Read lulogooli 2 Avami 18 Bible Online

2 Avami 18 - lulogooli bible

2 Avami 18

¹Na ga duka ku muhiga gwa kola gyivaka gwelyameha lya Hoshea mwana wa Ela mwami wa Israeli, Hezekia mwana wa Ahazu mwami wa Yuda ya tanga kwameha.

²Ya li nemihiga makumi gaviri na gyitano lwa ya tanga kwameha; na yameha mihiga makumi gaviri na gyitano na gyine ha Yerusalemi: na lieta lya mama wewe lya li Abi mwana wa Zekaria.

³Ya kola ubulungi imbiri wa Yahova, kuli gosi ga Daudi guga wewe ya kola.

⁴Hadiguluku ya twulidza ligali, na ya sambula minara, nokutema misala gyemisambwa: na ya donyanya inzoka yomugasa ya Musa ya lomba; kigira avana va Israeli va li ni va ki vuyidziranga vimuli kuyo kuduka ku madiku yago; nayo ya gulikwa Nehushitan.

⁵Ya suuvira Yahova, Nyasaye wa Israeli; kuduka si ha li nowundi wa leng'ana naye mu avami vosi va Yuda, kinga mu yavo avimira imbiri wewe.

⁶Kigira uyu ya hambana na Yahova; si ya leka kumulonda mba, navutswa ya gumira malago gege, ga Yahova ya laga Musa.

⁷Yahova ya li halala naye; hosi ha ya tsia ya gasidzwa: na ya kola bwebaali ku mwami wa Asuria, na a vula kumutumekira.

⁸Ya kuya Avafilisiti kuduka Gaza nomu tsinzako tsyalyo, kutwula ku kitaradzi kyavalindi kuduka ku lidala lyolugaga.

⁹Na ga duka, ku muhiga gwa kola gyine gwelyameha lya Hezekia, nagwo nu muhiga gwa kola gyitano na gyiviri gwelyameha lya Hoshea mwana wa Ela mwami wa Israeli Shalimanezeru mwami wa Asuria yanegira kulwana na Samaria, na ya li kumbiridza.

¹⁰Ku kiheri kyemihiga gyivaka ya li vugula: mu muhiga gwa kola gyitano na mulala gwa Hezekia, nomu muhiga gwa kola gyitano na gyine gwelyameha lya Hoshea mwami wa Israeli, Samaria lya vugulirwa.

¹¹Na mwami wa Asuria ya hila Vaisraeli Asuria, na ya va vika mu Hala, nomu Haboru, himbi nomugera gwa Gozan, mu madala ga Vamedi,

¹²kigira si va hulira mwoyo gwa Yahova Nyasaye wavo, navutswa vononya lilagana lilye, kali gosi ga Musa mutumekiri wa Yahova ya va laga, va vula kugahulira, nokugakola.

¹³Kunangwa ku muhiga gwa kola likumi na gyine gwelyameha lya Hezekia, Senakeribu mwami wa Asuria yanegira kulwana namadala gosi ga Yuda agetsingaga, nokugavugula.

¹⁴Hezekia mwami wa Yuda ya tuma avatumwa va tsia ku mwami wa Asuria kuduka Lakishi, na a vola Mali kuhyola; yirana u ndeke: kya u vika ku inze nda ki ginga. Ma mwami wa Asuria ya tungidza Hezekia mwami wa Yuda, tsitalenta tsimia tsivaka tsyefetha, netsitalenta makumi gavaka tsyethahabu.

¹⁵Na Hezekia ya mu ha ifetha yosi ya nyoleka mu inyumba ya Yahova, nombutugi bwenyumba yomwami.

¹⁶Inyinga yeyo ya twulidza ithahab ku miliango gyelitempeli lya Yahova noku tsitiru tsya Hezekia ya vika ku ithahabu, na ya ha mwami wa Asuria.

¹⁷Mwami wa Asuria ya tuma yava Taritan na Rabisarisi, na Rabishake kutwula Lakishi halala nelihe linene lyavasikari, kutsia ku mwami Hezekia ha Yerusalemi. Navo vanegira ni va duka Yerusalemi. Navo lwa va mala kwanegira, lwa va duka va singira himbi nomugera gwelidavalia lyegulu, li veye mu lihasi li tsitsanga mu kiguti kya avogidzi.

¹⁸Navo lwa va mala kulanga mwami, Eliakim mwana wa Hilikia, wa li musingeriri wenyumba, na Shebina mung'odi, na Joa mwana wa Asafu mung'odi wetsinyinga, va twula kutsia kuvo.

