Read lulogooli 2 Avami 20 Bible Online

2 Avami 20 - lulogooli bible

2 Avami 20

¹Ku lidiku yilyo Hezekia ya lwala na a buyika. Na Isaya muprofeti, mwana wa Amozu, ya tsia kuye, na a mu volera, Yahova a vola, U lungekidze makuva genyumba yoyo; kigira u la kudza, si u la va mwoyo mba.

²Hene yaho ya henzidza mmoni mwimwe kwidigi, na a saala Yahova, na a vola,

³O Yahova, nku saala ligali, mwadza, Widzulitsa kalunu kuli nda genda imbiri wowo mu geligali nomwoyo mudukiru, nokukola amalahi mu tsimoni tsitsyo. Hezekia ya lira ligali.

⁴Ma ga duka, Isaya na a kikiri kutwula hagati ho mugidzi, makuva ga Yahova gadza kuye, nokumuolera,

⁵Yirana, u volere Hezekia mwimiriri wavandu vange: Yahova, Nyasaye wa guga wowo Daudi, a vola, Mbuliye lisaala lilyo, na maliga gogo nga loli: henza, nda ku honnya; lidiku lya kavaka u lanegira u tsie mu inyumba ya Yahova.

⁶Na nda meda ku madiku gogo, mihiga likumi na gyitano; na nda honnya ive nelidala yili ku mukono gwomwami wa Asuria; nda sola lidala yili kigira inze, kandi kigira Daudi mutumekiri wange.

⁷Isaya ya vola, Vuguli kibagaga kyobukima bwamakuyu. Navo va ki vugula ni va ki vika ku lihi, naye ya hona.

⁸Hezekia ya teva Isaya, Kilolekidzu kyange ni kindu ki kyokuva Yahova a la mbonnya, nekyokuva ndanegira mu inyumba ya Yahova ku lidiku lya kavaka?

⁹Isaya ya mu volera, Kilolekidzu kikyo ki twulanga ku Yahova, Yahova a la kols aga ya vola, ni yiki: kiriri ki tsie imbiri vikaa likumi, naho kirane inyima vikaa likumi?

¹⁰Na Hezekia ya tivula, Li veye lyangu, ikiriri ki tsie imbiri vikaa likumi, auwa, ga ve ikiriri kirane inyima vikaa likumi.

¹¹Isaya mprofeti yanira Yahova: naye yirannya kiriri ki duka vikaa likumi, kya li hi ki mali kuyika mu vikaa vya Ahazu.

¹²Inyinga yeyo Berodaku-baladan mwana wa Baladan, mwami wa Babuloni, ya hila tsibaruwa nekihaanwa ku Hezekia; kigira ya hulira Hezekia a veye mulwaye.

¹³Na Hezekia ya va hulira, nokuvamannya vindu vivye vyobuguli budinyu mu inyumba yosi, ifetha, nethahabu, munyovo, na maguta gobuguli budinyu, nenyumba yeviyuma vivye vyobulwani, na vyosi vya nyoleka mu butugi bwibwe: si ha li nekindu mu inyumba yeye, kinga mu lyameha lilye lyosi, kya Hezekia ya vula kuvamannya.

¹⁴Hene yaho Isaya muprofeti yadza ku mwami Hezekia, nokumuteva, Avandu yava va vola ndi? Navo va twuli haliha kuudza ku ive? Na Hezekia ya vola, Va twuli mu kivala kyehale ligali, mu kivala kya Babuloni.

¹⁵Kandi ya teva, Va loli ki mu inyumba yoyo? Hezekia ya tivula, Va loli vindu vyosi vyomu inyumba yange: si ha veye nekindu mu butugi bwange bwosi kya mbuli kuvamannya.

¹⁶Isaya ya volera Hezekia, Hulira likuva lya Yahova,

¹⁷Henza, madiku gadzanga, mu madiku yaga, kindu si kilala kyomu inyumba yoyo, na vyosi vya vaguga vovo va vika kuduka lidiku lya lero, vyosi vi la hilwa Babuloni: si ha la tigala nekindu, Yahova a vola.

¹⁸Kandi mu avana vovo avayai, ava li twula ku ive, ava ive u livula, va la va hila avahambe, navo va li va vitsiri mu inyumba yobwami yomwami wa Babuloni.

¹⁹Hene yaho Hezekia ya volera Isaya, Li veye lilahi likuva lya Yahova lya ive u voye. Ya mu volera kuvita Gya va ni gyi va mirembe na geiigali ga la va mmadiku gange, si bu va bulahi?

²⁰Vikolwa vya Hezekia vya tigala, netsingulu tsitsye, na kuli ya lomba lidavalia, nomugera, nokuleta amadzi gingira mu lidala, vindu yivi si vya ng'odwa mu kitabu kyetsinyinga tsyavami va Yuda?

²¹Hezekia ya gona halala navaguga veve; na Manase mwana wewe yameha mbugono bwibwe.