Read lulogooli 2 Avami 22 Bible Online

2 Avami 22 - lulogooli bible

2 Avami 22

¹Josia ya li nemihiga gyitano na gyivaka lwa ya tanga kwameha; na yameha mihiga makumi gavaka na mulala mu Yerusalemi: na lieta lya mama wewe lya li Jedida mukana wa Adaia wa Bozikathu.

²Naye ya kola bulahi imbiri wa Yahova, ya genda mu inzira yosi ya Daudi guga wewe, si ya girunkana ku luvega lwomukono mulungi kinga mukono mmosi.

³Na ga duka mu muhiga gwa kola likumi na gyitano negyivaka gwelyameha lya mwami Josia, mwami ya tuma Shafan, mwana wa Azalia mwana wa Meshulam, ya li mung'odi, ya tsia mu inyumba va Yahova, na a vola,

⁴Yanegira u tsie ku musalisi munene Hilikia, a duke kuvalidza ifetha i letangwa mu inyumba ya Yahova, ya avalindi vomuliango va solola ku avandu:

⁵navo va gyi vika mmakono ga yavo ava kolanga miyinzi va singiriranga inyumba ya Yahova, navo va haane ku yavo avakoli vemiyinzi, ava veye mu inyumba ya Yahova, va lombe ha sasubuka henyumba,

⁶ku avavadzi, navombaki, navatigiki va hebwe; va duke kugula misala na magina ga vadzwa va lombe inyumba.

⁷Na vutswa si va validzira avandu ifetha ya va vika mmakono gavo; kigira va tumika nobusuuvirifu.

⁸Na Hilikia musalisi munene ya volera Shafan mung'odi, Nyoye kitabu kyelilaga mu inyumba ya Yahova. Na Hilikia ya ha Shafan kitabu zana, naye ya ki soma.

⁹Na Shafan mung'odi ya tsia ku mwami, na a letera mwami makuva kandi, na a vola, Avatumekiri vovo va twulidze ifetha yosi ya nyoleka mu inyumba, navo va gi vika mmakono ga yavo avakoli vemiyinzi ava h lindanga inyumba ya Yahova.

¹⁰Na Shafan mung'odi ya volera mwami, na a vola, Hilikia musalisi u mbeye kitabu. Na Shafan ya ki soma imbiri womwami.

¹¹Mwami, lwa ya hulira makuva gekitabu kyelilaga, ya tandula tsingubo tsitsye.

¹²Na mwami ya laga Hilikia musalisi, na Ahikam mwana wa Shafan, na Akibori mwana wa Mikaia, na Shafan mung'odi, na Asaia mutumekiri womwami, na a vola,

¹³Mu tsie, mu ntevere kandi avandu, kandi Yuda vosi, ku Yahova, ku makuva gekitabu yiki ki nyoleka; kigira ubutima bwa Yahova bu veye ubunene bwa ya ku vihirirwa, kigira vaguga vetu si va huliye kulonda makuva gekitabu yiki, kukola kuli gosi ga ng'odwa ku kwinye.

¹⁴Ma Hilikia musalisi, na Ahikam, na Akibori na Shafan, na Asaia, va tsia ku Huiida wa li mprofeti mukali, muka Shalum mwana wa Tikiva, mwana wa Harihasi, mulindi wetsingubo (mukali uyu ya menya mu Yerusalemi mu lusoma lwa kaviri); navo va volerana naye.

¹⁵Naye ya va volera, Yahova, Nyasaye wa Israeli a vola: Volera mundu wa tuma mwinye kuudza ku inze,

¹⁶Yahova a vola, Henza, nda leta ubudamano hano, noku ava menyanga hano, yee makuva yaga gosi agekitabu kyomwami wa Yuda u somi.

¹⁷Kigira va leka inze, na va vuyidza vimuli ku vanyasaye vandi, va duke kumbihiriridza nemiyinzi gyosi gyamakono gavo; kigira yaga ubutima bwange bu laaka hano, nabwo si bu la siminywa mba.

¹⁸Navutswa mwami wa Yuda, wa tuma mwinye ku teva Yahova, mu la mu volera likuva yili, Yahova, Nyasaye wa Israeli, a vola: Kuli makuva ga wa hulira,

¹⁹kigira mwoyo gugwo gwa li mudoto, na ive wegehidza imbiri wa Yahova, lwa wa hulira aga nda vola ku hano, noku ava menyanga hano, va la gwa kyanyi nekilaamo, na ive wa tandula tsingubo tsitsyo, nokwidolidza maliga imbiri wange inze; nda ku hulira, Yahova a vola.

²⁰Kigira yaga, henza, nda ku vungidza ku vaguga vovo, na u la hilwa mu kilindwa kikyo nemirembe, tsimoni tsitsyo si tsi la lola ubudamano bwosi bwa ndi leta hano. Va letera mwami makuva kandi.