa kilala kitambi, na isi wemisala sa mulala gwamatu mavisi;

¹¹na va vuyidza vimuli mu hadiguluku hosi, kuli avetsihiri va kola tsya Yahova ya twulidza imbiri wavo, na va kola ubudamano ku vihiriridza Yahova;

¹²na va tumekira vifwananyi, vya Yahova ya va gaya, na a vola, Si mu la kola yaga mba.

¹³Halala na yaga Yahova ya lolekidzira Israeli, na Yuda, na a va volera nomunwa gwomuprofeti sa mulala, na valoli sa mulala, na a vola, Mu girunkane mu leke tsinzira tsyenyu tsindamano, mu gumire malago ganga nemiima gyange, kuli lilaga ya nda laga vaguga venyu, nalya nda leta ku mwinye nomukono gwavatumekiri vange avaprofeti.

¹⁴Navutswa va sula kuhulira, ni va kola magoti gavo madinyu, kuli magoti ga vadada vavo, va vula kusuuvira Yahova Nyasaye wavo.

¹⁵Na vambakana amalago gege, nelilagana lilye vya ya kola halala navaguga vavo, nelilolekidza lilye lya ya va lolekidzira, navo va londa vya wtswa, ni va gwa avavutswa, na va londa avetsihiri ava va kumbiridza, ava Yahova ya va laga va ta kola kuli yavo.

¹⁶Na va leka malago gosi ga Yahova Nyasaye wavo, ni velombera vifwananyi vyokulonga, vi veye vimoli viviri, na va lomba misala gyemisambwa, nokusigamira lihe lyosi lyomigulu, nokutumekira Baal.

¹⁷Na ya vitidza avana vavo avayai navakana hagati ho muliru, na va tumekira ubukumu nobusegetiri, na vegulidza avene va duke kukola ubudamano imbiri wa Yahova, kumuvihiridza.

¹⁸Kigira yaga Yahova ya vihirirwa Israeli ligali, na a va twulidza va vule kuva imbiri wewe: si ha li no wa tigala navutswa ihiri ya Yuda yeng'ine.

¹⁹Avandu va Yuda kandi si va gumira malago ga Yahova Nyasaye wavo, navutswa va genda mu malago ga Israeli va kola.

²⁰Ma Yahova yambakana kisukululwi kyosi kya Israeli, na ya va dambidza, na ya va vika mu makono ga yavo ava va lanya, kuduka lwa ya mala kuvata va twule imbiri wewe.

²¹Kigira ya twulidza Israeli mu inyumba ya Daudi; navo va ha Jeroboam, mwana wa Nebati, ubwami: na Jeroboam ya niga Israeli va ta londa Yahova, na ya va dukidza mu lihyolo linene.

²²Na avana va Israeli va hongera kugenda mu bwoni bwosi bwa Jeroboam ya kola; si vavukana nabwo;

²³kuduka Yahova ya twulidza Israeli imbiri wewe, kuli ya vola neminwa gyavatumekiri veve vosi vaprofeti. Ma Israeli va hambwa vahambe kutwula mu kivala kyavo kutsia mkivala kya Asuria, kuduka lero.

²⁴Na mwami wa Asuria ya leta vandu kutwula Babuloni, na Kutha, na Ava, na Hamathu, na Sefarivaim, na ya va vika mmadala ga Samaria mbugono bwavana va Israeli; na va gumira Samaria, nokumenya mmadala galyo.

²⁵Na ga duka, mu litanga lyelimenya lyavo mu kivala yikyo, si va tia Yahova: kigira yaga Yahova ya lete ving'ang'a hagati havo, na valala kuvo viitwa.

²⁶Kigira yaga va volera mwami wa Asuria, ni va vola, Avandu vetsihiri tsya wa leta, nokuvavika mu madala ga Samaria, si va manya lilaga lyomunyasaye wekivala kyene: kigira yaga a leti ving'ang'a hagati havo, navyo viitanga yava, kigira si va manya miima gyomunyasaye wekivala.

²⁷Hene yaho mwami wa Asuria ya laga, na a vola, Hila mulala ku vasalisi va mwa twulidza yo; va tsie kumenya yo, nokuvegidza miima gyomunyasaye wekivala.

²⁸Ma mulala ku vasalisi ava va hila avahambe kutwula Samaria, yadza na a menya Betheli, na ya vegidza kuli ga va dukira kutia Yahova.

²⁹Navutswa tsihiri sa indala tsyelombera avanyasaye vavo avene, na va va vika mu tsinyumba tsya hadiguluku ha Vasamaria va lomba, ihiri sa indala mu lidala lyavo lya va menya mu.

³⁰Na vandu va Babuloni va lomba Sukothubenothu, navandu va Kuthu va lomba Nerigali, na Vahamathu va lomba Ashima,

³¹na Vaavi va lomba Nibihazu na Tarataka; na Vasefarivi va samba avana vavo mu muliru kigira Adarameleku na Anameleku, avanyasaye va Sefarivaim.

³²Kunangwa va tia Yahova, ni velombera mu avene avasalisi va hadiguluku, ava va haanira visyuviriru mu tsinyumba tsya hadiguluku.

³³Va tia Yahova, nokutumekira avanyasaye vavo avene, kuli miima gyetsihiri tsya va hilwa mubuhambe kutwula hagati havo.

³⁴Kuduka lero va kolanga kuli miima gyoku matsyambiri: si va tia Yahova mba, kandi si va kola kuli miima gyavo, kinga kuli likalaga lyavo, kinga kuli malago, kinga kuli lilaga lya Yahova ya laga avana va Yakobo, wa ya gulika Israeli;

³⁵ava Yahova ya lomba lilagana halala navo, na veganehidza, na a vola, Mu ta tia avanyasaye vandi mba, kandi mu tinama imbiri wavo, kinga kuvatumekira, kandi mu ta va haanira visyuviriru:

³⁶navutswa Yahova, wa mu twulidza mu kivala kya Egepeti netsingulu tsinene, nomukono gwa nyirwa, uyu niye wa mu tia, na mu la sigamira imhiri wewe, nokumuhaanira visyuviriru:

³⁷na miima nelikalaga, namalago nelilaga, lya ya ng'odera mwinye, mu la ga gumira nokugadukidza mihiga nemihiga; mu ta tia avanyasaye vandi mba:

³⁸nelilagana lya nda kola halala nemwinye mu tivirira mba; kandi mu ta tia vanyasaye vandi mba:

³⁹navutswa mu la tia Yahova Nyasaye wenyu: naye a la mu honnya mwinye ku makono gavasigu venyu vosi.

⁴⁰Navutswa si va hulira mba, va kola kuli miima gyavo gyoku matsyambiri.

⁴¹Ma vetsihiri yitsyo va tia Yahova, na va tumekira vifwananyi vyavo vya vadzwa; kandi avana vavo ndiyo, navana vavana vavo, kuli vadada vavo va kola, navo kandi va kola ndiyo kuduka lero.