Read lulogooli 2 Avami 4 Bible Online

2 Avami 4 - lulogooli bible

2 Avami 4

¹Na mukali mulala ku vakali vavana vavaprofeti yanira Elisha, na a vola, Mutumekiri wowo musatsa wange u kudzi; na ive u manya mutumekiri wowo ya tia Yahova: nomuvanzi u duki kuvugula avana vange vaviri va ve avatugwa.

²Na Elisha ya mu teva, Nda ku kolera ki? Mbolera; u veye na ki mu inyumba? Naye ya vola, Inze mukana rnutumekiri wowo si mbeye nekindu mu inyumba ni lu ta li lukoola lwamaguta.

³Ma ya mu volera, Tsia, u saave viju kyova ku vatende vovo vosi, viju vyere vi ta veye nekindu muvyo; u ta saava vikekeke mba.

⁴Na u lingira, na kwihanira muliango, ive navana vovo, na u tsuke amaguta mu viju zana vyosi; na kizule u la ki vika ha luvega.

⁵Ma ya twula kuye, nokwihanira muliango ku uyu navana veve; na va mu letera viju, naye ya tsuka.

⁶Na ga duka, lwa vya mala kwizula, ya volera mwana wewe, Leta kindi. Ya mu volera, Si ha veye nekindi mba. Na maguta ga kalidzira.

⁷Hene yaho yadza na a volera mundu wa Nyasaye. Naye ya vola, Tsia, u gamane maguta, u tunge ligovi lilyo, na ga tigala u tumekire ive navana vovo.

⁸Na ga duka lidiku lilala, Elisha ya tsia Shunem, ya li ho mukali munene; naye ya mu goonya yadze kulagira ubukima. Na ga duka kuva ndiyo, lwa ya vitanga ku inzira yeyo, yingiranga kulagira ubukima.

⁹Na mukali zana ya volera musatsa wewe, Henza, ndolanga mundu uyu a veye mutakatifu wa Nyasaye, uyu u vitanga ahetu kazozo.

¹⁰Mwadza, genda ku lombe kayumba ku lusimbu; nokumuvikira mu kitali, nemeza, nentebe, nekyokuvika mu itaya: na ga la va, lwa yadza ku kwinye, a lingira mu.

¹¹Na lidiku lya duka, ya duka yo, ni yingira mu kayumba nokugona.

¹²Na ya volera Gehazi mutumekiri wewe, Langa Mushunem uyu. Naye lwa ya mu langa, mukali zana ya singira imbiri wewe.

¹³Na a mu volera, U mu volera, Henza, ive u koleye kwinye ubulahi yibu bwosi; na ive u la kolerwa ki? Wenya kusaalirwa kindu ku vyosi ku mwami, naho ku munene welihe? Umukali ya tivula, Inze menyanga mu avandu vange mwene.

¹⁴Ya teva mutumekiri wewe, A kolerwa kindu ki, mukali uyu? Gehazi ya tivula, Ligali si a veye nomwana, nomusatsa wewe u gwiye musakulu.

¹⁵Ya vola, Mu lange. Lwa ya mu langa, ya singira ha muliango.

¹⁶Elisha ya mu volera, Inyinga kuli yiyi, umuhiga gudzanga, u la va nomwana muyai mu makono gogo. Naye ya vola, Auwa, munene wange, ive mundu wa Nyasaye, u ta vehera inze mukana mutugwa wowo.

¹⁷Mukali uyu ya vereka, ni yivula mwana muyai inyinga zana, lwa muhiga gwa duka, kuli Elisha ya mu volera.

¹⁸Na lwa mwana ya viruka, lya duka lidiku lilala, ya twula na a tsia ku dada wewe ha va gesanga.

¹⁹Naye ya volera dada wewe, Mutwe gwange, mutwe gwange. Na dada wewe ya volera mutumekiri wewe, U mu hile ku mama wewe.

²⁰Naye lwa ya mu vugula, nokumuhila ku mama wewe, yikala ku amalu gege kuduka mbasu hagati, na ya kudza.

²¹Naye ya tsia igulu na yalira mwana ku kitali kyomundu wa Nyasaye, na a twula na a mu hanira kiliango.

²²Na a langa musatsa wewe, na a mu volera, Mwadza, ndetera mulala ku vatumekiri, nesukiri indala, nduke kunyagulira ku mundu wa Nyasaye, nokwirana kandi.

²³Naye ya vola, Kigira ki u tsia lero? Si li veye lidiku lyomweli muhya, kinga lisabato mba. Naye ya vola, Ga ve mirembe.