¹⁹Na Rabishake ya va volera, Mu volere Hezekia, mwami munene, mwami wa Asuria a vola, Ni lisuuvira ki lya u suuviranga?

²⁰U vola, (navutswa ga veye makuva gokwevolera vutswa), Ga veye ho makuva netsingulu ku bulwani. Kunangwa u suuviranga bwaha, u duke kukola bwebaali ku inze?

²¹Kalunu, henza, u suuviranga midigiru gyekidundu kyaminwa, livola li veye Egepeti, kyomundu ava ni yedira ku, ki lingira mu mukono nokumutumita; ni ndiyo Farao mwami wa Egepeti a veye ku vosi ava mu suuvira.

²²Navutswa ni i va mu volera inze, Kwinye ku suuvira ku Yahova Nyasaye wetu; si a li niye, wa Hezekia ya twulidza hadiguluku ho bwali bwibwe, na a volera Vayuda na Yerusalemi, Mu la sigamira imbiri wobwali yibu mu Yerusalemi?

²³Kunangwa kalunu, mwadza, mbe munene wange mwami wa Asuria kihambiriru, na inze nda ku ha tsiparasi tsielfu tsiviri, ni i va ive u nyala ku luvega lulwo kunyinnya avokunina ku.

²⁴U nyala ndi ku kwirannya inyima mmoni mwa munyampara mulala u veye mukekeke mu vatumekiri vo munene wange, nokusuuvira Egepeti u nyole magari navasikari vokunina tsiparasi?

²⁵Nda li kwanegira kulwana na hano nokwononya hano bugira kuva na Yahova? Yahova ya mbolera, na a vola, Yanegira u lwane nekivala yikyo, nokukyononya.

²⁶Hene yaho Eliakim mwana wa Hilikia, na Shebina, na Joa, va volera Rabishake, Mwadza, u volerane nekwinye avatumekiri vovo, nolulimi lwa Kisiria kigira ku ki manya: u ta volerana nekwinye nolulimi lwa Kiyuda mu amatu gavandu va veye ku lidigi lyolugaga.

²⁷Navutswa Rabishake ya va volera, Munene wange ya ntumi ku munene wowo, noku ive, kuvola makuva yaga? Si ya nduma ku avandu vikaye ku lidigi lyolugaga, va duke kulia amabi gavo avene, nokunwa amadzi gavo avene halala nemwinye?

²⁸Ma Rabishake ya singira, na a hanzuka mu lulimi lwe Kiyuda, na a vola, Mu hulire likuva lyomwami munene, mwami wa Asuria.

²⁹Mwami a vola, Mu ta leka Hezekia a mu gade; kigira si a la nyala kumuhonya nomukono gwigwe:

³⁰kandi mu ta leka Hezekia a mu suuviridze ku Yahova mba, na a vola, Yahova ligali a li ku honnya, nelidala yili si li la vikwa mmukono gwomwami wa Asuria mba.

³¹Mu ta hulira Hezekia mba: kigira mwami wa Asuria a vola, Mu manyane ninze, na mu twule mudze ku inze; na mu lie sa mulala mazabibu gege, na sa mulala makuya gege, na mu nwe sa mulala amadzi gesiyongo yeye;

³²kuduka lwa ndidza nokumwadikidzira mu kivala ki fwanana nekivala kyenyu, kivala kyobuswage newaini impya, kivala kyevyokulia nemilimi gyemizabibu, kivala kyamaguta gyemizeituni nekyobwuki, mu duke kuva mwoyo, mu vule kukudza; kandi mu ta hulira Hezekia, lwa a mu gada, na a vola, Yahova a la ku honnya.

³³Mulala ku vanyasaye vosi avetsihiri a honnyi kivala kikye ku mukono gwomwami wa Asuria inyinga indala?

³⁴Avanyasaye va Hamathu va veye haliha, na va Aripadi? Navanyasaye va Sefarivaim va veye haliha, na va Hena, na va Iva? Yavo va honnyi Samaria ku mukono gwange?

³⁵Ni vanyasaye ki mu vanyasaye vosi avevivala, ava honnyi kivala kikye ku mukono gwange, kuduka Yahova a honnye Yerusalemi ku mukono gwange?

³⁶Nnvutswa avandu yavo va kiring'ana, si va mu tivulira kindu mba; kigira lilaga lyomwami lya li, na a volanga, Mu ta mu tivulira mba.

³⁷Hene yaho Eliakim mwana wa Hilikia, wa li musingeriri wenyumba, na Shebina wa li mung'odi, na Joa mwana wa Asafu mung'odi wetsinyinga, vadza ku Hezekia ni va tanduye tsingubo tsyavo, ni va mu volera makuva ga Rabishake.