²⁴Kunangwa ya lomba isukiri, nokuvolera mutumekiri wewe, Gendidza, ku tsie imbiri; u ta nindageridza ku ligenda lyange, ni nta ku volera.

²⁵Ma ya tsia, na a duka ku mundu wa Nyasaye mu kigulu kya Karimeli. Ga duka, lwa mundu wa Nyasaye ya mu lola na a kikiri ihale, hene yaho ya volera mutumeliiri wewe Gehazi, Henza, uyu a veye Mushunem:

²⁶mwadza, nyagula kalunu, u tsie kumwaganira, u mu teve, Mirembe ku ive? Nemirembe ku musatsa wowo? Nemirembe ku mwana? Na ya tivula, Nemirembe.

²⁷Nayelwaya duka ku mundu wa Nyasaye mu kigulu, ya mu gumira virenge. Na Gehazi yisunda ahimbi kumutwulidza; navutswa mundu wa Nyasaye ya mu volera, Mu leke a ve: kigira mwoyo gwigwe gu veye nobululu muye; na Yahova u visi ku inze, a vule kumbuulira.

²⁸Hene yaho ya vola Nda sava mwana ku munene wange? Si nda vola, U ta ngada mba?

²⁹Hene yaho ya volera Gehazi Webohe kikenge kikyo, u vugule impimbo yange mmukono gugwo, u tsie: nu u vugana nomundu ku inzira u ta mu chelidza mba; na a ku chelidza, u ta mu tivulira mba: u vike impimbo yange ku mumoni mwomwana.

³⁰Na mama womwana ya vola Kuli Yahova a veye mwoyo, na kuli ive u veye mwoyo, si nda leka ive mba. Ma Elisha ya singira na a mu londa.

³¹Na Gehazi yimirira imbiri wavo, na ya vika impimbo ku mumoni mwomwana, navutswa si ha li nomwoyo, kinga lihulira. Hene yaho yirana kumwaganira, na a mu volera, na a vola, Mwana si a vuki mba.

³²Elisha lwa ya mala kwingira mu inyumba, henza, mwana u kudzi, na waleywi ku kitali kikye.

³³Ma yingira, ni yehanira kiliango ku uyu nomwana vombi, nokusaala Yahova.

³⁴Na a nina ku kitali, nokugona ku mwana, na ya vika munwa gwigwe mu munwa gwigwe, netsimoni tsitsye mu tsimoni tsitsye, na makono gege ku makono gege: na ya gona kuye; na mubiri gwomwana gwa tanga kunyola uluya.

³⁵Hene yaho yirana, na a genda mu inyumba lulala yiyi na yiyi; na a nina na a gona kuye: umwana ya simula hali gatano na kaviri, na mwana ya kunula tsimoni tsitsye.

³⁶Na ya langa Gehazi, na a mu volera, Langa Mushunem. Na a mu langa. Na lwa yingira kuye, ya mu volera, Vugula mwana wowo.

³⁷Hene yaho mukali yingira, na a gwa ha virenge vivye, na yinama kuduka hasi: na a vugula mwana wewe, na a twula.

³⁸Elisha yadza kandi Gilgali. Na ya li ho itodzo mu kivala; navana vavaproieti vikala imbiri wewe: ya volera mutumekiri wewe, Tengeka isika, u dekere avana vavaprofeti yava vyokulia.

³⁹Na mulala ya tsia mmulimi kwaha tsingutsa, na a nyola liungu lyombulimu, na a noga amungu na a vungidza ku ingubo yeye, na a tsia kugadonya nokuvika mu isika yevyokulia; kigira si va ga manya.

⁴⁰Ma vinulira avandu va duke kulia. Na ga duka, lwa va litsanga vyokulia zana, va hanzuka, nokuvola, O mundu wa Nyasaye, ha veye nelikudza mu isika yiyi. Si va nyala kulia ka.

⁴¹Navutswa ya vola, Leta ubusie. Na ya bu vika mu isika zana; na ya vola, Mwinulire avandu, va duke kulia. Na si ha li nobudamano kandi mu isika.

⁴²Na mundu mulala ya twula Baal-shalisha, na a letera mundu wa Nyasaye ubukima bwobuhya, milango makumi gaviri gye shairi, nevangala vivisi vyengano mu ligunia. Na a mu volera, U he avandu yava va duke kulia.

⁴³Mutumekiri wewe ya vola, Ai, mbike yivi imbiri wavandu mia? Navutswa ya mu volera, U he avandu yava va duke kulia; kigira Yahova a vola, Va la lia, na vi la tigala.

⁴⁴Ma ya va vikira yo, navo va lia, na va leka vilala kuvyo, kuli likuva lya Yahova lya volwa.